၂၀၁၈ ခုနှစ်၊ ဒီဇင်ဘာလ ၅ ရက်

 ရေနှင့်ရေဆိုးသန့်စင်ခြင်းညီလာခံ(Water & Waste Water Conference)အခမ်းအနားကို ဒီဇင်ဘာ ၅ ရက် နံနက် ၁၀ နာရီက ချမ်းအေးသာစံ မြို့နယ်အတွင်းရှိ Hotel Marvel အစည်းအဝေးခန်းမတွင်ပြုလုပ်ရာ မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာဇော်မြင့်မောင် တက်ရောက် ပြီး  မန္တလေးမြို့နှင့်ပတ်သက်၍ ရေနှင့်သန့်ရှင်းမှုဆိုင်ရာ အခြေခံအဆောက်အအုံများ ရင်းနှီးမြှုပ်နှံမှုနှင့် အဆင့်မြှင့်တင်မှုအတွက် အခွင့်အလမ်းကောင်းများ ရရှိလာနိုင်မည့် ကိစ္စရပ်များနှင့်ပတ်သက်၍ အဖွင့်အမှာစကားပြောကြားခဲ့သည်။

 ယနေ့ပြုလုပ်သည့် ရေနှင့်ရေဆိုးသန့်စင်ခြင်းညီလာခံ(Water & Waste Water Conference) ကို (၃)ရက်တိုင် ကျင်းပပြုလုပ်သွားမည်ဖြစ်သည့်အပြင် ညီလာခံမှ ပြည်တွင်းသာမက နိုင်ငံတကာအတွေ့အကြုံများ၊ နည်းပညာများအား သက်ဆိုင်ရာပြည်တွင်း/ပြည်ပကျွမ်းကျင်ပညာရှင်များနှင့် ပြင်သစ်နိုင်ငံ ဖွံ့ဖြိုးတိုးတက်ရေးအေဂျင်စီမှ အဖွဲ့ခေါင်းဆောင်များက ဆွေးနွေးဖလှယ်ခြင်း၊ သင်တန်းပို့ချခြင်းတို့ပါ ပါဝင်ကြောင်းလည်း ယင်းအခမ်းအနားမှသိရသည်။

 တိုင်းဒေသကြီးဝန်ကြီးချုပ်က အဖွင့်အမှာစကားပြောကြားရာတွင် မန္တလေးမြို့၏လက်ရှိအခြေအနေကို သုံးသပ်ရမည်ဆိုလျှင် ရေနှင့်သန့်ရှင်းမှုဆိုင်ရာ အခြေခံအဆောက်အအုံများနှင့်ပတ်သက်ပြီး နည်းပညာပိုင်းဆိုင်ရာ၊ ဘဏ္ဍာရေးဆိုင်ရာ၊ ဖွံ့ဖြိုးမှုဆိုင်ရာနှင့် အခြားအရင်းအမြစ်များတွင် အဆင့်မြှင့်တင် ဖြည့်ဆည်းဆောင်ရွက်ရမည့်လုပ်ငန်းများ များစွာရှိနေသည်ကိုတွေ့ရှိရကြောင်း၊ ခေတ်မီဖွံ့ဖြိုးတိုးတက်သည်နှင့်အမျှ ခေတ်မီအသုံးအဆောင်ပစ္စည်းများ စသည်တို့ကိုသုံးစွဲပြီး မည်ကဲ့သို့စနစ်တကျ စွန့်ပစ်ရန်လိုအပ်ကြောင်း၊ မိလ္လာနှင့်ရေဆိုးစနစ်ဆိုင်ရာစီမံခန့်ခွဲမှု ကိစ္စရပ်များတွင် ပြည်သူလူထု အသိပညာ မြှင့်တင်၍ ပူးပေါင်းပါဝင်လာစေရန်ရည်ရွယ်ပါကြောင်း။

 စွန့်ပစ်ရေဆိုးသန့်စင်မှုစနစ်ကိုလည်း စနစ်တကျဆောင်ရွက်ရမည်ဖြစ်ပြီး Green,Clean,Smart မြို့တော်ဖြစ်စေရေးအတွက် အားလုံးမှကြိုးစား ဆောင်ရွက်ရမည်ဖြစ်ကြောင်း၊ မြို့တစ်မြို့တည်းသာလျှင် ဖွံ့ဖြိုးတိုးတက်ရန်မဟုတ်ဘဲ တစ်နိုင်ငံလုံး ဂျီဒီပီ မြင့်ဖို့သာလျှင်အရေးကြီးပါကြောင်း၊ ပြည်သူကို ဦးစားပေးပြီး ပြည်သူ့အကျိုးကိုရှေ့ရှု၍ ဆောင်ရွက်စေချင်ပါကြောင်း၊ စေတနာသန့်သန့်ဖြင့် တိုင်းပြည်ဘဏ္ဍာငွေ အလေအလွင့်မရှိအောင်  တတ်နိုင်သမျှ လုပ်မည်ဆိုသည့် ကိုယ့်လိပ်ပြာကိုယ်သန့်ရန်သာလျှင် အရေးကြီးပါကြောင်း၊ အဓိကကျသည့်အချက်သည် မြို့တော်တွင် ပြည်သူများ နေပျော်ထိုင်ပျော် အဆင်ပြေနိုင်သည့်ဒေသတစ်ခုကို တည်ဆောက်ကြရမည်ဖြစ်ပါကြောင်း စသည်ဖြင့် အကျယ်တဝင့်ပြောကြားသည်။

 ဆက်လက်၍ မြန်မာနိုင်ငံဆိုင်ရာ ပြင်သစ်သံအမတ်ကြီး H.E Mr.Christian Lechervy က လက်ရှိပြင်သစ်နိုင်ငံမှ မြန်မာနိုင်ငံနှင့်ဆောင်ရွက်နေသည့် စီမံကိန်းများ၊ မြန်မာ-ပြင်သစ်ချစ်ကြည်ရေးအတွက် ဆောင်ရွက်နေသည့်အကြောင်းအရာများ၊ အနာဂါတ်အတွက် ဆက်လက်ဆောင်ရွက်မည့် အကြောင်းအရာများနှင့် ပတ်သက်၍ ရှင်းလင်းပြောကြားပြီးနောက် ပထမပိုင်းအခမ်းအနားအစီအစဉ်ကိုရုပ်သိမ်းလိုက်ကာ ဒုတိယပိုင်းကို အစီအစဉ်များ အတိုင်း ဆက်လက်ကျင်းပခဲ့သည်။

 ၂၀၁၆ခုနှစ်၊ ဇွန်လတွင် မန္တလေးမြို့၌ကျင်းပပြုလုပ်ခဲ့သော မြို့ပြရေပေးရေးစီမံခန့်ခွဲမှုဆိုင်ရာ အလုပ်ရုံဆွေးနွေးပွဲနှင့် ၂၀၁၇ ခုနှစ်၊ အောက်တိုဘာလတွင် ကျင်းပပြုလုပ်ခဲ့သည့် အမှိုက်နှင့်စွန့်ပစ်ပစ္စည်းများစီမံခန့်ခွဲမှုဆိုင်ရာ အလုပ်ရုံဆွေးနွေးပွဲ၏ အောင်မြင်မှုကိုအခြေခံ၍ ယနေ့ပြုလုပ်သည့် ၂၀၁၈ ခုနှစ်တွင် မိလ္လာနှင့်ရေဆိုးစနစ်စီမံခန့်ခွဲမှုဆိုင်ရာအလုပ်ရုံဆွေးနွေးပွဲကိုလည်း ပြည်တွင်း/ပြည်ပပညာရှင်များနှင့်အတူ မန္တလေးမြို့တွင် ကျင်းပခြင်းဖြစ်ကြောင်း အဆိုပါအခမ်းအနားမှသိရသည်။