၂၀၁၆ ခုနှစ်၊ ဒီဇင်ဘာ ၂၁ ရက်

 မန္တလေးတိုင်းဒေသကြီးအစိုးရအဖွဲ့၏ လမ်းညွှန်ချက်အရ မန္တလေးမြို့တော်စည်ပင်သာယာရေးကော်မတီနှင့် Blue Ocean Operating Management Co.,Ltd တို့ ပူးပေါင်းဆောင်ရွက်သော 1882 Hot Line ဝန်ဆောင်မှုဖွင့်ပွဲအခမ်းအနားကို ဒီဇင်ဘာ ၂၁ ရက် နံနက် ၈ နာရီက အောင်မြေသာစံမြို့နယ်၊ ၈၉ လမ်း၊ ၂၂ လမ်းနှင့် ၂၃ လမ်းကြား သီရိမန္တလာဈေး ပထမထပ်၊ Blue Ocean Contact Center ၌ကျင်းပရာ တိုင်းဒေသကြီးလွှတ်တော်ဥက္ကဋ္ဌ ဦးအောင်ကျော်ဦး၊ ဒုတိယဥက္ကဋ္ဌ ဒေါက်တာ ခင်မောင်ဌေး၊ တိုင်းဒေသကြီးအစိုးရအဖွဲ့ဝင် စည်ပင်သာယာရေးဝန်ကြီးဌာန ဝန်ကြီး မန္တလေးမြို့တော်ဝန် ဒေါက်တာ ရဲလွင်၊ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး ဦးမျိုးသစ်၊ တိုင်းဒေသကြီးအဆင့် ဌာနဆိုင်ရာတာဝန်ရှိသူများ၊ Blue Ocean Operating Management Co.,Ltd Chairman ဦးထွန်းထွန်းနိုင်နှင့် တာဝန်ရှိသူများ၊ မန္တလေးမြို့တော်စည်ပင်သာယာရေးကော်မတီ တွဲဖက်အတွင်းရေးမှူး နှင့် ဌာနမှူးများ၊ ဖိတ်ကြား ထားသည့် ဧည့်သည်တော်များ၊ မီဒီယာများ တက်ရောက်ကြသည်။

 ရှေးဦးစွာ Blue Ocean Contact Center ဆိုင်းဘုတ်ကို မြို့တော်ဝန် ဒေါက်တာရဲလွင်က စက်ခလုတ်နှိပ်၍ ဖွင့်လှစ်ပေးပြီး ဒုတိယပိုင်းအစီအစဉ်အရ သီရိ မန္တလာဈေး ပထမထပ်ရှိ အဆိုပါ Blue Ocean Contact Center ခန်းမ၌ အခမ်းအနားကို ဆက်လက်ကျင်းပရာ မြို့တော်ဝန်က မန္တလေးမြို့တော်၏ ပထမဆုံးတစ်ခုတည်းသော Call Center (1882 Hot Line) ကိုဖွင့်လှစ်နိုင်ခဲ့သည့်အတွက် အထူးဝမ်းမြောက်ဂုဏ်ယူပါကြောင်း၊ နိုင်ငံတော်၏ ဖွံ့ဖြိုး တိုးတက်လာသည့် ဈေးကွက်စီးပွားရေးစနစ်နှင့်အညီ နိုင်ငံပိုင်၊ ပုဂ္ဂလိကပိုင် စီးပွားရေးလုပ်ငန်းများအတွက် အသက်တမျှ အရေးကြီးသော သတင်းအချက် အလက်၊ နည်းပညာများကို အချိန်နှင့်တပြေးညီ သိရှိမှသာ ပြည်သူများအနေဖြင့် မိမိ၏အကျိုးစီးပွားကို အောင်မြင်ဖြစ်ထွန်းစေရန် ဆောင်ရွက်နိုင်မည်ဖြစ်သည့် အပြင် ကာကွယ်စောင့်ရှောက်ပေးနိုင်မှာဖြစ်ကြောင်း၊ မြို့တော်နေပြည်သူများအနေဖြင့် ယခုဖွင့်လှစ်လိုက်သည့် Call Center မှတစ်ဆင့် မေးမြန်းစုံစမ်းခြင်း ဖြင့် လက်ရှိဆောင်ရွက်လုပ်ကိုင်နေသော စီးပွားရေးလုပ်ငန်းနှင့်ပတ်သက်သည့် သတင်းအချက်အလက်၊ နည်းပညာများ ရယူနိုင်ခြင်း၊ ဌာနဆိုင်ရာများသို့ လုပ်ငန်းနှင့်ပတ်သက်၍ သိရှိလိုသည်များကို ကိုယ်တိုင်ကိုယ်ကျ ယခင်လို သွားရောက်မေးမြန်းရန်မလိုတော့ဘဲ Call Center မှ တစ်ဆင့် မေးမြန်းနိုင်ခြင်း၊ လူမှုရေး၊ စီးပွားရေး၊ ပညာရေး၊ ကျန်းမာရေးနှင့် သက်ဆိုင်သည့် သတင်းအချက်အလက် များကို စုံစမ်းမေးမြန်းနိုင်ခြင်း၊ ဖျော်ဖြေရေးဆိုင်ရာ ဝန်ဆောင်မှုများ၊ သတင်းအချက်အလက်များကို စုံစမ်းမေးမြန်းမျှဝေနိုင်ခြင်း၊ မန္တလေးမြို့တော်စည်ပင်သာယာရေးကော်မတီနှင့် ပတ်သက်သည့် အခွန်အခများ၊ ဝန်ဆောင်မှု များနှင့် အခြားသတင်းအချက်အလက်များကို စုံစမ်းမေးမြန်းနိုင်ခြင်း၊ ထို့အတူ မန္တလေးတိုင်းဒေသကြီးအစိုးရအဖွဲ့၏ အမိန့်ထုတ်ပြန်ချက်များ၊ သဘာဝဘေးအန္တရာယ်ဆိုင်ရာသတိပေးချက်များ၊ အခြားပညာပေးအစီအစဉ်များ အား မန္တလေးမြို့နေပြည်သူများသို့ Call Center မှ တစ်ဆင့် အသိပညာ မျှဝေနိုင်ခြင်းတို့ကို ဆောင်ရွက်နိုင်မည်ဖြစ်ပါကြောင်း၊ ယနေ့ဖွင့်လှစ်လိုက်သည့် Call Center (1882 Hot Line)ကဲ့သို့သော အခြားဝန်ဆောင်မှုများကို ရန်ကုန် မြို့တော်၌ ၂၀၁၁ ခုနှစ်ကတည်းက စတင်ဖွင့်လှစ်ခဲ့ပြီး ယခုဝန်ထမ်းဦးရေ ၁၀၀၀ ခန့်ဖြင့် ၂၄ နာရီပတ်လုံး ရန်ကုန်မြို့တော်၌ ဝန်ဆောင်မှုပေးနေသလို မန္တလေးမြို့တော်တွင်လည်း၊ ယခု ၂၀၁၆ ခုနှစ်တွင် ဖွင့်လှစ်ပြီး မန္တလေးမြို့နေပြည်သူများအတွက် သတင်းအချက်အလက် မေးမြန်းခြင်းများကို ၂၄ နာရီ ပတ်လုံး ပြန်လည်ရှင်းလင်းဖြေကြားနိုင်ရန်အတွက် ဝန်ထမ်းဦးရေ ၁၀၀၀ ကျော်အား ခန့်အပ်တာဝန်ပေး ဆောင်ရွက်မှာဖြစ်၍ မန္တလေးရှိ လူငယ်များ အတွက် အလုပ်အကိုင်အခွင့်အလမ်းများ ရရှိလာမှာဖြစ်ကြောင်း၊ နိဂုံးချုပ်အနေဖြင့် မန္တလေးမြို့တော်နေ ပြည်သူများ၏ လိုအပ်ချက်မေးမြန်းမှုများ၊ နိုင်ငံ တကာခရီးသွားဧည့်သည်များ၏ သိရှိလိုသည့်စုံစမ်းမေးမြန်းမှု များကို  Call Center က ယဉ်ကျေးပျူငှာစွာ ပြန်လည်ဖြေကြားမျှဝေခြင်းဖြင့် မန္တလေးမြို့တော်၏ ဂုဏ်ကို ဆောင်ကြပါရန် တိုက်တွန်းပါကြောင်း စသည်ဖြင့် ပြောကြားသည်။

 ဆက်လက်၍ Blue Ocean Operating Management Co.,Ltd Chairman ဦးထွန်းထွန်းနိ်ုင်က Mandalay Contact Center “1882 Hot Line” ဖွင့်လှစ် ရခြင်း ရည်ရွယ်ချက်နှင့် ဝန်ဆောင်မှုလုပ်ငန်းစဉ်များကို Power Point ဖြင့် အသေးစိတ်ရှင်းလင်းတင်ပြသည်။

 ထို့နောက် တိုင်းဒေသကြီးလွှတ်တော် ဥက္ကဋ္ဌ၊ ဒုတိယ ဥက္ကဋ္ဌ၊ တိုင်းဒေသကြီး ဝန်ကြီးများ၊ တာဝန်ရှိသူများသည် အမှတ်တရ စုပေါင်းမှတ်တမ်းတင် ဓာတ်ပုံ ရိုက်ကြပြီး Contact Center အတွင်း လုပ်ငန်းဆောင်ရွက်နေမှုများ၊ ဆက်သွယ်မေးမြန်းမှုများကို လှည့်လည်ကြည့်ရှုအားပေးကြသည်။