၂၀၁၇ခုနှစ်၊ ဇူလိုင်လ ၁၈ ရက်

 မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ်ဒေါက်တာဇော်မြင့်မောင်သည် တိုင်းဒေသကြီးအစိုးရအဖွဲ့ဝင်ဝန်ကြီးများဖြစ်ကြသည့် ဗိုလ်မှူးကြီး ကျော်ကျော်မင်း၊ ဒေါက်တာစိုးသန်း၊ ဦးဇာနည်အောင်နှင့်သက်ဆိုင်ရာတာဝန်ရှိသူများနှင့်အတူ ယနေ့ညနေ ၄နာရီက အမရပူရမြို့နယ်၊ တောင်သမန် ကန်ပတ်လမ်း (တောင်သမန်တံတားအဝင်လမ်း) တစ်လျှောက်ဝဲ/ယာတို့ရှိ အနိမ့်ပိုင်းရပ်ကွက်များတွင်ရေဝင်ရောက်ရှိမှုအခြေအနေ၊ တောင်သမန် ကန်ပတ်လမ်းတစ်လျှောက်ရှိ မြေထိန်းနံရံများ အခြေအနေတို့နှင် မြေကျွံနေရာများ၊ ကြွက်တွင်းများအတွင်းရေဝင်ရောက်တိုက်စားမှုမှတစ်ဆင့် အနိမ့်ပိုင်း နေရာများသို့ ဝင်ရောက်မှုမရှိစေရေးအတွက် စက်ယန္တယားကြီးများဖြင့် ပြုပြင်ဆောင်ရွက်နေမှုများကို သွားရောက်ကြည့်ရှု့စစ်ဆေးသည်။

 ဝန်ကြီးချုပ်နှင့်အဖွဲ့သည်တောင်သမန်ကန်ပတ်လမ်း(တောင်သမန်တံတားအဝင်လမ်း) ဘေးရှိ ရွှေပန်းတုတ်ရပ်ကွက်သို့ရောက်ရှိပြီး အဆိုပါရပ်ကွက် အတွင်း ရေဝင်ရောက်ရှိမှုအခြေအနေနှင့် အိမ်ထောင်စုဝင်များ အခြေအနေကိုလည်းကောင်း၊ တောင်သမန်လမ်းမြေထိန်းနံရံများနှင့် လမ်းရေကျော်မှု မဖြစ်စေနိုင်ရေးအတွက် လိုအပ်သည့်နေရာများတွင် သဲအိတ်များချထားမှု အခြေအနေများကိုလည်းကောင်း၊ တောင်သမန်အင်းအတွင်း ဧရာဝတီမြစ်ရေ စတင်ဝင်ရောက်လာမှုများကြောင့် ဦးပိန်တံတားအခြေအနေနှင့်ရေပြင်အခြေအနေများကိုကြည့်ရှု့စစ်ဆေးပြီး ဝန်ကြီးချုပ်က ရေကြီးရေလျှံမှု ဖြစ်ပေါ်လာ ပါက ကြိုတင်ပြင်ဆင်ဆောင်ရွက်ထားရန်လုပ်ငန်းအစီအမံများ၊        ဌာနဆိုင်ရာများနှင့် လူမှုရေးအဖွဲ့အစည်းများ၊ပြည်သူများ ပူးပေါင်း ဆောင်ရွက်သွားရေး၊ မြို့နယ်များအလိုက် သဲအိတ်များပြုလုပ်ဆောင်ရွက်ထားရှိရေး၊လိုအပ်သည့်အနိမ့်ပိုင်း နေရာ များတွင် သဲအိတ်များချထားသွားရန် နှင့်အချိန်နှင့်တစ်ပြေညီ ရေဘေးအန္တရယ်သိရှိနိုင်ရန် အတွက် ရေကင်းများချထားနိုင်ရေးအတွက် သက်ဆိုင်ရာဌာနတို့မှတာဝန်ရှိသူများနှင့်အတူ ပေါင်းစပ်ညှိနှိုင်းဆောင်ရွက်ပေးသည်။

 ဆက်လက်၍ ဝန်ကြီးချုပ်နှင့်အဖွဲ့သည်တောင်သမန်အဝင်လမ်း(မဟာဂန္ဓာရုံ ကျောင်းတိုက်အရှေ့မြောက်ဖက်)နေရာတွင် မြေကျွံတွင်းများ၊ ကြွက်တွင်း များမှတစ်ဆင့် ရေဝင်ရောက်လှိုက်တိုက်စား၍အနိမ့်ပိုင်းနေရာများသို့အင်းရေဝင်ရောက်နိုင်သည့် အတွက်စက်ယန္တရား အင်အား၊လူအင်အားတို့ဖြင့် မြို့တော်စည်ပင်သာယာရေးကော်မတီမှ ကန်ပတ်လမ်းအားပြုပြင်ဆောင်ရွက်နေမှုများကို လိုက်လံကြည့်ရှု့စစ်ဆေးရာသက်ဆိုင်ရာမြို့နယ်အုပ်ချုပ်ရေးမှူး များ ကလုပ်ငန်းဆောင်ရွက်နေမှုများနှင့် ဧရာဝတီမြစ် ရေတဖြည်းဖြည်း ဝင်ရောက်မှုကြောင့် အင်းရေပြင်နှင့် ဦးပိန်တံတား အကြားခြောက်ပေ ခန့်ထိ ရောက်ရှိနေမှု၊ ရေပြည့်ရေလျှံမှုမဖြစ်စေရေး အတွက်ကြိုတင် ကာကွယ်ထား ရှိမှုလုပ်ငန်းအစီအမံများကို လိုက်ပါရှင်း လင်ပြသကြ သည်။

 ၂၀၁၇ခုနှစ်၊ဇူလိုင်လ ဒုတိယပတ်မှစတင်ကာ မြန်မာပြည်အထက်ပိုင်းရှိ တိုင်းဒေသကြီးနှင့်ပြည်နယ်များ၊မန္တလေးတိုင်းဒေသကြီးတို့တွင် နေရာစိပ်စိပ် မိုးအဆက် မပြတ်ရွာသွန်းမှုများကြောင့် ဧရာဝတီမြစ်ရေသည်လည်း တဖြည်းဖြည်းမြင့်တက်နေကာ ဧရာဝတီမြစ်ကမ်း၊မန္တလေးမြို့ပတ်ကမ်းနားလမ်း တစ်လျှောက်နှင့် တာဘောင်များ ရေစိမ့်ဝင်နိုင်သည့်အနိမ့်ပိုင်းရပ်ကွက်နေရာများတွင်သဲအိတ်များချထားနိုင်ရေးနှင့် မြို့နယ်များအလိုက် သဲအိတ်များ ပြုလုပ်စုဆောင်းထားရှိခြင်းများနှင့်အတူရေကင်းများ ထားရှိကာ အချိန်နှင့်တစ်ပြေညီသိရှိနိုင်ရန်အတွက် သက်ဆိုင်ရာတာဝန်ရှိသူများ ပူးပေါင်းအဖွဲ့တို့က စောင့်ကြည့်လျှက်ရှိကြောင်း သိရသည်။