၂၀၁၈ ခုနှစ်၊ ဇူလိုင်လ ၁၀ ရက်

 အသက်မွေးဝမ်းကျောင်းပညာ တစ်ခုဖြစ်သည့် စက်ချုပ်ပညာသည် အမျိုးသမီးများအတွက် ဝင်ငွေကောင်းသည့်အလုပ်တစ်ခုဖြစ်သည်နှင့်အညီ စိတ်ရောကိုယ်ပါ သင်ယူကြပြီး ခေတ်နှင့်လျော်ညီစွာ တီထွင်ဖန်တီးမှုများဖြင့် ဆောင်ရွက်ကြပါက ဒီဇိုင်းပညာရှင်များ၊ စက်ချုပ်ဆိုင်ပိုင်ရှင်များ၊ ကိုယ်ပိုင်လုပ်ငန်းရှင်များ ဖြစ်လာနိုင်မည်ဖြစ်ကြောင်း၊ မြန်မာမှုချည်ထည်များကို အသွင်ဆန်းသစ်စွာဖြင့် ဖန်တီးနိုင်မည်ဆိုပါကလည်း နိုင်ငံခြားဝင်ငွေသာမက နိုင်ငံတော်၏ ဘဏ္ဍာငွေများကို တစ်ဖက်တစ်လမ်းက ကူညီထိန်းသိမ်းရာရောက်နိုင်မည်ဖြစ်ကြောင်း ဇူလိုင် ၁၀ ရက် နံနက် ၉ နာရီက သမဝါယမကောလိပ်(မန္တလေး)တွင် ဖွင့်လှစ်သည့် တတိယအကြိမ်မြောက် စက်ချုပ်သင်တန်းတွင် မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ်၏ဇနီး အမျိုးသမီးကော်မတီနာယက ဒေါက်တာ ယုယုမေက ပြောသည်။

 သင်တန်းဖွင့်ပွဲသို့ မန္တလေးတိုင်းဒေသကြီး ဒုတိယလွှတ်တော်ဥက္ကဋ္ဌ ဒေါက်တာ ခင်မောင်ဌေး၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဝန်ကြီး ဒေါက်တာ စိုးသန်း၊ တိုင်းဒေသကြီးအမျိုးသမီးကော်မတီနာယကများနှင့် အဖွဲ့ဝင်များ၊ သမဝါယမကောလိပ်(မန္တလေး)ကျောင်းအုပ်ကြီး ဒေါက်တာ တင်မူအေးနှင့် ဆရာ၊ ဆရာမများ၊ သင်တန်းနည်းပြများနှင့် သင်တန်းသူများ တက်ရောက်ကြသည်။

 ယခုလို သင်တန်းတွေ စီစဉ်ပေးနေချိန်တွင် ကြိုးစားပြီး တက်ရောက်သင့်ကြောင်း၊ အတန်းပညာအတွက် ဘွဲ့လက်မှတ်ရရှိကြမှာဖြစ်သလို အပိုဆောင်းအနေဖြင့် အသက်မွေးဝမ်းကျောင်းပညာများကိုပါ ယခုအချိန်ကတည်းက တတ်ကျွမ်းထားပါက ဘဝတက်လမ်းများအတွက် များစွာ အထောက်အကူဖြစ်နိုင်မည်ဖြစ်ကြောင်း၊ သင်တန်းစီစဉ်ပေးသူများနှင့် သင်တန်း သင်ကြားပေးသူများ၊ တက်ရောက်ကြသူများအား ကျေးဇူးတင်ရှိပါကြောင်းဖြင့် အမျိုးသမီးကော်မတီနာယက ဒေါက်တာ ယုယုမေက ဆက်လက်ပြောကြာသည်။

 ယခင် ကုန်ကျစရိတ်နည်းပါးသည့် သင်တန်းများဖြစ်သည့် စားသောက်ကုန်၊ အလှကုန်၊ ဇာထိုး၊ ပန်းထိုးသင်တန်းများကိုသာ ဖွင့်လှစ်နိုင်ခဲ့ကြောင်း၊ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနနှင့် ကျေးလက်ဒေသဖွံ့ဖြိုးတိုးတက်ရေးဦးစီးဌာနတို့ ပူးပေါင်းကာ ကျောင်းပြင်ပအားလပ်ချိန်အတွက် လူငယ်များ အချိန်ကို အကျိုးရှိစွာ အသုံးချတတ်စေရန် စက်ချုပ်သင်တန်းသည် တတိယအကြိမ်မြောက် ဖွင့်လှစ်နိုင်ခဲ့ခြင်းဖြစ်ပြီး ဒုတိယအကြိမ်သင်တန်းသည် တနင်္လာမှ သောကြာနေ့အထိ ကျောင်းပြင်ပသင်ကြားနေပြီး ယခု တတိယအကြိမ်သင်တန်းတွင် စနေ၊ တနင်္ဂနွေ သင်ကြားပေးသွားမည်ဖြစ်ကြောင်း၊ အမျိုးသမီးကော်မတီဝင်များနှင့် သမဝါယမကောလိပ်(မန္တလေး)မှ သင်တန်းသူများ စုစုပေါင်း ၆၂ ဦး တက်ရောက်သင်ကြားနေကြာင်း ကျောင်းအုပ်ဆရာမကြီး ဒေါ်တင်မူအေးက ပြောသည်။

 အသက်မွေးဝမ်းကျောင်း အထောက်အကူပြု စက်ချုပ်သင်တန်းသည် အဆိုပါ ကောလိပ်၏ ထုတ်ကုန်များကို အကူအညီပေးနိုင်နေပြီဖြစ်သလို သင်တန်းဆင်းကျောင်းသူများမှာ မိမိတို့၏ ကျောင်းစရိတ်အတွက်ပင် အထောက်အပံ့များ ရရှိနေကြပြီဖြစ်သည်။