၂၀၁၈ ခုနှစ်၊ ဧပြီလ ၁၀ ရက်

 မြန်မာ့ရိုးရာယဉ်ကျေးမှုမဟာသင်္ကြန်ပွဲတော်ကျင်းပရေး လုပ်ငန်းညှိနှိုင်းအစည်းအဝေးကိုကို ဧပြီလ ၁၀ ရက် နံနက် ၉ နာရီက မန္တလေးမြို့တော်စည်ပင် သာယာရေးကော်မတီ အစည်းအဝေးခန်းမ၌ ကျင်းပသည်။

 ရှေးဦးစွာ ပွဲတော်ကျင်းပရေးဗဟိုကော်မတီဥက္ကဋ္ဌ၊ မန္တလေးမြို့တော်ဝန် စည်ပင်သာယာရေးဝန်ကြီးဌာန ဝန်ကြီး ဒေါက်တာရဲလွင်က အဖွင့်အမှာစကား ပြောကြားရာတွင် လမ်းလျှောက်သင်္ကြန်ကို မန္တလေးမြို့တော်က စတင်ကျင်းပခဲ့ပြီး အောင်မြင်စွာကျင်းပနိုင်ခဲ့သည့်အတွက် ယခုနှစ်တွင် အခြားတိုင်းနှင့် ပြည်နယ်များကလည်း ကျင်းပလာကြခြင်းအတွက် ဝမ်းမြောက်ဂုဏ်ယူရမှာဖြစ်ကြောင်း၊ လမ်းလျှောက်သင်္ကြန်ဖြစ်ပေါ်လာရခြင်းသည်လည်း ယခင်က ကျင်းပခဲ့သည့် သင်္ကြန်များတွင် ယာဉ်ကြောပိတ်ဆို့မှုတွေရှိခဲ့ကြောင်း၊ မဏ္ဍပ်တစ်ခုနှင့်တစ်ခုအကြား ကြာရှည်စွာစောင့်ဆိုင်းခဲ့ရပြီး အချိန်သာကုန်ဆုံး သွား ကြောင်း စည်ပင်သာယာတစ်ခုတည်းဖြင့် လမ်းလျှောက်သင်္ကြန်ဆောင်ရွက်၍ မရဘဲ အဘက်ဘက်က ဝိုင်းဝန်းပံ့ပိုးပေးသည့်အဖွဲ့အစည်းများက မိမိတို့၏ စေတနာအရင်းခံဖြင့် လာရောက်ကူညီပေးကြသည့်အတွက်လည်း ကျေးဇူးတင်ရှိပါကြောင်း၊ စည်ပင်သာယာကလည်း အမြဲတမ်းကြိုးစား ဆောင်ရွက် လျက်ရှိပြီး ယခင်နှစ်လမ်းလျှောက်သင်္ကြန်မှာ ထီးများနှင့်အလှဆင်ထားသလို ယခုနှစ်တွင်လည်း တစ်မူထူးခြားအောင် စီစဉ်ထားရှိပါကြောင်း ဖြင့် ပြော ကြားသည်။

 ထို့နောက် အခွန်ဌာန ဒုတိယဌာနမှူးက ကျုံးပတ်လည်ရေကစားမဏ္ဍပ်များ နေရာချထားမှုအခြေအနေများကိုလည်းကောင်း၊ ယာဉ်ထိန်းရဲတပ်ဖွဲ့မှ တာဝန် ရှိသူများက ယာဉ်ကြောပိတ်ဆို့မှုမရှိစေရေး လုပ်ငန်းဆောင်ရွက်ထားရှိမှုအခြေအနေများကိုလည်းကောင်း၊ အမျိုးသားယဉ်ကျေးမှုနှင့်အနုပညာ တက္ကသိုလ် (မန္တလေး)၊ အခြေစိုက်တိုင်းရင်းသားလူမျိုးစုများအဖွဲ့၊ ကျောက်ဆည်အကအဖွဲ့၊ ဝင်းခင်းအဖွဲ့တို့က မိမိတို့ကဏ္ဍအလိုက် ဖျော်ဖြေမည့်အစီအစဉ် များကို ရှင်းလင်းတင်ပြရာ မြို့တော်ဝန်က လုပ်ငန်းလိုအပ်ချက်များကို ဖြည့်ဆည်းမှာကြားသည်။

 ယင်းနောက် ဆပ်ကော်မတီ(၁၁)ခုက မိမိတို့ ဆပ်ကော်မတီအလိုက် ဆောင်ရွက်ရမည့် လုပ်ငန်းများပြီးစီးမှုအခြေအနေနှင့် ဆက်လက်ဆောင်ရွက်မည့် အစီအစဉ်များကို ရှင်းလင်းတင်ပြရာ ဆပ်ကော်မတီအလိုက် ပေါင်းစပ်ညှိနှိုင်းရမည့်လုပ်ငန်းများကို ညှိနှိုင်းဆောင်ရွက်ကြပြီး လိုအပ်သည်များကို မြို့တော်ဝန်နှင့် တာဝန်ရှိသူများက ဖြည့်ဆည်းဆွေးနွေးဆောင်ရွက်ပေးခဲ့ကြသည်။