၂၀၁၉ ခုနှစ် ဖေဖော်ဝါရီလ ၁၀ ရက်

 (၇၂)နှစ်မြောက် ပြည်ထောင်စုနေ့အထိမ်းအမှတ် အဋ္ဌမအကြိမ် တိုင်းရင်းသားလူမျိုးစုများ ဈေးရောင်းပွဲတော် ဖွင့်ပွဲအခမ်းအနားကို မန္တလေးမြို့ မန္တလာသီရိ အားကစားကွင်းတွင် ဖေဖော်ဝါရီ ၁၀ ရက်နေ့ နံနက် ၉ နာရီက ကျင်းပခဲ့ရာ တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး ဦးနိုင်သက်လွင် နှင့် မန္တလေးတိုင်းဒေသကြီး ၀န်ကြီးချုပ် ဒေါက်တာဇော်မြင့်မောင်တို့ တက်ရောက်အားပေး၍ ဂုဏ်ပြုအမှာစကား ပြောကြားခဲ့ကြသည်။

 အဆိုပါအခမ်းအနားတွင် ပြည်ထောင်စုဝန်ကြီး ဦးနိုင်သက်လွင်က တိုင်းရင်းသားလူမျိုးစုများ ဈေးရောင်းပွဲတော်ကို မန္တလေးမြို့တွင် ၂၀၁၂ ခုနှစ် ၆၅ နှစ်မြောက် ပြည်ထောင်စုနေ့ အထိမ်းအမှတ်အဖြစ် ကချင်၊ ကရင်၊ ချင်း၊ မွန်၊ ရခိုင်၊ ရှမ်း၊ ကိုးကန့်၊ တအောင်း၊ စသည့် လူမျိုး ရှစ်မျိုးဖြင့် စတင်ကျင်းပခဲ့ပြီး ယခုနှစ်တွင် ထူးခြားမှုအနေဖြင့် ယခင်လူမျိုးစု ရှစ်ခုအပြင် ဗမာ၊ ကယန်း၊ တောင်ရိုး၊ နာဂ၊ ပအိုဝ်း၊ ရှမ်းနီ၊ အင်းသား၊ ဓနု၊ ယော၊ လီဆူ စသည့် တိုင်းရင်းသား ၁၀ မျိုး ထပ်တိုးလာကြောင်း တွေ့ရှိရသဖြင့် များစွာအားရ ကျေနပ်မိသည့်အပြင် မန္တလေးအခြေစိုက် တိုင်းရင်းသားလူမျိုးစုများအားလုံး ပါဝင်သည့်ပွဲသို့ တက်ရောက်ခွင့် ရသည့်အတွက်လည်း များစွာဂုဏ်ယူမိပါကြောင်း၊ တိုင်းရင်းသားပေါင်းစုံပါဝင်သည့် ဈေးရောင်းပွဲတော်ကျင်းပခြင်းကြောင့် တိုင်းရင်းသားများ အချင်းချင်း တစ်ဦးနှင့်တစ်ဦး မတူကွဲပြားသည့် ယဉ်ကျေးမှုဓလေ့ထုံးစံများကို ပိုမိုသိရှိနားလည်လာကြပြီး ရင်းနှီးချစ်ကြည်မှုများ ရရှိလာနိုင်ကြမည့်အပြင် ရင်းနှီးချစ်ကြည်မှုမှတစ်ဆင့် တစ်ဦးအပေါ်တစ်ဦး ချစ်ခင်ယုံကြည်မှုများ တိုးပွားရရှိလာမှာ ဖြစ်ပါကြောင်း၊ သို့မှသာ တိုင်းရင်းသား ညီအစ်ကို မောင်နှမများ အကြား သံသယကင်းစင်ပြီး ခိုင်မာသည့်ယုံကြည်ချက်များဖြင့် ငြိမ်းချမ်းရေးလုပ်ငန်းစဉ်အောင်မြင်ရေးနှင့် ဒီမိုကရေစီဖက်ဒရယ်ပြည်ထောင်စုကြီး ဖြစ်ပေါ်ရေး အတွက် ဆွေးနွေးအဖြေရှာနိုင်မည်ဖြစ်ပါကြောင်း၊ တိုင်းရင်းသားလူမျိုးစုများ၏ ဈေးရောင်းပွဲတော်တွင် ရိုးရာယဉ်ကျေးမှု ဓလေ့ထုံးစံများနှင့် ရိုးရာထွက်ကုန်များကို ပြည်တွင်းတွင်သာမက ပြည်ပနိုင်ငံများသို့ပါ ထိုးဖောက်ရောင်းချနိုင်ရေးအတွက် အဆင့်မြှင့်တင်ဆောင်ရွက်သွားနိုင်ပါက မြန်မာနိုင်ငံ၏ စီးပွားရေးတိုးတက်လာမည်မှာ မလွဲဧကန်ဖြစ်ပါကြောင်း၊ ယခုပြုလုပ်သည့် ဈေးရောင်းပွဲတော် မှတစ်ဆင့် ပြည်ထောင်စုသမ္မတမြန်မာနိုင်ငံတော်တစ်ဝန်းလုံး တည်ငြိမ်အေးချမ်းပြီး တရားဥပဒေစိုးမိုးသည့် ထာဝရငြိမ်းချမ်းရေးတည်ဆောက်နိုင်ပြီး တရားမျှတ၍ တန်းတူညီမျှမှုရှိသော ဒီမိုကရေစီဖက်ဒရယ် ပြည်ထောင်စုကြီးကို အမြန်ဆုံးတည်ဆောက်နိုင်ရေးအတွက် တိုင်းရင်းသားညီအစ်ကိုမောင်နှမများအားလုံး အတူတကွ လက်တွဲပူးပေါင်းဆောင်ရွက်သွားကြပါရန် တိုက်တွန်းပြောကြားခဲ့သည်။

 ဆက်လက်၍ မန္တလေးတိုင်းဒေသကြီး ၀န်ကြီးချုပ် ဒေါက်တာဇော်မြင့်မောင်က တိုင်းရင်းသားလူမျိုးစုများ၏ ဈေးရောင်းပွဲတော်ဆိုသည်မှာ လူမျိုးစု တစ်စုချင်းစီ၏ ဓလေ့ထုံးတမ်းစဉ်လာများကို အားလုံးမြင်တွေ့ခွင့်ရရှိအောင် ထုတ်ဖော်ပြသသည့် ပြပွဲတစ်ခုအဖြစ် ခံယူကြောင်း၊ မန္တလေးတိုင်းဒေသကြီးတွင် တိုင်းရင်းသားလူမျိုးအစုအဖွဲ့ ၁၈ ခုအထိ အခြေစိုက်နေထိုင်ကြသည့်အတွက် တစ်နိုင်ငံလုံးထက် ချစ်ခင်ရင်းနှီးမှု ပိုမိုသာလွန်မည်ဖြစ်ကြောင်း၊ အဆိုပါ ချစ်ကြည်ရင်းနှီးမှုသည် ဧရာဝတီ၊ သံလွင်နှင့်၊ စစ်တောင်းမြစ်ကြီးများနှင့်အတူ အမြဲထာဝရ တည်ရှိနေမည်ဟု မန္တလေးသူ၊ မန္တလေးသားတို့မှ ယုံကြည်ပါကြောင်း ပြောကြားခဲ့သည်။

 ထို့ပြင် မန္တလေးအခြေစိုက် တိုင်းရင်းသားလူမျိုးစုများ ဈေးရောင်းပွဲတော် ကျင်းပရေးဦးစီးကော်မတီ ဥက္ကဋ္ဌ ဦးနိုင်မောင်မြင့်မှ ကျေးဇူးတင်စကားပြောကြားပြီး ပြည်ထောင်စုဝန်ကြီး၊ ၀န်ကြီးချုပ်နှင့် တာဝန်ရှိသူများက အခမ်းအနားကို ဖဲကြိုးဖြတ်ဖွင့်လှစ်ပေးကာ ဧည့်တော်များအား အမှတ်တရ လက်ဆောင်ပစ္စည်းများ ပေးအပ်ခဲ့ကြသည်။

 ထို့နောက် တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး ဦးနိုင်သက်လွင်၊ မန္တလေးတိုင်းဒေသကြီးအစိုးရဖွဲ့ ၀န်ကြီးချုပ် ဒေါက်တာ ဇော်မြင့်မောင်နှင့် အစိုးရအဖွဲ့ဝင် ၀န်ကြီးများ၊ ဌာနဆိုင်ရာ တာဝန်ရှိသူများက ဈေးရောင်းပွဲတော်တွင် ခင်းကျင်းပြသထားသည့် ပြခန်းများနှင့် တိုင်းရင်းသားတို့၏ ဒေသထွက်ကုန်များ၊ ရိုးရာအသုံးအဆောင်နှင့် အစားအစာအရောင်းဆိုင်ခန်းများကို လိုက်လံကြည့်ရှု အားပေးခဲ့ကြသည်။

  မန္တလေးမြို့တွင် အခြေချနေထိုင်ကြသော တိုင်းရင်းသားလူမှုရေးအသင်းအဖွဲ့များမှ ၇၂ နှစ်မြောက် ပြည်ထောင်စုနေ့အထိမ်းအမှတ်အဖြစ် အဋ္ဌမအကြိမ် တိုင်းရင်းသား လူမျိုးစုများ ဈေးရောင်းပွဲတော်ကို မန္တလာသီရိအားကစားကွင်းတွင် ဖေဖော်ဝါရီ ၁၀ ရက်နေ့မှ ၁၂ ရက်နေ့အထိ ကျင်းပသွားမည်ဖြစ်ပြီး အဆိုပါ ဈေးရောင်း ပွဲတော်တွင် တိုင်းရင်းသား လူမျိုးစုများ၏ ဒေသထွက်ကုန်နှင့် ရိုးရာအသုံးအဆောင် ဆိုင်ခန်းပေါင်း ၁၈ ခန်းနှင့် ရိုးရာအစားအစာ ဆိုင်ခန်းပေါင်း ၁၈ ခန်းအပြင် တိုင်းရင်းသား ရေးရာဝန်ကြီးဌာန ပြခန်းများ၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာနပြခန်းများနှင့်အတူ စာအုပ် အရောင်းဆိုင်ပေါင်း ၅၀ ပါဝင်ပြသရောင်းချသွားမည်ဖြစ်ပြီး နံနက် ၉ နာရီမှ ညနေ ၆ နာရီအထိ ဈေးရောင်းပွဲတော်ကိုလည်းကောင်း၊ ညနေ ၆ နာရီမှ ည ၁၁ နာရီအထိ တိုင်းရင်းသားများ၏ ယဉ်ကျေးမှုအကပဒေသာ ဖျော်ဖြေမှုများဖြင့်လည်းကောင်း စည်ကားသိုက်မြိုက်စွာ ကျင်းပသွားမည်ဖြစ်သည်။