၂၀၁၈ ခုနှစ် မေ ၂၇ ရက်

 မန္တလေးမြို့တော်စည်ပင်သာယာရေးကော်မတီမှ ကြီးမှူးဆောင်ရွက်သည့် မန္တလေးမြို့တော် သန့်ရှင်းရေးနေ့ စုပေါင်းအမှိုက်ကောက်ပွဲကို မေလ ၂၇ ရက် နံနက် ၆ နာရီခွဲက တံခွန်တိုင် အဝိုင်းပတ်မှ တိုးဂိတ်အထိ၊ ရန်ကုန်-မန္တလေး အမြန်လမ်းမကြီး လမ်းဘေး ဝဲ၊ ယာ တစ်လျှောက် ဆောင်ရွက်ကြသည်။

 စုပေါင်းအမှိုက်ကောက်ပွဲသို့ မန္တလေးမြို့တော်စည်ပင်သာယာရေးကော်မတီ ဒုတိယဥက္ကဋ္ဌ ဒုတိယမြို့တော်ဝန် ဦးရဲမွန်၊ ကော်မတီဝင်များ၊ ဌာနမှူးများ၊ မြို့နယ်အထွေထွေအုပ်ချုပ်ရေးဦးစီးဌာန၊ မန္တလေးမြို့တော်စည်ပင်သာယာရေးကော်မတီ သန့်ရှင်းရေးဌာန ဝန်ထမ်းများ၊ လူမှုကူညီရေးအသင်း (၈)ခု၊ ကိုယ်ပိုင်ကျောင်း (၃)ကျောင်းမှ ကျောင်းသား၊ ကျောင်းသူများ၊ မီးသတ်တပ်ဖွဲ့ဝင်များ၊ NLD ပါတီဝင်များ၊ ကြက်ခြေနီတပ်ဖွဲ့ဝင်များ၊ အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်းဝင်များ၊ ရပ်ကွက်သူ၊ ရပ်ကွက်သားများ၊ စုစုပေါင်းအင်အား (၅၁၅)ဦး စုပေါင်းအမှိုက်ကောက်ကြရာ မြို့နယ်သန့်ရှင်းရေးအဖွဲ့များက ချစ်စရာ အရုပ်လေးများဖြင့် ဧည့်ခံဖျော်ဖြေကြသည်။

 ရှေးဦးစွာ ရန်ကုန်-မန္တလေး အမြန်လမ်းမကြီး၊ တံခွန်တိုင် အဝိုင်းအနီး စုရပ်မှ ပရဟိတအသင်းဝင်များ၊ ကိုယ်ပိုင်ကျောင်းများမှ ကျောင်းသား၊ ကျောင်းသူများ၊ ရပ်ကွက်ပြည်သူများ၊ မီးသတ်တပ်ဖွဲ့ဝင်များ၊ NLD ပါတီဝင်များ၊ ကြက်ခြေနီတပ်ဖွဲ့ဝင်များ၊ အမျိုးသမီးရေးရာအဖွဲ့ဝင်များ၊ မိခင်နှင့်ကလေးစောင့်ရှောက်ရေးအသင်းဝင်များ၊ စိတ်ပါဝင်စားသူများသည် တံခွန်တိုင် ဂိတ်အထိ လမ်းဘေး ဝဲ၊ ယာ လမ်းလယ်ကျွန်းများအတွင်းမှ အမှိုက်များ ကောက်ခြင်း၊ အမှိုက်သိမ်းကားပေါ်သို့ စနစ်တကျ စွန့်ပစ်ခြင်းများ ဆောင်ရွက်ကြသည်။

 အပတ်စဉ် တနင်္ဂနွေနေ့တိုင်း မန္တလေးမြို့တော် သန့်ရှင်းရေးနေ့ စုပေါင်းအမှိုက်ကောက်ပွဲကို ပြည်သူလူထု ပူးပေါင်းပါဝင်၍ အမှိုက်ကို စနစ်တကျ ထုတ်ပိုးတတ်လာစေရန်၊ စနစ်တကျ သိမ်းဆည်း၍ သတ်မှတ်နေရာတွင် စွန့်ပစ်တတ်စေရန် ရည်ရွယ်ချက်ဖြင့် ကျင်းပခဲ့ရာ ယခုအကြိမ်သည် အဋ္ဌမအကြိမ်မြောက်ဖြစ်သည်။