၂၀၁၈ ခုနှစ် မေလ ၁၄ ရက်

 ယာဉ်စည်းကမ်း၊ လမ်းစည်းကမ်းနှင့် လုံခြုံရေးဆိုင်ရာကိစ္စများကို အထောက်အကူဖြစ်စေရန်အတွက် မန္တလေးမြို့ရှိ SCATS စနစ်သုံး မီးပွိုင့်နေရာများတွင် CCTV ပုံရိပ်ဖမ်း ကင်မရာများအပါအဝင် ယာဉ်နံပါတ်ကိုမှတ်၍ ခြေရာခံနိုင်သည့် ကင်မရာ အလုံး ၁၀၀ ကျော်ကို ထပ်တိုး၍ တပ်ဆင်နေသည်။

 မြို့တော်ဧရိယာအတွင်း SCATS စနစ်သုံး မီးပွိုင့် ၃၂ ခုရှိကာ ယင်းမီးပွိုင့်တိုင်းတွင် မီတာ ၂၀ အထိ Zoom ဆွဲနိုင်၊ ၃၆၀ ဒီဂရီ လှည့်ကြည့်နိုင်သည့် Dome ကင်မရာတစ်လုံးစီကို မူလက တပ်ဆင်ထားပြီး လမ်းကြောအားလုံးကို Cover ဖြစ်စေရန်အတွက် အဆိုပါ CCTV များကို ထပ်မံတိုးချဲ့ တပ်ဆင်ခြင်း ဖြစ်သည်။

 SCATS မီးပွိုင့်အားလုံးရဲ့ ဝန်းကျင်မှာ တိုင်ထောင်ပြီး ထပ်တပ်မှာဖြစ်သည်။ မြေပြင်မှာတော့ အကုန်တပ်ပြီးပြီဖြစ်သည်။ ဖိုင်ဘာကြိုးလိုင်းဆက်သွယ်ပြီး Server Room ထိုင်ဖို့ပဲ ကျန်တော့သည်။ SCATS မီးပွိုင့်များအနီးတွင် သီးသန့်တိုင်ထောင်၍ CCTV အလုံးပေါင်း ၁၃၀ ကျော်ကို လမ်းကြောတိုင်း မှတ်တမ်းယူနိုင်ရန် တပ်ဆင်ပြီးစီးနေပြီး ယင်းတွင် Speed Dome ကင်မရာ ၁၁ လုံး၊ Run the red light ၂၁ လုံး၊ License Plate Recognition ၁၁၇ လုံး စသည်ဖြင့် ပါဝင်သည်။

 Dome CCTV တွေက ဖမ်းတဲ့ပုံတွေအပြင် အခုတပ်မယ့် ကင်မရာတွေက လေးဖက်လေးတန် မြင်နိုင်မယ်။ ကားနံပါတ်ပြားကို Memory မှတ်ထားနိုင်တဲ့ အတွက် ယာဉ်တွေရဲ့ မှတ်တမ်းကို နေ့အလိုက် ပြန်ရှာပြီး ကားရှိတဲ့နေရာကို ရှာနိုင်သည်။ ယာဉ်စည်းကမ်းဖောက်ဖျက်မှုများကိုလည်း မှတ်တမ်းယူ၍ သက်ဆိုင်ရာကို ဆက်သွယ်ပေးပို့နိုင်ကြောင်း မှုခင်းနှင့် မတော်တဆ ထိခိုက်မှုဖြစ်စဉ်များအတွက် Data များကို Update ပို့နိုင်သည်။

 မြို့တော်စည်ပင်က ဆောင်ရွက်ထားသည့် SCATS(Sydney Coordinated Adaptive Traffic System)မီးပွိုင့်ဆိုသည်မှာ ယာဉ်ကြောတွင် မော်တော် ယာဉ် ရှိ၊ မရှိကို ကတ္တရာလမ်းတွင် ဖောက်ထွင်းတပ်ဆင်ထားသည့် Inductive Loop Sensor များမှ အာရုံခံကာ ယာဉ်ကြောရှင်းသည့်ဘက်တွင် အချိန် လျှော့၍ ကြပ်သည့်ဘက်တွင် အချိန်ပိုပေးခြင်းကို အလိုအလျောက် ဆောင်ရွက်ပေးသည်။ လျှပ်စစ်မီးပြတ်တောက်ပါက ၂၄ နာရီ အသုံးပြုနိုင်သည့် UPS စနစ်ပါဝင်ပြီး မီးပွိုင့်များတွင် CCTV ကင်မရာများတပ်ဆင်၍ ဗဟိုထိန်းချုပ်ခန်းက ယာဉ်ကြောအခြေအနေများ စီမံခန့်ခွဲနိုင်သည်။ အရည်အသွေးမြင့် Full HD ပုံရိပ်များကို တစ်လအထိ သိမ်းထားနိုင်သည့်စနစ်ဖြစ်သည်။ ယင်းစနစ်မှ ကင်မရာများသည် ယာဉ်ကြောအားလုံးအတွက် Cover ဖြစ်စေရန် လုံလောက်မှုမရှိသေးသည့်အတွက် ထပ်မံတိုးချဲ့သည့်အနေဖြင့် အဆင့်မြင့်ကင်မရာများကို တပ်ဆင်ခြင်းဖြစ်ပြီး ယင်းတို့ကို ဇွန်လနှောင်းပိုင်းတွင် စတင်လည်ပတ်နိုင်ရန် ကြိုးစားဆောင်ရွက်နေပါသည်။