၂၀၁၇ ခုနှစ်၊ နိုဝင်ဘာ ၁၄  ရက်

 ပြည်ထောင်စုလွှတ်တော် ဒေသဆိုင်ရာဖွံ့ဖြိုးရေးရံပုံငွေနှင့် ပြည်သူလူထုမှ လှူဒါန်းငွေတို့ဖြင့် ပြုလုပ်သော ရေမြောင်း၊ ကွန်ကရစ်လမ်းနှင့် တံတားဖွင့်ပွဲ အခမ်းအနားကို နိုဝင်ဘာ ၁၃ ရက် နံနက် ၉ နာရီက ချမ်းအေးသာစံမြို့နယ်၊ စိတ္တမဟီရပ်ကွက်၊ သုံးဆယ်ဝင်းတွင် ပြုလုပ်ရာ မန္တလေးတိုင်းဒေသကြီး အစိုးရအဖွဲ့ ဝန်ကြီးချုပ် ဒေါက်တာ ဇော်မြင့်မောင် တက်ရောက်ပြီး အဖွင့်အမှာစကားပြောကြားသည်။

 “ကျွန်တော်တို့အစိုးရဟာ ပြည်သူက စီမံခန့်ခွဲဖို့ တာဝန်ပေးလို့ ရောက်လာတဲ့အချိန်ကစလို့ ဦးတည်ချက်တွေ၊ လုပ်ဆောင်ချက်တွေ ရှိပါတယ်၊ ဦးတည်ချက်ကတော့ ငြိမ်းချမ်းရေးရဖို့ပါပဲ၊ ငြိမ်းချမ်းရေးရှိမှ တရားဥပဒေစိုးမိုးရေးနဲ့ တည်ငြိမ်အေးချမ်းရေးကို ဖြစ်နိုင်မှာပါ၊ ဒါတွေရှိမှ ကျွန်တော်တို့ တည်ဆောက်ချင်တဲ့ ဖက်ဒရယ် ဒီမိုကရေစီပြည်ထောင်စုကြီးကို တည်ဆောက်လို့ရမှာပါ၊ ဖက်ဒရယ်ဒီမိုကရေစီ တည်ဆောက်မှ ပြည်နယ်နှင့် တိုင်းဒေသကြီးအသီးသီးတို့မှာ ကျန်းမာရေး၊ ပညာရေး၊ လူမှုရေး၊ စီးပွားရေး ကွာဟချက်တွေ ကျဉ်းမြောင်းသွားမှာပါ၊ ဒါမှလည်း တိုင်းပြည် ဖွံ့ဖြိုးတိုးတက်မှာပါ၊ ငြိမ်းချမ်းရေးတစ်ခုထဲ လုပ်နေတာလားဆိုတော့ မဟုတ်ပါဘူး၊ ပြည်သူလူထု အကျိုးအတွက်ဆိုရင် တိုင်းပြည်ပြန်လည်ထူထောင်ရေးအတွက် ကြိုးစားလုပ်ဆောင်နေပါတယ်၊ မန္တလေးတိုင်းဒေသကြီးအတွင်းမှာ တိုင်းဒေသကြီးကရတဲ့ ဘတ်ဂျက်ထဲကနေ အဓိက ဆောင်ရွက်နေတာကတော့ ဆင်ရဲမွဲတေမှု လျှော့ချရေးနဲ့ ကျေးလက်ဒေသဖွံ့ဖြိုးတိုးတက်ရေးအတွက် အဓိကထား လုပ်ဆောင်နေပါတယ်၊ မန္တလေးတိုင်းဒေသကြီးအတွင်းမှာရှိတဲ့ မြို့နယ်အချို့၊ ကျေးရွာအချို့တွေမှာ လမ်းတွေမရှိဘူး၊ စာသင်ကျောင်းတွေနည်းနေတယ်၊ လျှပ်စစ်မီးတွေ မရရှိကြသေးဘူး၊ ကျန်းမာရေး ဆေးပေးခန်းတွေ နည်းနေပါသေးတယ်၊ ဒါကြောင့်လည်း ကျေးလက်ဒေသဖွံ့ဖြိုးတိုးတက်ရေးအတွက် အလေးထားလုပ်ကိုင် ဆောင်ရွက်နေခြင်းကြောင့်လည်း ကျေးလက်ဒေသ မိဘပြည်သူတွေကလည်း ကျေးဇူးတင်နေကြတာပါ”ဟု ဝန်ကြီးချုပ်က ယင်းဖွင့်ပွဲတွင် အမှာစကားပြောကြားရာ၌ ထည့်သွင်းပြောကြားခဲ့သည်။

 ချမ်းအေးသာစံမြို့နယ်၊ သုံးဆယ်ဝင်းရပ်ကွက်အတွင်းရှိ ရေမြောင်း၊ ကွန်ကရစ်လမ်းနှင့် တံတားတို့ကို ဝန်ကြီးချုပ်နှင့် အစိုးရအဖွဲ့ဝင် ဝန်ကြီးများ၊ ချမ်းအေးသာစံမြို့နယ်၊ ပြည်သူ့လွှတ်တော်ကိုယ်စားလှယ် ဦးမျိုးနိုင်၊ တိုင်းဒေသကြီးလွှတ်တော်ကိုယ်စားလှယ် ဦးအောင်ရွှေနှင့် တာဝန်ရှိသူတို့က ဖဲကြိုးဖြတ် ဖွင့်လှစ်ပေးခဲ့ကြသည်။

 “မြို့ပေါ်တွေမှာတော့ မြို့နယ်ဖွံ့ဖြိုးတိုးတက်ရေးအတွက် မြို့နယ်များအလိုက် သတ်မှတ်ရန်ပုံငွေများ ရရှိကြပါတယ်၊ ပြည်သူ့လွှတ်တော်ကရတဲ့ ငွေများကိုလည်း သက်ဆိုင်ရာ ပြည်သူ့လွှတ်တော်ကိုယ်စားလှယ်တွေက ဖွံ့ဖြိုးရေးအတွက် စီမံဆောင်ရွက်လုပ်ကိုင်နေပါတယ်၊ ပြည်သူတွေကလည်း ကျေနပ်ကြပါတယ်၊ ဒီလိုရပ်ကွက်အတွက် လုပ်ပေးတာဟာ ရပ်ကွက်သန့်ရှင်းသပ်ရပ်မှုကို ဖြစ်စေပါတယ်၊ ကျန်းမာရေးနဲ့ ညီညွတ်အောင် လုပ်ဆောင်ပေးခြင်းလည်း ဖြစ်တယ်၊ နောက်ဆုံးတော့ ငြိမ်းချမ်းရေးပါဘဲ၊ ငြိမ်းချမ်းရေးအတွက် မိဘပြည်သူများကလည်း ကိုယ်တတ်နိုင်တဲ့ ဘက်က ဝိုင်းဝန်းပူးပေါင်းဆောင်ရွက်ပေးကြရမှာပါ”ဟု ဝန်ကြီးချုပ် ဒေါက်တာ ဇော်မြင့်မောင်က ထပ်လောင်းပြောကြားသည်။

 ရပ်ကွက်ဖွံ့ဖြိုးတိုးတက်ရေးအတွက် ဆောင်ရွက်ရာတွင် ရပ်ကွက်ပြည်သူများအတွက် အမှန်တကယ် လိုအပ်သည့် လုပ်ငန်းများ ဖြစ်ရမှာ ဖြစ်ကြောင်း၊ စီမံခန့်ခွဲမှု တတ်တဲ့ အလေ့အထဖြစ်အောင် ဆောင်ရွက်ရမှာဖြစ်ပြီး ရေရှည်တည်တံ့အောင် ဆောင်ရွက်ရမည်ဖြစ်သည့်အပြင် စုပေါင်းဆောင်ရွက်မှုတွေလည်း ရှိကြရမှာဖြစ်သည်။

 “ချမ်းအေးသာစံမြို့နယ်မှာ ရပ်ကွက်ကြီး(၂၀)ရှိတဲ့အနက် မြို့နယ်ဖွံ့ဖြိုးတိုးတက်ရေးအတွက် ပြည်ထောင်စုလွှတ်တော် ဒေသဆိုင်ရာဖွံ့ဖြိုးရေးရန်ပုံငွေ သိန်းတစ်ထောင်ထဲကမှ တစ်ရပ်ကွက်ကို ငွေကျပ်သိန်း(၅၀)စီ အညီအမျှ ခွဲဝေပြီးတော့ ပြည်သူများရဲ့ ထည့်ဝင်လှူဒါန်းမှုတွေနဲ့အတူ ရပ်ကွက်ဖွံ့ဖြိုးတိုးတက်ရေးလုပ်ငန်းတွေကို လုပ်ဆောင်နေတာပါ။ ယနေ့ဆောင်ရွက်ပြီးစီးခဲ့တဲ့ စိတ္တမဟီရပ်ကွက်ဖွံ့ဖြိုးရေးလုပ်ငန်းဟာ ပြည်ထောင်စုလွှတ်တော်ရန်ပုံငွေမှ ဒုတိယအကြိမ်ဆောင်ရွက်နိုင်ခဲ့တဲ့လုပ်ငန်းဖြစ်ပါတယ်”ဟု ချမ်းအေးသာစံမြို့နယ်မှ ပြည်သူ့လွှတ်တော် ကိုယ်စားလှယ် ဦးမျိုးနိုင်က ယင်းရပ်ကွက်အတွင်း ဖွံ့ဖြိုးတိုးတက်ရေးအတွက် ဆောင်ရွက်ခဲ့မှုအခြေအနေများနှင့်ပါတ်သက်၍ ရှင်းလင်းပြောကြားစဉ် ထည့်သွင်းပြောပြသည်။

  စိတ္တမဟီရပ်ကွက်  ပြည်သူတစ်ဦးဖြစ်သူ ဦးလှငွေက ယခင်ဆောင်ရွက်ခြင်းမပြုမီ  ကြုံတွေ့ဖြတ်သန်းခဲ့သော အခြေအနေကို ရှင်းလင်းပြောကြားပြီးနောက် ယခုဆောင်ရွက်ပြီး အချိန်နှင့်ပတ်သက်၍လည်း ကျေးဇူးတင်စကား ပြန်လည်ပြောကြားခဲ့ပြီး ဖွင့်ပွဲကို ရုပ်သိမ်းလိုက်သည်။

 ထို့နောက် တိုင်းဒေသကြီးဝန်ကြီးချုပ်၊ တိုင်းဒေသကြီးလွှတ်တော် ဒုတိယဥက္ကဋ္ဌ ဒေါက်တာ ခင်မောင်ဋ္ဌေး၊ တိုင်းဒေသကြီးအစိုးရအဖွဲ့ဝင် ဝန်ကြီး ဒေါက်တာ စိုးသန်း၊ တိုင်းဒေသကြီးဥပဒေချုပ် ဦးအောင်ဝင်းနှင့် လွှတ်တော်အသီးသီးတို့မှ ကိုယ်စားလှယ်များ၊ တက်ရောက်လာကြသူများသည် ဆောင်ရွက်ပြီးစီးခဲ့သည့် ကွန်ကရစ်လမ်း၊ အမိုးပိတ် ရေနှုတ်မြောင်းကူးတံတား၊ လမ်းဝဲ၊ ယာရှိရေမြောင်းများကို လိုက်လံကြည့်ရှုခဲ့ကြသည်။