၂၀၁၇ ခုနှစ်၊ မတ်လ ၁၆ ရက်

 ၁၃၇၈ ခုနှစ်၊ မန္တလေးမြို့တော် မဟာသင်္ကြန်မဏ္ဍပ် မြန်မာ့ရိုးရာယဉ်ကျေးမှု မဟာသင်္ကြန်ပွဲတော်ကျင်းပရေး လုပ်ငန်းညှိနှိုင်းအစည်းအဝေးကို မတ် ၁၆ ရက် နံနက် ၉ နာရီက မန္တလေးမြို့တော်စည်ပင်သာယာရေးေ က်ာမတီ အစည်းအဝေးခန်းမ၌ ကျင်းပရာ ဦးစီးကော်မတီနာယက မန္တလေး မြို့တော်ဝန် စည်ပင်သာယာရေး ဝန်ကြီးဌာန ဝန်ကြီး ဒေါက်တာ ရဲလွင် တက်ရောက် အမှာစကားပြောကြားသည်။

 "မြန်မာ့ဓလေ့ထုံးတမ်းနှင့်အညီ ရိုးရာမပျက် မြန်မာ့ရိုးရာယဉ်ကျေးမှု မဟာသင်္ကြန်ပွဲတော်ကြီးကို စည်ကားသိုက်မြိုက်စွာ ကျင်းပနိုင်ရေးအတွက် ဖွဲ့စည်းထားသည့် ဆပ်ကော်မတီအလိုက် လုပ်ငန်းတာဝန်များကို စနစ်တကျ ပြီးမြောက်အောင်မြင်အောင် ဆောင်ရွက်သွားကြရမည်ဖြစ်ကြောင်း၊ ယခုနှစ်တွင် မြန်မာ့ရိုးရာပုံရိပ်အဖြစ် လမ်းလျှောက်သင်္ကြန်ကို ကျုံးတောင်ဘက် ၂၆ လမ်းပေါ်တွင် ကျင်းပသွားမည်ဖြစ်၍ စီမံခန့်ခွဲရေး၊ လုံခြုံရေးနှင့် စည်းကမ်းထိန်းသိမ်းရေးအပိုင်းတွင် စနစ်တကျ ကြီးကြပ်ဆောင်ရွက်သွားကြရမည်ဖြစ်ကြောင်း၊ မြို့တော်မဟာသင်္ကြန်မဏ္ဍပ်တွင်လည်း ကုန်ကျစရိတ်များ သက်သာစေရန် အထူးဂရုစိုက် ဆောင်ရွက်ကြပြီး ဆပ်ကော်မတီအလိုက် တင်ပြချက်များကို ဗဟိုကော်မတီအစည်းအဝေး၌ ဆက်လက် ညှိနှိုင်းဆောင်ရွက်သွားကြမည်ဖြစ်ကြောင်း"စသည်ဖြင့် မြို့တော်ဝန်က အဖွင့်အမှာစကား ပြောကြားသည်။

 ဆက်လက်၍ ဆပ်ကော်မတီအလိုက် ဥက္ကဋ္ဌများနှင့် အဖွဲ့ဝင်များက လုပ်ငန်းတာဝန်များ ဆောင်ရွက်ပြီးစီးမှုအခြေအနေများကို တင်ပြကြပြီးနောက် မြို့တော်ဝန်က အချို့ပုဂ္ဂိုလ်များကို လုပ်ငန်းလိုအပ်ချက်၊ လုပ်ငန်း ကျွမ်းကျင်မှုအရ ဆပ်ကော်မတီတစ်ခုထက်ပိုပြီး တာဝန်ပေးအပ်မှု ရှိပါကြောင်း၊ လုပ်ငန်းအဖွဲ့ငယ်များ ထပ်မံဖွဲ့စည်းခြင်း၊ လုပ်ငန်းတာဝန် အသေးစိတ် သတ်မှတ်ခြင်း၊ လုပ်ငန်းစီမံချက် ရေးဆွဲခြင်းတို့ကို ဆောင်ရွက်ကြ ရမည်ဖြစ် ပြီး မြန်မာ့ရိုးရာယဉ်ကျေးမှု မဟာသင်္ကြန်ပွဲတော်ကြီးကို အောင်မြင်အောင် တာဝန်ကျေပွန်စွာ ဆောင်ရွက်သွားကြရန် စသည်ဖြင့် ပြောကြားပြီး အစည်းအဝေးကို ရုပ်သိမ်းခဲ့သည်။