၂၀၁၉ခုနှစ် ဇန်နဝါရီလ ၁၀ရက်

 မန္တလေးမြို့တော်ဝန်၊ စည်ပင်သာယာရေးဝန်ကြီးဌာန ဝန်ကြီးဒေါက်တာရဲလွင်သည် မန္တလေးမြို့တော်စည်ပင်သာယာရေးကော်မတီဝင်များနှင့်အတူ ဇန်နဝါရီလ ၁၀ရက် နံနက် ၉နာရီခွဲက မန္တလေးမြို့တော်ဖွံ့ဖြိုးတိုးတက်ရေးအတွက် ဆောင်ရွက်လျက်ရှိသောလမ်းများအဆင့်မြှင့်တင်ခြင်းနှင့် ရေမြောင်းများ ဖောက်လုပ်ခြင်း လုပ်ငန်းများကိုကွင်းဆင်းစစ်ဆေးသည်။

 ရှေးဦးစွာ မြို့တော်ဝန်နှင့်အဖွဲ့သည် ချမ်းအေးသာစံမြို့နယ် ၂၈လမ်းကို လမ်း၆၀မှ ၆၂လမ်းအထိ တိုးချဲ့ဖောက်လုပ်ခြင်းနှင့် ရေမြောင်းများ Precast မြောင်း တည်ထောင်ခြင်းလုပ်ငန်းများကို ကြည့်ရှုစစ်ဆေးရာ လမ်းတံတားဌာန၊ ဌာနမှူးဦးသန်းထိုက်ဦးနှင့် တာဝန်ခံအင်ဂျင်နီယာများက လမ်း၆၀မှ ၆၂လမ်းအထိ မူလလမ်းဧရိယာမှာ အချို့နေရာများတွင် ကျဉ်းနေသဖြင့် လမ်းနှင့်မလွတ်ကင်းသည့် အပင်များ ဖယ်ရှားရှင်းလင်းခြင်း၊ ဘုန်းကြီးကျောင်းအုတ်တံတိုင်းများ ရွှေ့ပြောင်းခြင်း၊ အခြေခံလွှာကျစ်လစ်ခိုင်မာမှုရှိအောင် စက်ယန္တရားများဖြင့် ဆောင်ရွက်ခြင်းတို့ကို အကျယ်ပေ ၂၀၊ အရှည်ပေက ၅၂၀ကိုလည်းကောင်း၊ အကျယ် ၁၆ပေ၊ အရှည်ပေ ၂၇၀နှင့် အကျယ် ၁၆ပေ၊ အရှည်ပေ ၂၇၀ကို Stabilized Soil ခင်းခြင်းဆောင်ရွက်နေမှုလုပ်ငန်းများကို ရှင်းလင်းတင်ပြရာ မြို့တော်ဝန်ကလမ်းဧရိယာနှင့်မလွတ်ကင်းသည့် အပင်များကိုရွှေ့ပြောင်းစိုက်ပျိုးသွားရေး၊ မြောင်းများရေစီးရေလာကောင်းမွန်စေရန် လမ်းလုပ်ငန်းနှင့်အတူ ဆောင်ရွက်သွားရေးတို့ကို လမ်းတံတားဌာနမှူးနှင့် တာဝန်ခံအင်ဂျင်နီယာများအား ဖြည့်ဆည်းမှာကြားသည်။

 ထို့နောက် မြို့တော်ဝန်နှင့်အဖွဲ့သည် ချမ်းအေးသာစံမြို့နယ်၊ ၇၃လမ်းနှင့် ၇၄လမ်းကြား၊ ၃၁လမ်းနှင့် ၃၂လမ်းကြားရှိ မူလလမ်းသား ၁၀ပေကို ဘေးချဲ့ လမ်းခင်းနိုင်ရေးဆောင်ရွက်နိုင်မှုကို ကြည့်ရှုစစ်ဆေးရာ လမ်းတံတားဌာန၊ ဌာနမှူးနှင့် တာဝန်ခံအင်ဂျင်နီယာတို့က အကျယ်၂၄ပေ၊ အရှည်ပေ ၆၅၀ကို Stabilized Soil ခင်းပြီး နိုင်လွန်ကတ္တရာခင်းနိုင်ရန် ဆောင်ရွက်နေမှုနှင့်ရေဆင်းမြောင်း Precast အမျိုးအစားအကျယ်တစ်ပေ ထည့်သွင်းဆောင်ရွက်မည့် လုပ်ငန်းများကို ရှင်းလင်းတင်ပြရာ မြို့တော်ဝန်က လုပ်ငန်းလှည့်လည်ကြည့်ရှုစစ်ဆေးပြီး ဆေးတက္ကသိုလ်အနီးဆက်လက်ဆောင်ရွက်မည် ဖြစ်သဖြင့် လုပ်ငန်းများ လျင်မြန်စွာပြီးစီးအောင် ဆောင်ရွက်ရေးတို့ကို တာဝန်ရှိသူများအား ဖြည့်စွက်မှာကြားခဲ့သည်။