၂၀၁၇ ခုနှစ်၊ မတ်လ ၁၉ ရက်

 မန္တလေးတိုင်းဒေသကြီး၊ မြင်းခြံခရိုင်၊ ငါန်းဇွန်မြို့နယ် ဥပဒေရုံး အဆောက်အအုံသစ်ဖွင့်ပွဲကို မတ် ၁၉ ရက် မွန်းလွဲ ၁ နာရီက ကျင်းပရာ တိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာ ဇော်မြင့်မောင် တက်ရောက် အားပေးချီးမြှင့်သည်။

 ဖွင့်ပွဲအခမ်းအနားသို့ မန္တလေးတိုင်းဒေသကြီးအဆင့် အဖွဲ့အစည်းဝင်များ၊ ခရိုင်၊ မြို့နယ်အဆင့် ဌာနဆိုင်ရာများမှ တာဝန်ရှိသူများနှင့် ဖိတ်ကြားထားသူများ တက်ရောက်ကြသည်။

 ရှေးဦးစွာ ဥပဒေရုံးအဆောက်အအုံသစ်အား တိုင်းဒေသကြီးဝန်ကြီးချုပ် ဒေါက်တာ ဇော်မြင့်မောင်၊ တိုင်းဒေသကြီးလွှတ်တော်ဥက္ကဋ္ဌ ဦးအောင်ကျော်ဦး၊ တိုင်းဒေသကြီး ဥပဒေချုပ် ဦးအောင်ဝင်း၊ တိုင်းဒေသကြီး လွှတ်တော်ကိုယ်စားလှယ်များဖြစ်ကြသော ဦးကျော်စိုးနိုင်နှင့် ဒေါ်သဲစုဝေတို့က ဖဲကြိုးဖြတ်ဖွင့်လှစ်ကြသည်။

 ဆက်လက်၍ အဆောက်အအုံသစ် ဆိုင်းဘုတ်ကို တိုင်းဒေသကြီးဝန်ကြီးချုပ်နှင့် တာဝန်ရှိသူများက အမွှေးနံ့သာရည်များ ပက်ဖျန်းကြပြီး စုပေါင်းမှတ်တမ်းတင်ဓာတ်ပုံ ရိုက်ကူးကြသည်။

 ယင်းနောက် တိုင်းဒေသကြီး ဥပဒေအရာရှိက ရုံးသစ်ဖွင့်လှစ်နိုင်ခြင်းအတွက် ကျေးဇူးတင်စကားပြောကြားပြီး မြင်းခြံခရိုင်ဥပဒေအရာရှိက ဥပဒေရုံးဆောက်လုပ်ခြင်းနှင့်စပ်လျဉ်း၍ ရှင်းလင်းတင်ပြသည်။

 ထို့နောက် မြစ်ကြီးငါးသွယ်ကုမ္ပဏီက ငါန်းဇွန်မြို့နယ် ဥပဒေရုံးနှင့်ပတ်သက်သည့် စာရွက်စာတမ်းများကို တိုင်းဒေသကြီး ဥပဒေအရာရှိထံ လွှဲပြောင်းပေးအပ်ကာ အဆောက်အအုံသစ်ဖွင့်ပွဲ အထိမ်းအမှတ်အလံများ ပေးအပ်ခဲ့ပြီး တိုင်းဒေသကြီးဝန်ကြီးချုပ်နှင့် တာဝန်ရှိသူများက အဆောက်အအုံအတွင်း လှည့်လည်ကြည့်ရှုကြသည်။

 အဆိုပါ ငါန်းဇွန်မြို့နယ် ဥပဒေရုံး အဆောက်အအုံသစ်သည် အလျားပေ ၄၀၊ အနံ ၂၈ ပေ၊ အမြင့် ၁၂ ပေရှိ RC တစ်ထပ်အဆောက်အအုံဖြစ်ပြီး မြစ်ကြီးငါးသွယ်ကုမ္ပဏီက တာဝန်ယူ ဆောက်လုပ်ခဲ့သည်။