၂၀၁၇ ခုနှစ် အောက်တိုဘာလ ၂၈ ရက်

 စီမံကိန်းနှင့်ဘဏ္ဍာရေးဝန်ကြီးဌာန၊ မြန်မာ့လယ်ယာဖွံ့ဖြိုးရေးဘဏ်၊ စိုက်ပျိုးရေးနှင့် ကျေးလက်ဒေသဖွံ့ဖြိုးရေး နှစ်ဆင့်ချေးငွေ (Two Step Loan)ဖြင့် ဝယ်ယူသည့် လယ်ယာသုံးစက်ကိရိယာများအား မန္တလေးတိုင်းဒေသကြီးအတွင်းရှိ တောင်သူလယ်သမားများသို့ ပေးအပ်ပွဲအခမ်းအနားကို အောက်တိုဘာ ၂၈ ရက် နံနက် ၉ နာရီက ဂရိတ်ဝေါဟိုတယ်တွင် ပြုလုပ်သည်။

 အခမ်းအနားသို့ မန္တလေးတိုင်းဒေသကြီး စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဒေါက်တာစိုးသန်း၊ မြန်မာ့လယ်ယာဖွံ့ဖြိုးရေး ဘဏ်၊ ဦးဆောင်ညွှန်ကြားရေးမှူး ဦးမင်းသူ၊ JICA Myanmar Office မှ Senior Representative Mr.Mamiru Saka ၊ တိုင်းဒေသကြီး၊ ခရိုင်၊ မြို့နယ် အဆင့် ဌာနဆိုင်ရာများမှ တာဝန်ရှိသူများ၊ ဖိတ်ကြားထားသူများ တက်ရောက်ကြသည်။

 မြန်မာနိုင်ငံသည် စိုက်ပျိုးရေးကိုအခြေခံသည့် နိုင်ငံဖြစ်သည့်အတွက် နိုင်ငံ၏လူဦးရေ ၆၀ ရာခိုင်နှုန်းမှာ လယ်ယာလုပ်ငန်းလုပ်ကိုင်သူများ ဖြစ်ကြောင်း၊ လယ်ယာလုပ်ငန်းဖွံ့ဖြိုးတိုးတက်ရေးအတွက် အထွက်နှုန်းကောင်းမွန်ပြီး အရည်အသွေးပြည့်ဝကောင်းမွန်သည့် သီးနှံများကို နိုင်ငံတကာ ဈေးကွက်သို့ ထိုးဖောက်ရောင်းချနိုင်ရန်၊ ထုတ်လုပ်ဖြန့်ဖြူးနိုင်ရန် မြေယာပြုပြင်ခြင်းမှအစပြု၍ ထွန်ယက်စိုက်ပျိုးခြင်း၊ ရိတ်သိမ်းခြွေလှေ့ခြင်း၊ ကြိတ်ခွဲ သိုလှောင်ခြင်း၊ ဈေးကွက်ထိုးဖောက်ခြင်း စသည့် အဆင့်တိုင်းနှင့် ထုတ်လုပ်မှုတိုင်း တိုးတက်အောင် တောင်သူများအတွက် နည်းပညာနှင့် ချေးငွေများ ထောက်ပံ့ပေးရန်လိုအပ်ကြောင်း၊ မြန်မာနိုင်ငံရှိ စီမံကိန်းများကို လိုအပ်သော ချေးငွေအထောက်အပံ့များဖြင့် ပံ့ပိုးကူညီပေးသည့် JICA အား အထူးကျေးဇူးတင်ရှိပါကြောင်း မန္တလေးတိုင်းဒေသကြီး စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဒေါက်တာစိုးသန်းက ပြောသည်။

 ယခုထောက်ပံ့ပေးသည့် JICA ချေးငွေသည် လယ်ယာကဏ္ဍအတွက် လယ်ယာသုံးစက်ကိရိယာများဖြစ်သည့် လက်တွန်းထွန်စက်၊ လယ်ထွန်စက်၊ ရိတ်သိမ်းခြွေလှေ့စက်များ ဝယ်ယူရန်နှင့် လယ်ယာကိုအခြေခံသော စီးပွားရေးလုပ်ငန်းများဖြစ်သည့် ဆန်စက်၊ ဆီစက်၊ စားသောက်ကုန် ထုတ်လုပ်သည့်စက်၊ စက်ရုံ၊ သိုလှောင်ရုံများ၊ တည်ဆောက်မွမ်းမံခြင်းတို့အတွက် ထုတ်ချေးပေးသွားမည်ဖြစ်ရာ ထုတ်လုပ်မှုအဆင့်တိုင်းနှင့် တိုးတက်အောင် ထောက်ပံ့ပေးသည့် ချေးငွေဖြစ်သည်။

 တောင်သူလယ်သမားအနေဖြင့်လည်း အရည်အသွေးကောင်းမွန်သည့် စက်ကိရိယာများ ရွေးချယ်ရာတွင် ဝယ်ယူပြီးနောက် ဝန်ဆောင်မှု ကောင်းသည့်ကုမ္ပဏီများ၊ စက်အပိုပစ္စည်းလွယ်လင့်တကူရနိုင်သည့် စက်အမျိုးအစားများကို ရွေးချယ်ဝယ်ယူရန်လိုကြောင်း၊ ချေးငွေဖြင့်ဝယ်ယူ ထားသည့် လယ်ယာသုံးစက်ကိရိယာများကို လယ်ယာကဏ္ဍ အောင်မြင်ဖွံ့ဖြိုးတိုးတက်အောင် ကြိုးစားဆောင်ရွက်နိုင်ရုံသာမက မိမိတို့ကျေးရွာရှိ အခြားတောင်သူများ၏ လယ်ယာစီးပွားရေးလုပ်ငန်းများတွင်လည်း သက်သာမျှတသည့် ဝန်ဆောင်စရိတ်များဖြင့် အကျိုးပြုပေးစေလိုကြောင်း၊ စက်ကိရိယာများရောင်းချသည့် ကုမ္ပဏီများအနေဖြင့်လည်း စက်ရောင်းချပြီးနောက် လိုအပ်သောဝန်ဆောင်မှု၊ ပံ့ပိုးမှုများကိုပေးရန်လိုအပ်ကြောင်း ထည့်သွင်းပြောကြားခဲ့သည်။

 ဆက်လက်၍ မြန်မာ့လယ်ယာဖွံ့ဖြိုးရေးဘဏ် ဦးဆောင်ညွှန်ကြားရေးမှူး ဦးမင်းသူက စိုက်ပျိုးရေးနှင့် ကျေးလက်ဒေသဖွံ့ဖြိုးရေးနှစ်ဆင့်ချေးငွေ စီမံကိန်း JICA (Two Step Loan)နှင့်စပ်လျဉ်း၍ လည်းကောင်း၊ JICA Myanmar Office မှ Senior Representative Mr.Mamiru Saka က JICA (Two Step Loan)ချေးငွေနှင့်စပ်လျဉ်း၍ လည်းကောင်း ရှင်းလင်းပြောကြားပြီးနောက် ဝန်ကြီးနှင့်တာဝန်ရှိသူများက JICA (Two Step Loan) ချေးငွေဖြင့် လယ်ယာသုံးစက်ကိရိယာဝယ်ယူသည့် တောင်သူများအား စက်ကိရိယာများနှင့်ပတ်သက်သည့် မှတ်တမ်းများကို တောင်သူတစ်ဦးချင်းစီ ပေးအပ်ခဲ့ပြီး ကုမ္ပဏီအသီးသီးက ခင်းကျင်းပြသထားသည့် လယ်ယာသုံးစက်ကိရိယာများအား လှည့်လည်ကြည့်ရှုခဲ့သည်။

 မန္တလေးတိုင်းဒေသကြီးအတွင်းရှိ တောင်သူများ၊ လယ်သမားများအနက်မှ JICA (Two Step Loan) ချေးငွေအစီအစဉ်တွင် ပါဝင်ခွင့်၊ ချေးယူခွင့် ရရှိသည့် တောင်သူ ၉ ဦးမှာ မတ္တရာမြို့နယ်နှင့် ကျောက်ဆည်မြို့နယ်တို့မှ ဖြစ်ကြောင်း၊ ချေးငွေဖြင့် လယ်ယာသုံးစက်ကိရိယာ ၉ မျိုးတွင် Combine Harvester(Kuboat)၊ Tractor ၊ ပုဇဉ်းခေါင်းထော်လာဂျီတို့ ပါဝင်ပြီး တန်ဖိုးငွေကျပ် သိန်း ၂၄၄၄.၅၀ ဖြစ်သည်။

 JICA (Two Step Loan) ချေးငွေရယူရန်ကိစ္စအား ၂၀၁၆ ခုနှစ်၊ ဒီဇင်ဘာ ၁၃ ရက်၌ ကျင်းပပြုလုပ်သော ဒုတိယအကြိမ် ပြည်ထောင်စုလွှတ်တော် တတိယပုံမှန်အစည်းအဝေး သတ္တမနေ့၌ အတည်ပြုခဲ့ပြီး ဘက်စုံဖွံ့ဖြိုးတိုးတက်ရေး၊ စားနပ်ရိက္ခာဖူလုံစေရေးနှင့် ပို့ကုန်မြှင့်တင်နိုင်ရေးတို့အတွက် လယ်ယာကဏ္ဍ၊ မွေးမြူရေးဏ္ဍနှင့် စက်မှုကဏ္ဍများ ဘက်ညီစွာ တိုးတက်လာစေရန်နှင့် လယ်ယာစက်မှုကဏ္ဍ ချိန်ခွင်လျှာညီသည့် စီးပွားရေးပုံစံ ဖော်ထုတ်ရန်၊ တောင်သူများသို့ ကာလရှည်ရင်းနှီးမြှုပ်နှံမှုဆိုင်ရာ ချေးငွေများအလွယ်တကူရရှိစေရန်၊ လယ်ယာကဏ္ဍနှင့် လယ်ယာကဏ္ဍကို အခြေခံ သော စီးပွားရေးကဏ္ဍ၏ ကုန်ထုတ်လုပ်မှုစွမ်းအားများကို ဖွံ့ဖြိုးတိုးတက်လာစေရန်၊ ကျေးလက်ဒေသနှင့်မြို့ပြဒေသ ဟန်ချက်ညီညီဖွံ့ဖြိုးတိုးတက် လာမှုကို အထောက်အကူပြုစေရန် ရည်ရွယ်သည်။

 ချေးငွေထုတ်ချေးမည့်အစီအစဉ်များအနေဖြင့် ၂၀၁၇-၂၀၁၈ဘဏ္ဍာနှစ်တွင် Pilot Project အဖြစ် ၂၀၁၇ ခုနှစ် ဇူလိုင် ၂၃ ရက်က ပြည်မြို့နယ်တွင် စတင်ဆောင်ရွက်ခဲ့ပြီး နေပြည်တော်၊ ပဲခူးတိုင်းဒေသကြီး၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ ဧရာဝတီတိုင်းဒေသကြီးတို့တွင် လည်းကောင်း၊ ၂၀၁၈-၂၀၁၉ ဘဏ္ဍာနှစ်တွင် ကျန်တိုင်းဒေသကြီးနှင့် ပြည်နယ်များအားလုံးတွင် လည်းကောင်း ဆောင်ရွက်သွားမည့် အစီအစဉ်များ ရှိသည်။