၂၀၁၈ ခုနှစ်၊ ဒီဇင်ဘာလ ၁၉ ရက်

 မန္တလေးတိုင်းဒေသကြီး ကျောက်ဆည်ခရိုင်၊ တံတားဦးမြို့နယ် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ကြီးမှူးကျင်းပသည့် လိန်ကုန်း ကျေးရွာ၊ ကျောင်းကုန်းကျေးရွာ၊ ထောက်ရှာကုန်းကျေးရွာနှင့် ညောင်ကုန်းကျေးရွာတို့ ပူးပေါင်းပြီး အဋ္ဌမအကြိမ်မြောက် ကျေးလက်ဒေသဖွံ့ဖြိုးရေး ပြည်သူ့စကားဝိုင်းကို ဒီဇင်ဘာ ၁၈ ရက် မွန်းလွဲ ၁ နာရီက ညောင်ကုန်းကျေးရွာ အေးသုခဓမ္မာရုံ၌ ကျင်းပသည်။

 အဆိုပါ ပြည်သူ့စကားဝိုင်းအခမ်းအနားတွင် တံတားဦးမြို့နယ် မြို့နယ်အုပ်ချုပ်ရေးမှူး ဦးလှဝင်းအောင်က အမှာစကားပြောကြားရာတွင် ယခုလို ကျေးလက်စကားဝိုင်းများ ကျင်းပရခြင်းဟာ ဒေသခံပြည်သူများနှင့် ဌာနဆိုင်ရာများတွေ့ဆုံပြီး မိမိတို့ဒေသလိုအပ်ချက်များကို ပွင့်ပွင့်လင်းလင်း မေးမြန်းတင်ပြနိုင်ရန်နှင့် သက်ဆိုင်ရာဌာနများအနေဖြင့်လည်း မိမိတို့ဆောင်ရွက်ပေးနိုင်မည့် အခြေအနေများကို ကျေးရွာပြည်သူများနှင့် ပူးပေါင်း ပါဝင်ဆောင်ရွက်ရမည့် လုပ်ငန်းများကို တတ်နိုင်သမျှ တိတိကျကျ ပြန်လည်ရှင်းလင်းဆွေးနွေးကြရန် ဆောင်ရွက်ပေးခြင်းဖြစ်ကြောင်း ပြောကြားသည်။

 ထို့နောက် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဦးဘိုမောင်က ပြည်သူ့စကားဝိုင်း ကျင်းပရခြင်း၏ ရည်ရွယ်ချက် များကို ရှင်းလင်းပြောကြားသည်။ ဆက်လက်၍ ပြည်သူ့စကားဝိုင်းကို တံတားဦးမြို့နယ်၊ တိုင်းဒေသကြီးလွှတ်တော်ကိုယ်စားလှယ် ဦးမင်းမင်းနီနှင့် ဦးဝဏ္ဏအောင်တို့က ဒေသဖွံ့ဖြိုးရေးလုပ်ငန်းများနှင့် ပတ်သက်နေမှုများကိုလည်းကောင်း၊ မြို့နယ်အခြေခံပညာဦးစီးဌာနမှ မြို့နယ်ပညာရေးမှူး ဦးမော်ဦးက ပညာရေးဆောင်ရွက်မှုမှတ်တမ်းများကိုလည်းကောင်း၊ မြို့နယ်စိုက်ပျိုးရေးဦးစီးဌာန ဦးစီးအရာရှိ ဦးခင်မောင်သန်းက စိုက်ပျိုးရေး ပညာပေးလုပ်ငန်းအကြောင်းကိုလည်းကောင်း၊ မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန ဦးစီးအရာရှိ ဦးထွန်းနောင်ဝင်းက မြေယာလုပ်ထုံးလုပ်နည်းနှင့်မြေယာဥပဒေအကြောင်းကိုလည်းကောင်း၊ မြို့နယ်ကျေးလက်ဒေသဦးစီးဌာန၊ ဦးစီးအရာရှိ ဦးလှိုင်မင်းက ကျေးလက် ဒေသများတွင် ဆောင်ရွက်နေသော လမ်းတံတားအကြောင်းကိုလည်းကောင်း၊ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးစီးအရာရှိ ဦးစောဇော်ဝင်းထွန်းက ကျေးလက်ဒေသဖွံ့ဖြိုးရေးလုပ်ငန်းစဉ်အကြောင်း သိကောင်းစရာများကိုလည်းကောင်း၊ မြို့နယ်ကျန်းမာရေးဦးစီးဌာန ဒုတိယမြို့နယ်ပြည်သူ့ကျန်းမာရေးဦးစီး ဌာနမှူး ဒေါက်တာ နှင်းရည်ဝင်းနိုင်က သွေးလွန်တုပ်ကွေးရောဂါအကြောင်းနှင့် ဆင်ခြေထောက်ရောဂါ သိကောင်းစရာများကိုလည်းကောင်း ရှင်းလင်းဆွေးနွေးကြသည်။

 ထို့နောက် အခမ်းအနားသို့ တက်ရောက်လာကြသော ဒေသခံပြည်သူများက မိမိတို့ သိရှိလိုသည်များကို မေးမြန်းကြရာ သက်ဆိုင်ရာ တာဝန်ရှိ သူများက ပြန်လည်ဖြေကြားပေးပြီး တိုင်းဒေသကြီးလွှတ်တော်ကိုယ်စားလှယ် ဦးဝဏ္ဏအောင်က ဆွေးနွေးပွဲနှင့်ပတ်သက်၍ သုံးသပ်ချက်နှင့် ထင်မြင်ယူဆချက်များကို နိဂုံးချုပ်စကားပြောကြားခဲ့သည်။