၂၀၁၈ ခုနှစ်၊ ဇူလိုင်လ ၈ ရက်

 မန္တလေးမြို့တော်စည်ပင်သာယာရေးကော်မတီက ကြီးမှူးကျင်းပသည့် မန္တလေးမြို့တော် သန့်ရှင်းရေးနေ့ (၁၄)ကြိမ်မြောက် စုပေါင်းအမှိုက်ကောက်ပွဲကို ဇူလိုင် ၈ ရက် နံနက် ၆ နာရီက ချမ်းအေးသာစံမြို့နယ်၊ သီရိဟေမာအနောက်ရပ်ကွက်၊ ၂၆ လမ်းမှ လမ်း ၃၀ အထိ၊ သင်္ဂဇာချောင်းအရှေ့ဘက် ပတ်လမ်း တစ်လျှောက်တွင် ပြုလုပ်ရာ မန္တလေးမြို့တော်ဝန် စည်ပင်သာယာရေးဝန်ကြီးဌာန ဝန်ကြီး ဒေါက်တာ ရဲလွင် တက်ရောက်ပါဝင်ဆောင်ရွက်သည်။

 စုပေါင်းအမှိုက်ကောက်ပွဲသို့ မန္တလေးမြို့တော်စည်ပင်သာယာရေးကော်မတီ ဒုတိယဥက္ကဋ္ဌ ဒုတိယမြို့တော်ဝန် ဦးရဲမွန်၊ ကော်မတီဝင်များနှင့် ဌာနမှူးများ၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ကျန်းမာရေးဌာန၊ မြန်မာနိုင်ငံရဲတပ်ဖွဲ့၊ သဘာဝပတ်ဝန်းကျင်ထိန်းသိမ်းရေးဦးစီးဌာန၊ မြို့နယ်စည်ပင် သာယာအုပ်ချုပ်ရေးမှူးနှင့် သန့်ရှင်းရေးဌာနမှ အရာထမ်း၊ အမှုထမ်း ဝန်ထမ်းများ၊ NLD ပါတီဝင်များ၊ မီးသတ်နှင့် ကြက်ခြေနီတပ်ဖွဲ့ဝင်များ၊ စံသရဖူနှင့် ပင်မကိုယ်ပိုင်အထက်တန်းကျောင်းမှ ကျောင်းသား၊ ကျောင်းသူများ၊ ရပ်ကွက်အုပ်ချုပ်ရေးမှူးနှင့် ရာအိမ်မှူး၊ ဆယ်အိမ်မှူး၊ အကွက်မှူးများ၊ ရပ်ကွက် ပြည်သူများ စုစုပေါင်းအသင်းအဖွဲ့ (၂၃)ဖွဲ့မှ အင်အား ၃၈၀ ကျော် အမှိုက်ကောက်ပွဲကို တပျော်တပါး ပါဝင်ဆင်နွှဲကြသည်။

 ရှေးဦးစွာ ၂၆ လမ်းနှင့် သင်္ဂဇာချောင်းဆုံ စုရပ်မှ သင်္ဂဇာချောင်းအရှေ့ဘက် ပတ်လမ်းတစ်လျှောက် မြို့တော်ဝန်နှင့် တာဝန်ရှိသူများက ဦးဆောင်ကာ လမ်း ၃၀ အထိ လမ်းဘေး ဝဲ၊ ယာရှိ အမှိုက်များကို စုပေါင်းကောက်ယူသိမ်းဆည်းကာ အမှိုက်ကားပေါ်သို့ စနစ်တကျ စွန့်ပစ်ခြင်းများ ဆောင်ရွက်ကြ သည်။ အမှိုက်သိမ်းအိတ်နှင့် လက်အိတ်များကို မြို့တော်စည်ပင်သန့်ရှင်းရေးဌာနကလည်းကောင်း၊ အလှူရှင်သုဂတိ လူမှုကူညီစောင့်ရှောက်ရေးအသင်း က လက်ဖက်ရည်နှင့် ထပ်တရာတို့ကိုလည်းကောင်း အမှိုက်ကောက်ပွဲ ပါဝင်ဆင်နွှဲကြသူများအား ကုသိုလ်ပြုလှူဒါန်းကြသည်။

 မန္တလေးမြို့တော်စည်ပင်သာယာရေးကော်မတီအနေဖြင့် သင်္ဂဇာချောင်း သန့်ရှင်း၊ သာယာ၊ လှပရေးအတွက် ချောင်းတစ်လျှောက် ပတ်ဝန်းကျင် ရပ်ကွက်နေပြည်သူများအား အမှိုက်များ စနစ်တကျ စွန့်ပစ်ရေး၊ စွန့်ပစ်အမှိုက်များ ရှင်းလင်းသိမ်းဆည်းရေးတို့အတွက် အသိပညာပေး ဆွေးနွေး ဟောပြောပွဲများကို ကျင်းပသွားရန် စီမံချက်ချမှတ်ဆောင်ရွက်သွားမည်ဖြစ်ကြောင်းနှင့် ပြည်သူလူထုပူးပေါင်းပါဝင်လာပြီး အမှိုက်များကို ခွဲခြားစွန့်ပစ် တတ်စေရန်၊ အမှိုက်ကို စနစ်တကျ ထုပ်တတ်လာစေရန်နှင့် စနစ်တကျ သိမ်းဆည်း၍ သတ်မှတ်နေရာများတွင် စွန့်ပစ်တတ်စေရန် ရည်ရွယ်ချက်များဖြင့် အမှိုက်ကောက်ပွဲများ ကျင်းပရခြင်းဖြစ်သည်။ စုပေါင်းအမှိုက်ကောက်ပွဲများကို မန္တလေးမြို့တော်၏ သမိုင်းဝင် အထင်ကရနေရာများ၊ ရှေးဟောင်း ယဉ်ကျေးမှုနယ်မြေ၊ နိုင်ငံခြားသားများ ဝင်ရောက်လေ့ရှိသော နေရာများ၊ ပညာရေးနှင့် သက်ဆိုင်သော တက္ကသိုလ်များ၊ မြို့အဝင်၊ မြို့အထွက် အကျည်းတန်သော နေရာများ၊ မီးရထားဘူတာရုံနှင့် သံလမ်းတစ်လျှောက်တို့တွင် အပတ်စဉ် တနင်္ဂနွေနေ့တိုင်း အလှည့်ကျစနစ်ဖြင့် စုပေါင်းအမှိုက်ကောက်ပွဲများ ကို  ဆက်လက်ကျင်းပပြုလုပ်သွားမည်ဖြစ်သည်။