၂၀၁၈ခုနှစ်၊ စက်တင်ဘာလ ၁၃ ရက်

 “လူကုန်ကူးမှုပပျောက်ရေး ပြည်သူအားလုံးပါဝင်ပေး’’ဟူသော ဆောင်ပုဒ်ဖြင့် ဆောင်ရွက်လျက်ရှိသော ဆဌမအကြိမ်မြောက် မြန်မာနိုင်ငံ လူကုန်ကူးမှုတိုက်ဖျက်ရေးနေ့အခမ်းအနားကို စက်တင်ဘာလ ၁၃ ရက်နေ့တွင် မန္တလေးမြို့တော်ခန်းမ၌ကျင်းပရာ တိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာဇော်မြင့်မောင် တက်ရောက်အမှာစကားပြောကြားသည်။

 ဆဌမအကြိမ်မြောက်မြန်မာနိုင်ငံ လူကုန်ကူးမှုတိုက်ဖျက်ရေးနေ့အခမ်းအနားတွင် တိုင်းဒေသကြီးအစိုးရအဖွဲ့ ဝန်ကြီးချုပ်ဒေါက်တာဇော်မြင့်မောင် အမှာစကားပြောကြားရာတွင် “ ကမ္ဘာတစ်ဝန်းတွင် နှစ်စဉ်(၂၁)သန်းသော လူများသည် အဓမ္မခိုင်းစေခံနေရသည်ဟု အပြည်ပြည်ဆိုင်ရာ အလုပ်သမားအဖွဲ့(ILO)က ခန့်မှန်းထားပါကြောင်း၊ ကုလသမဂ္ဂ မူးယစ်ဆေးဝါးနဲ့ ပြစ်မှုဆိုင်ရာ တရားရုံးရဲ့ ၂၀၁၆ ခုနှစ် ထုတ်ပြန်ချက်တွင် ကမ္ဘာအနှံ့အပြားဖြစ်ပွားသည့် လူကုန်ကူးမှုများမှ နှစ်စဉ် အမေရိကန်ဒေါ်လာ ၁၅၀ ဘီလီယံ အမြတ်အစွန်းရရှိနေကြောင်း၊ ၂၀၁၈ ခုနှစ်၊ ဇူလိုင် ၁၉ ရက်တွင် အမေရိကန်နိုင်ငံမှ ထုတ်ပြန်သည့် ကမ္ဘာ့နိုင်ငံပေါင်း ၁၆၇ နိုင်ငံအပေါ် သုံးသပ်ထားသည့် ကမ္ဘာလုံးဆိုင်ရာ အစီရင်ခံစာအရ မြန်မာနိုင်ငံသည် နံပါတ် ၁၈ တွင် ရှိနေကြောင်း’’  ပြောကြားသည်။

 ဆက်လက်ပြီး တိုင်းဒေသကြီး ဝန်ကြီးချုပ်က “ မြန်မာနိုင်ငံရဲ့ လူကုန်ကူးမှုပြဿနာတွေကို ကြည့်မယ်ဆိုရင် အိမ်နီးချင်းနိုင်ငံတွေ အပါအဝင် ဒေသတွင်းနိုင်ငံအချို့ရဲ့ ဈေးကွက်လိုအပ်ချက်တွေနဲ့ ချိတ်ဆက်ဖြစ်ပွားလျက်ရှိကြောင်း လေ့လာတွေ့ရှိရပါတယ်။ ၂၀၁၇ ခုနှစ်၊ ကိန်းဂဏန်းများ အရ တရုတ်နိုင်ငံကို ၇၄ ဒသမ ၃၄ ရာခိုင်နှုန်း၊ ထိုင်းနိုင်ငံကို ၄ ဒသမ ၃၇ ရာခိုင်နှုန်း၊ မလေးရှားနိုင်ငံကို ဝ ဒသမ ၂၉ ရာခိုင်နှုန်း ဦးတည်ဖြစ်ပွား တာကို တွေ့ရပြီး ပြည်တွင်းလူကုန်ကူးမှု ၂၁ ဒသမ ၂၈ ရာခိုင်နှုန်း ဖြစ်ပွားလျက်ရှိကြောင်း တွေ့ရပါတယ်။ အမျိုးသမီးအများစုကတော့ အဓမ္မထိန်းမြားလက်ထပ်ဖို့ လူကုန်ကူးခံနေရကြောင်း တွေ့ရှိရပြီး ထူးခြားမှုအခြေအနေနဲ့ ၂၀၁၈ ခုနှစ်တွင် အငှားကိုယ်ဝန်ဆောင်တဲ့ လူကုန်ကူး မှု ပုံစံအသစ်များကိုလည်း ဖော်ထုတ်အရေးယူနိုင်ခဲ့ပါတယ်။ ပြည်တွင်းလူကုန်ကူးမှုတွေမှာ ပြည့်တန်ဆာပြုမှုနှင့် အဓမ္မ လုပ်အားခေါင်းပုံဖြတ်မှုတွေ အဓိကဖြစ်ပွားလျက်ရှိပါတယ်’’ ဟု ထပ်လောင်းပြောကြားခဲ့သည်။

 ထို့နောက် UNICEF (မန္တလေး) ကိုယ်စားလှယ်တစ်ဦးက ကမ္ဘာ့ကုလသမဂ္ဂအထွေထွေအတွင်းရေးမှူးချုပ်က ပေးပို့သည့် သဝဏ်လွှာအား ဖတ်ကြားပြီး World Vision မှ ကိုယ်စားလှယ်တစ်ဦးက မြန်မာနိုင်ငံ လူကုန်ကူးမှုတိုက်ဖျက်ရေးနှင့်ပတ်သက်သည့် ဂုဏ်ပြုစကားပြောကြားသည်။ ထို့နောက် မြန်မာနိုင်ငံ လူကုန်ကူးမှုတိုက်ဖျက်ရေးတွင်ကြိုးပမ်းအားထုတ်ခဲ့မှု မျတ်တမ်းဗီဒီယိုပြသခြင်း၊ မန္တလေးတိုင်းဒေသကြီး အမျိုးသမီးကော် မတီက စီစဉ်သည့် အသိပညာပေး တစ်ခန်းရပ်ပြဇာတ်ဖြင့် ဖျော်ဖြေတင်ဆက်ခြင်းများ ဆောင်ရွက်ခဲ့သည်။ အခမ်းအနားအပြီးတွင် တက်ရောက် လာကြသူများက လူကုန်ကူးမှုအသိပညာပေးနံရံကပ်ပြဘုတ်များကို ကြည့်ရှုလေ့လာကြသည်။

 မြန်မာနိုင်ငံအတွင်း လူကုန်ကူးခံရသူများအား ကူညီထောက်ပံ့နိုင်ရန်အတွက် သီးခြားရန်ပုံငွေ မထူထောင်နိုင်သေးသော်လည်း လူကုန်ကူးခံရသူ များအား ပံ့ပိုးကူညီပေးလျက်ရှိရာ ၂၀၁၇-၂၀၁၈ ခုနှစ် ဘဏ္ဍာနှစ်အတွင်း လူကုန်ကူးခံရသူ အမျိုးသား ခြောက်ဦး၊ အမျိုးသမီ ၁၆၉ဦးတို့အတွက် ငွေကျပ် ၁၉၇၄၈၀၀၀ ကို ထောက်ပံ့နိုင်ခဲ့ပြီး ၂၀၁၈-၂၀၁၉ ဘဏ္ဍာရေးနှစ်တါင်လည်း လူကုန်ကူးခံရသူ အမျိုးသမီးကိုးဦးအတွက် ငွေကျပ် ၇၁၀၀၀၀၀ ထောက်ပံ့ပေးပြီးဖြစ်သည်။

 မြန်မာနိုင်ငံ လူကုန်ကူးမှုတိုက်ဖျက်ရေးအဖွဲ့အနေဖြင့် ၂၀၁၈ ခုနှစ်၊ ဇန်နဝါရီလမှ သြဂုတ်လအထိ အမှုပေါင်း ၂၁ မှု ဖော်ထုတ်အရေးယူခဲ့ပြီး တရားခံအမျိုးသား ကိုးဦး၊ အမျိုးသမီး ၃၅ ဦးတို့အား အရေးယူနိုင်ခဲ့ပြီးအဆိုပါမှုခင်းများထဲမှ လူကုန်ကူးခံရသူ အမျိုးသမီး ၁၉ ဦး ကယ်တင်နိုင်ခဲ့သည်။ လူကုန်ကူးမှုအသိပညာပေးလုပ်ငန်းများအဖြစ် စာသင်ကျောင်းများတွင် ၉၇ ကြိမ်၊၅၁၃၃၁ဦး၊ ပြည်သူလူထုအတွင်း ၁၆၅ ကြိမ်၊ ၃၇၆၉၈ဦး၊  လက်ကမ်းစာစောင်ဖြန့်ဝေခြင်း ၂၆၄ ကြိမ်၊ ၃၇၃၃၉ စောင်တို့ ဖြန်ပဝေကာ အသိပညာပေးလုပ်ငန်းများ ဆောင်ရွက်ခဲ့သည်။