၂၀၁၇ခုနှစ်၊ မတ်လ ၁၈ ရက်

 လူ့စွမ်းအားအရင်းအမြစ်ဖွံ့ဖြိုးတိုးတက်ရေး၊အလုပ်အကိုင်အခွင့်အလမ်းရရှိစေရေးနှင့် ဆောက်လုပ်ရေးလုပ်ငန်းများအတွက် ကျွမ်းကျင်လုပ်သားကောင်း များ ပေါ်ထွန်းလာစေရန် ရည်ရွယ်ချက်ဖြင့် မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်း(မန္တလေးတိုင်းဒေသကြီး)ကကြီးမှူးဖွင့်လှစ်သော ခေတ်မီပန်းရန်နည်းပညာ(အုတ်စီ)ကာလတိုကျွမ်းကျင်မှုအခြေခံသင်တန်း(အခမဲ့)ဖွင့်ပွဲအခမ်းအနားကို ယနေ့နံနက် ၉နာရီက မန္တလေး၊ချမ်းအေးသာစံ မြို့နယ်၊ လမ်း၈၀၊ ၂၆လမ်းနှင့်၂၇လမ်းကြားရှိ မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်း(မန္တလေးတိုင်းဒေသကြီး)အသင်းရုံး၌ ကျင်းပ ပြုလုပ်သည်။

 အခမ်းအနားတွင် မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနဝန်ကြီး ဦးမျိုးသစ်က အဖွင့် အမှာစကားပြောကြားသည်။ ထို့နောက် မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်း(မန္တလေးတိုင်းဒေသကြီး)ဥက္ကဌ ဦးသန်းဝင်းက သင်တန်းဖွင့်လှစ်ရခြင်း ရည်ရွယ်ချက်များကိုလည်းကောင်း၊ ပညာရေးဝန်ကြီးဌာန၊ နည်းပညာမြှင့်တင်ရေးသင်တန်းဌာန ညွှန်ကြားရေးမှူး ဒေါက်တာ နေမျိုးထွန်းက သင်တန်းနှင့်စပ်လျဉ်းပြီး ရှင်းလင်းတင်ပြခြင်း၊ Crown Cement ဒါရိုက်တာ ဒေါက်တာကျော်ရှိန်က ပံ့ပိုးကူညီပေးရခြင်း ရည်ရွယ်ချက်များကို လည်းကောင်း အသီးသီးရှင်းလင်းတင်ပြကြသည်။

 အဆိုပါသင်တန်းတွင် သင်တန်းသား/သူ ၅၅ဦး၊ တက်ရောက်ကြပြီး သင်တန်းကာလမှာ မတ် ၂၈ရက်အထိ ၁၀ရက် ကြာမြင့်မည်ဖြစ်ကြောင်းနှင့် နေ့စဉ် နံနက် ၉နာရီမှ ညနေ ၅နာရီအထိ ကျွမ်းကျင်ဆရာငါးဦးက သင်ကြားပို့ချပေးသွားမည်ဖြစ်သည်။