၂၀၁၇ ခုနှစ် နိုဝင်ဘာ ၂၈ ရက်

  မန္တလေးမြို့တော်စည်ပင်သာယာရေးဝန်ကြီးဌာန ဝန်ကြီး ဒေါက်တာ ရဲလွင်သည် မန္တလေးမြို့တော်စည်ပင်သာယာရေးကော်မတီဝင်များ၊ ဌာနမှူးလိုက်ပါ၍ နိုဝင်ဘာ ၂၈ ရက် ညနေ ၃ နာရီက မန္တလေး၊ အောင်မြေသာစံမြို့နယ်၊ မြို့ပတ်ကမ်းနားလမ်း အမှတ်(၈)ရေတွန်းစက်ရုံသို့ရောက်ရှိလာရာ ရေနှင့်သန့်ရှင်းမှုဌာန ဌာနမှူး ဒေါ်ခင်မေဌေးနှင့် တာဝန်ရှိသူများက ရေတွန်းစက်ရုံအတွင်း စက်ယန္တရားများ စက်စွမ်းအားပြည့် လည်ပတ်မောင်းနှင်မှုကို ရှင်းလင်းတင်ပြသည်။

 ဆက်လက်၍ မြို့တော်ဝန်နှင့် တာဝန်ရှိသူများ၊ နိုင်ငံခြားပညာရှင်များသည် အမှတ် (၈)ရေတွန်းစက်ရုံသို့ ဧရာဝတီမြစ်ရေတင်မှ ကနဦး အနည်ကျကန်၊ ကနဦး အကြမ်းရေစစ်ကန်၊ အနှေးကျ သဲရေစစ်ကန်၊ ရေစုကန်များသို့ အဆင့်ဆင့် ဝင်ရောက်နေမှုကို လှည့်လည်ကြည့်ရှုကြပြီး ရေတွန်းစက်ရုံမှ သန့်စင်သော ရေများ ပိုမိုဖြန့်ဝေနိုင်ရန် အဆင့်မြှင့်တင်ခြင်းလုပ်ငန်းများ ဆောင်ရွက်နိုင်ရေး ဆွေးနွေးတိုင်ပင် ညှိနှိုင်းဆောင်ရွက်ကြသည်။

 ထို့နောက် မြို့တော်ဝန်နှင့် တာဝန်ရှိသူများသည် အောင်မြေသာစံမြို့နယ်၊ ရေကြည်မြောင်းအတွင်းမှ မြောင်းစာအမှိုက်သရိုက်များကို HITACHI-70 နှင့် E-35 စက်ယန္တရားများ အသုံးပြု၍ ၈၉ လမ်းမှ ရေဆိုးစစ်ကန်အထိ သယ်ယူရှင်းလင်းနေမှုကို ကြည့်ရှုစစ်ဆေးပြီး သန့်ရှင်းရေးဌာနခွဲမှူးနှင့် တာဝန်ရှိသူများအား လုပ်ငန်းလိုအပ်ချက်များ ဖြည့်ဆည်းမှာကြားသည်။

 ၎င်းနောက် မြို့တော်ဝန်နှင့် တာဝန်ရှိသူများသည် ချမ်းအေးသာစံမြို့နယ်၊ ၈၄ လမ်း၊ ၂၆ လမ်းနှင့် ၂၇ လမ်းကြားရှိ အဆင့်မြင့်ဈေးချိုတော် စတုတ္ထထပ်ရှိ လစ်လပ်နေရာကို ကြည့်ရှုစစ်ဆေးပြီး ဈေးအကျိုးတော်ဆောင်အဖွဲ့ဝင်များ၊ ဈေးနှင့်သားသတ်ဌာနမှူးနှင့် တာဝန်ရှိသူများတွေ့ဆုံ၍ ဈေးဖွံ့ဖြိုးသာယာရေးနှင့် အများပြည်သူအကျိုးရှိနိုင်မည့်လုပ်ငန်းများ ဆောင်ရွက်နိုင်ရေးအတွက် ဆွေးနွေးညှိနှိုင်းခဲ့၍ စနစ်တကျအကောင်အထည်ဖော် ဆောင်ရွက်သွားမှာဖြစ်ကြောင်း မြို့တော်ဝန်က တာဝန်ရှိသူများအား ဆွေးနွေးပြောကြားသည်။

 ယင်းနောက် မြို့တော်ဝန်နှင့် တာဝန်ရှိသူများသည် ၈၄ လမ်းအရှေ့ဘက်ခြမ်း၊ ၂၆ လမ်းမှ ၂၈ လမ်းအထိ ရေသွားအကျယ် ၂ ပေခွဲ၊ အရှည်ပေ ၁၄၀၀၊ မြောင်းတူးဖော်နေမှုကို ကြည့်ရှုစစ်ဆေးရာ လုပ်ငန်းများဆောင်ရွက်နေမှုနှင့် ၂၇ လမ်းနှင့် ၈၄ လမ်းထောင့်နေရာတွင် အရှည် ၆၅ ပေနှင့် ရေသွားအကျယ် ၃ ပေရှိ တံတား တစ်စင်း တည်ဆောက်သွားမည့်လုပ်ငန်းများကို လမ်းတံတားဌာန တာဝန်ခံ အင်ဂျင်နီယာများက ရှင်းလင်းတင်ပြကြရာ မြို့တော်ဝန်က လုပ်ငန်းလိုအပ်ချက်များကို ဖြည့်ဆည်းမှာကြားခဲ့သည်။