၂၀၁၈ ခုနှစ်၊ မေလ ၁၄ ရက်

 စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ ကျေးရွာဖွံ့ဖြိုးရေးစီမံကိန်းရေးဆွဲနည်းသင်တန်းကို မန္တလေး၊ ပြည်ကြီးတံခွန်မြို့နယ်၊ စက်မှုဇုန်(၂)ရှိ မန္တလေးတိုင်းဒေသကြီးကျေးလက်ဒေသဖွံ့ဖြိုးတိုးတက်ရေးဦးစီးဌာနရုံးတွင် မေလ ၁၄ ရက် နံနက် ၉ နာရီ က ဖွင့်လှစ်သည်။

 သင်တန်းတွင် မန္တလေးတိုင်းဒေသကြီးကျေးလက်ဒေသဖွံ့ဖြိုးတိုးတက်ရေးဦးစီးဌာနမှ တာဝန်ရှိသူများ၊ LIFT Fund အဖွဲ့မှ အကြံပေးများ၊ တိုင်းဒေသကြီး ကချင်ပြည်နယ်အတွင်း မြို့နယ်များမှ သင်တန်းသားများ တက်ရောက်ကြသည်။

 “ဒီနှစ် အကောင်အထည်ဖော်မယ့် လုပ်ငန်းပါ။ ဝန်ထမ်းတွေက တစ်ဆင့် ရပ်ရွာမှာ ပြန်သင်တန်းပေးမယ်။ သင်တန်းသား မန္တလေးက ၃၀၊ ကချင်က ၂၀ ပါတယ်။ ငါးရက်သင်တန်းပါ။ စီမံကိန်းအောင်မြင့်ဖို့ ရွာတွေရဲ့ ပူးပေါင်းပါဝင်စည်းလုံးမှု အဓိကကျတာကို ဝန်ထမ်းတွေက ပိုလုပ်ဆောင်ရမှာ၊ အခွင့်အလမ်း သာပေါင်းစည်းနိုင်မယ့် ရွာတွေကို ဦးစားပေးရွေးပါတယ်”ဟု မန္တလေးတိုင်းဒေသကြီးကျေးလက်ဒေသဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူး ဦးမင်းဟန်က ပြောသည်။

 ကျေးလက်နေပြည်သူများကိုယ်တိုင် ကျေးရွာ၏ ပကတိလိုအပ်ချက်များကို ဖော်ထုတ်ပြီး ဦးစားပေးအစီအစဉ်အလိုက် စီမံချက်များ ရေးဆွဲဖော်ထုတ် နိုင်စေရန် ကျေးရွာများ၏ ဦးစားပေးစီမံချက်များအပေါ် အခြေခံ၍ နှစ်စဉ် ရန်ပုံငွေနှင့် ကျေးရွာများမှ ထွက်ပေါ်လာသော စီမံချက်လုပ်ငန်းများအား မြို့နယ် အဆင့် ဦးစီးဌာနအသီးသီး၏ ဖွံ့ဖြိုးရေးအစီအစဉ်များနှင့် ချိတ်ဆက်နိုင်စေရန်ရည်ရွယ်၍ ကျေးရွာဖွံ့ဖြိုးရေးစီမံချက်အား ရေးဆွဲခြင်းဖြစ်ပြီး LIFT Fund အဖွဲ့ ၏ နည်းပညာအကူအညီဖြင့် ကျေးရွာဖွံ့ဖြိုးရေးစီမံကိန်းအား အကောင်အထည်ဖော်နေပါသည်။

 စီမံချက်ရေးဆွဲနိုင်ရန် ၁၄ မြို့နယ်မှ ဝန်ထမ်းနှစ်ဦးစီအား စီမံကိန်းရေးဆွဲနည်းသင်တန်းပို့ချပေးခြင်းဖြစ်ကြောင်း၊ ဝန်ထမ်းများမှတစ်ဆင့် မြို့နယ်များရှိ စီမံကိန်းကျေးရွာများမှ သင်တန်းသား (၂)ဦးအား သင်တန်းပြန်လည်ပို့ချသွားရမည်ဖြစ်ပြီး စီမံကိန်းကျေးရွာများ၏ ကျေးရွာဖွံ့ဖြိုးရေးစီမံကိန်းကိုလည်း ရေးဆွဲရမည်ဖြစ်သည်။

 မန္တလေးတိုင်းဒေသကြီးအတွင်း ၂၀၁၅-၂၀၁၆ ခုနှစ်မှ ၂၀၁၆-၂၀၁၇ ခုနှစ်အထိ ကျေးရွာတစ်ရွာလျှင် နိုင်ငံတော်ထောက်ပံ့ငွေကျပ် သိန်း ၅၀ နှုန်းဖြင့် ကျေးရွာ ၃၀ တွင်လည်းကောင်း၊ ၂၀၁၇-၂၀၁၈ ဘဏ္ဍာနှစ်တွင် ကျေးရွာတစ်ရွာလျှင် နိုင်ငံတော်ထောက်ပံ့ငွေကျပ် သိန်း ၁၀၀ နှုန်းဖြင့် ကျေးရွာ ၉၇ ရွာတွင်လည်းကောင်း ဖွံ့ဖြိုးရေးလုပ်ငန်းများ အကောင်အထည်ဖော်ဆောင်ရွက်ခဲ့ကြောင်း၊ ၂၀၁၇-၂၀၁၈ ဘဏ္ဍာနှစ်တွင် မန္တလေးတိုင်းဒေသကြီးအတွင်း ကျေးရွာပေါင်း ၉၇ ရွာတွင် ဦးစီးဌာနရန်ပုံငွေ ကျပ်သန်း ၉၇၀ နှင့် ကျေးရွာထည့်ဝင်ငွေကျပ် ၅၅၂ သန်းကျော်ဖြင့် ဖွံ့ဖြိုးရေးလုပ်ငန်း ၁၁၅ ခုကို အကောင် အထည်ဖော်ဆောင်ရွက်ခဲ့သည်။

 ၂၀၁၈ ခုနှစ်၊ (၆)လဘတ်ဂျက် (မီနီဘတ်ဂျက်)တွင် မန္တလေးတိုင်းဒေသကြီးအတွင်း ပြင်ဦးလွင်၊ သပိတ်ကျင်း၊ မြစ်သား၊ တံတားဦးမြို့နယ်နှင့် CDD ဆောင်ရွက်နေသော မြို့နယ်များမှအပ ကျန် ၁၄ မြို့နယ်တွင် တစ်မြို့နယ်လျှင် (၁၀)ရွာနှုန်းဖြင့် ကျေးရွာ (၁၄၀)အား စီမံချက် တိုးချဲ့ရေးဆွဲသွား မည်ဖြစ်ကြောင်း၊ (၁၄)မြို့နယ်မှာ အမရပူရ၊ မိုးကုတ်၊ မတ္တရာ၊ စဥ့်ကူး၊ ကျောက်ဆည်၊ စဥ့်ကိုင်၊ ပုသိမ်ကြီး၊ မိတ္ထီလာ၊ ဝမ်းတွင်း၊ သာစည်၊ မလှိုင်၊ မြင်းခြံ၊ တောင်သာ၊ ကျောက်ပန်းတောင်းမြို့နယ်တို့ဖြစ်ကြသည်။