၂၀၁၇ခုနှစ် နိုဝင်ဘာလ ၁၁ရက်

မန္တလေးတိုင်းဒေသကြီး၊ အမျိုးသမီးရေးရာကော်မတီက ကြီးမှူးကျင်းပသည့် ငြိမ်းချမ်းရေးလှုပ်ရှားမှု ရက်သတ္တပတ် အမျိုးသမီးအခွင့်အရေးနှင့် ငြိမ်းချမ်းရေးစကားဝိုင်းဆွေးနွေးပွဲကို နိုဝင်ဘာ ၁၁ ရက် နံနက် ၉နာရီက ချမ်းအေးသာစံမြို့နယ် ရတနာပုံစူပါစင်တာ စတုတ္ထထပ်ရှိ မန္တလေးတိုင်းဒေသကြီး ကုန်သည်ကြီးများနှင့် စက်မှုလက်မှုလုပ်ငန်းရှင်များအသင်းခန်းမ၌ ကျင်းပရာ မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင် တက်ရောက်အားပေးခဲ့သည်။

 အဆိုပါ စကားဝိုင်းဆွေးနွေးပွဲတွင် ဆရာမ မသီတာ(စမ်းချောင်း)၊ ဒေါ်ခင်မမမျိုး၊ ဦးသိန်းသန်းဦး၊ ဦးမင်း ကိုနိုင်၊ တို့က ဦးဆောင်ပါဝင်ဆွေးနွေးကြပြီး အစီအစဉ်တင်ဆက်သူနှင့် Moderator အဖြစ် စာရေးဆရာ သင့်နော်က ဆောင်ရွက်ခဲ့သည်။

 ဆွေးနွေးပွဲသို့ ဝန်ကြီးချုပ်၏ ဇနီး မန္တလေးတိုင်းဒေသကြီး အမျိုးသမီးရေးရာကော်မတီ နာကယ ဒေါက်တာယုယုမေနှင့် တိုင်းဒေသကြီး လွှတ်တော်ဒုတိယဥက္ကဋ္ဌ၊ အစိုးရအဖွဲ့ဝင်ဝန်ကြီးများနှင့် ၎င်းတို့၏ ဇနီးများ၊ လွှတ်တော်ကိုယ်စားလှယ်များ၊ ဌာနဆိုင်ရာတာဝန်ရှိသူများ၊ မန္တလေးတိုင်းဒေသကြီး အမျိုးသမီးရေးရာ ကော်မတီမှ တာဝန်ရှိသူများ၊ စာပေပညာရှင်များ၊ တိုင်းရင်းသား လူမျိုးများ၊ ကျောင်းသား ကျောင်းသူများ၊ အမျိုး သမီးအခွင့်အရေးဆိုင်ရာ စိတ်ဝင်စားသူများ၊ တက်ကြွသူများ၊ လူမှုရေးအဖွဲ့အစည်းများနှင့် ဖိတ်ကြားထားသူများ၊ ငြိမ်းချမ်းရေး မြတ်နိုးသူများနှင့် လေ့လာသူများ တက်ရောက်ခဲ့ကြသည်။

 စကားဝိုင်းဖွဲ့ဆွေးနွေးမှုမစတင်မီ ဆရာသင့်နော်က ဆွေးနွေးကြမည့် ပုဂ္ဂိုလ်အသီးသီး၏ ကိုယ်ရေး အကျဉ်းနှင့် အတွေ့အကြုံများကို တင်ပြ ရှင်းလင်းပြီးနောက် ဦးဆောင်ဆွေးနွေးကြမည့် ပုဂ္ဂိုလ်တစ်ဦးချင်းစီက အမျိုးသမီးထုအခွင့်အရေးရှိမရှိ၊ အမျိုးသမီးအခွင့်အရေးနှင့် ဖိနိပ်ခံရနိုင်မှု အသွင်များ၊ နိုင်ငံရေး၊ဘာသာရေး၊ ကိုးကွယ်ယုံကြည့်မှုနှင့်လူတန်းစားအသီးသီးနှင့် အမျိုးသမီးထုအခွင့်အရေးဆိုင်ရာများ၊ အိမ်ထောင်ရေးနှင့် အမျိုးသမီးထုအခွင့်အရေး၊ လိင်ခွဲခြားဆက်ဆံခံရမှု၊ အကြမ်းဖက်ခံရမှု၊ ခွဲခြားဆက်ဆံခံရမှု၊ လူကုန်ကူးခံရမှုဆိုင် ရာကိစ္စရပ်များ၊ ဥပဒေအရ ကာကွယ်ပေးရမည့်ကိစ္စရပ်များ၊ တိုးတက်လာသော ခေတ်နှင့် အံဝင်မှုမရှိသော အစဉ်အလာ ဓလေ့စရိုက်အချို့မှ အမျိုးသမီးထု အခွင့်အရေးထိခိုက်မှုများ၊ တန်းတူညီမျှမှုနှင့် မျှတမှု မတူညီ ချက်များ၊ ပြင်ဆင်သင့်သည့် ဥပဒေများ၊ စစ်မက်ဖြစ်ပွားရာဒေသများမှ အမျိုးသမီးထု အခွင့်အရေးဆိုင်ရာများ၊ နစ်နာမှုများ၊ စစ်ပွဲများဖြစ်ပွားခြင်းနှင့် ငြိမ်းချမ်းရေးဆိုင်ရာများ၊ မီဒီယာကဏ္ဍနှင့် အမျိုးသမီးထုအခွင့်အရေး၊ သတင်း မီဒီယာတန်ဘိုး၊ သတင်းထောက်နှင့် စာရေးဆရာ ကွဲပြားပုံ၊ စာနယ်ဇင်းသမားအတုအယောင်နှင့် ၀ါဒဖြန့်ချိမှုဆိုင်ရာများ၊ တိုင်းရင်းသားတို့၏ အခွင့် အရေးနှင့် လွတ်လပ်မျှတမှုဆိုင်ရာများ၊ ငြိမ်းချမ်းရေးကို လိုလားသောစိတ်မှ အစပြု၍ လက်တွေ့ကျင့်သုံးပါဝင်ဆောင်ရွက်ရမှုများ၊ တိုင်းရင်းသား အားလုံးငြိမ်းချမ်းစွာ အတူယှဉ်တွဲနေထိုင်ရေး၊ နိုင်ငံရေးဆိုင်ရာကိစ္စရပ်များနှင့်ငြိမ်းချမ်းရေးရရှိစေရန် အားလုံးလက်တွဲဆောင်ရွက်ရေးဆိုင်ရာ အကြောင်းအရာများကို မိမိတို့နှင့်သက်ဆိုင်ရာကဏ္ဍအလိုက် အမေးအဖြေပုံစံများ၊ စကားဝိုင်းဖွဲ့ဆွေးနွေးမှုများဖြင့် ဆွေးနွေးခဲ့ကြပြီး တက်ရောက် လာကြသူများ၏ မေးမြန်းချက်များကိုလည်း ပြန်လည်ဖြေကြား ခဲ့ကြသည်။

 ဆွေးနွေးပွဲအပြီးတွင် ဦးဆောင်ဆွေးနွေးပေးကြသော ပုဂ္ဂိုလ်များအား တိုင်းဒေသကြီးအမျိုးသမီးရေးရာကော်မတီမှ တာဝန်ရှိသူက အမှတ်တရ ဂုဏ်ပြုလက်ဆောင်နှင့် ကျေးဇူးတင်ဝမ်းမြောက်စကားကို ပြောကြားသည်။

 မန္တလေးတိုင်းဒေသကြီး၊ အမျိုးသမီးရေးရာကော်မတီက ကြီးမှူးကျင်းပသည့် ငြိမ်းချမ်းရေး ရက်သတ္တပတ်လှုပ်ရှားမှု အခမ်းအနားများကို နိုဝင်ဘာ ၆ ရက်မှစတင်ကျင်းပလျက်ရှိပြီး အခမ်းအနား နောက်ဆုံးရက်ဖြစ်သော နိုဝင်ဘာ ၁၂ ရက် ညနေ ၆နာရီတွင် မန္တလေးမြို့ ၆၂လမ်းရှိ မနော်ရမ္မံ လူထုဟစ်တိုင်ကွင်း၌ ငြိမ်းချမ်းရေး ဂီတပဒေသာကပွဲကို ဖြင့်ဖျော်ဖြေမှုများကိုဆက်လက် ကျင်းပသွားမည်ဖြစ်သည်။