၂၀၁၇ခုနှစ် ဇူလိုင်လ ၂၁ရက်

 သက်တမ်းလွန်ဆေးဝါးများနှင့် စားသုံးရန်မသင့်သော အစားအစာများအား မီးရှို့ဖျက်ဆီးခြင်း အခမ်းအနားကို ဇူလိုင်လ ၂၁ရက် နံနက် ၉နာရီက ပုသိမ်ကြီးမြို့နယ် အေးရိပ်ငြိမ်သုသာန်ရှိ သတ်မှတ်နေရာ၌ ကျင်းပပြုလုပ်ရာ မန္တလေးမြို့တော်ဝန် စည်ပင်သာယာရေးဝန်ကြီးဌာနဝန်ကြီး ဒေါက်တာ ရဲလွင် တက်ရောက်၍ သက်တမ်းလွန်ဆေးဝါးများနှင့် စားသုံးရန်မသင့်သော အစားအစာများအား စစ်ဆေးကြည့်ရှုက မီးရှို့ဖျက်ဆီးပေးသည်။

 အဆိုပါ အခမ်းအနားသို့ မန္တလေးစည်ပင်သာယာရေးကော်မတီ ဒုတိယ ဥက္ကဋ္ဌ၊ ဒုတိယမြို့တော်ဝန် ဦးရဲမွန်၊ အတွင်းရေးမှူးဦးအောင်ကျော်ထွန်း၊ ကော်မတီဝင်များနှင့် ဌာနမှူးများ၊ စားသုံးသူကာကွယ်ရေးအဖွဲ့(တိုင်းဒေသကြီး) ဒုတိယဥက္ကဋ္ဌ ဒေါက်တာအောင်မြင့်(ညွှန်ချုပ်-ငြိမ်း)၊ မြို့နယ် အစားအသောက်နှင့်ဆေးဝါးကြီးကြပ်ရေးအဖွဲ့ ဥက္ကဋ္ဌများဖြစ်ကြသည့် ချမ်းအေးသာစံမြို့နယ် ကျန်းမာရေးဦးစီးဌာနမှူး ဒေါက်တာလင်းလင်းချစ်၊ မဟာအောင်မြေမြို့နယ် ကျန်းမာရေးဦးစီးဌာနမှူး ဒေါက်တာချောချောနိုင်၊ ကုမ္ပဏီများမှ တာဝန်ရှိသူများ၊ ဖိတ်ကြားထားသူများ၊ မြို့တော်စည်ပင် သန့်ရှင်းရေးဌာနမှ ဝန်ထမ်းများတက်ရောက်ကြသည်။

 ရှေးဦးစွာ မြို့တော်ဝန်နှင့် တာဝန်ရှိသူများသည် မီးရှို့ဖျက်ဆီးသည့် သက်တမ်းလွန်ဆေးဝါးများအား ကြည့်ရှုစစ်ဆေးပြီးနောက် သတ်မှတ်နေရာရှိ ကျင်းအတွင်း စွန့်ပစ်ကာမီးရှို့ဖျက်ဆီးကြသည်။ ယနေ့မီးရှို့ဖျက်ဆီးသည့် သက်တမ်းလွန်ဆေးဝါးများနှင့် စားသောက်ရန်မသင့်သော အစားအစာများ၏ စုစုပေါင်းတန်ဖိုးမှာ ငွေ ၂၀၃၇၄၀၅၄၈ကျပ် ဖြစ်ပြီး ယခုနှစ်အတွင်း(ဒုတိယ)အကြိမ်မြောက်ပြုလုပ်ခြင်းဖြစ်သည်။