၂၀၁၇ခုနှစ် စက်တင်ဘာလ ၄ ရက်

 ကျေးရွာပြည်သူများနှင့် ဖက်ဖုံးတောင်ကျောက်ထုတ်လုပ်ငန်းရှင်များတွေ့ဆုံပွဲကို ယနေ့ မွန်းလွဲ ၁နာရီက ပုသိမ်ကြီးမြို့နယ် နှမ်းကြဲကျေးရွာ၌ ကျင်းပသည်။

 အဆိုပါ တောင်တွင် ၂၀၁၄-၂၀၁၅ခုနှစ်မှ စတင်ကာ တရားဝင်ကျောက်ထုတ်လုပ်ခွင့် လိုင်စင်ကို မန္တလေးခရိုင်အထွေထွေအုပ်ချုပ်ရေးဦးစီးဌာန ခွင့်ပြုချက်ဖြင့် လုပ်ဆောင်ခဲ့ပြီး နှစ်စဉ်ဘဏ္ဍာနှစ်အလိုက် သက်တမ်းတိုးခြင်းများကို ပြုလုပ်လျက်ရှိရာ ၂၀၁၇-၂၀၁၈ခုနှစ်အတွက် သက်တမ်းတိုး ဆောင်ရွက်ပါက ဒေသခံပြည်သူများ၏သဘောထားဆန္ဒကို ကောက်ယူပြီး ဆက်လက်ဆောင်ရွက်ရန် ဒေသခံပြည်သူများက တင်ပြထားသည်။

 “သက်တမ်းကုန်ရင် ရပ်ရမယ်။ ရပ်ရမယ်ဆိုတာ သိရက်နဲ့ဆက်လုပ်နေရင် ကျေးရွာဆယ်အိမ်မှူး၊ ရာအိမ်မှူး၊ မြို့နယ်အုပ်ချုပ်ရေးမှူးကနေ ဆင့်ကဲ တိုင်ရမယ်။ သက်တမ်းတိုးနေစဉ်ကာလအတွင်း လုပ်ခွင့်မရှိဘူး။ သက်တမ်းတိုးပေး မပေးဆိုတာက သီးသန့်စုံစမ်းရေးအဖွဲ့လာမယ်။ ဆက်လက် ဆောင်ရွက်နေမယ်ဆိုရင် ဒါဥပဒေကိုချိုးဖောက်လိုက်တာ။ အဲ့ဒီအတွက် ဥပဒေအတိုင်းအရေးယူပါမယ်” ဟု မန္တလေးတိုင်းဒေသကြီး သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး ဦးမျိုးသစ်က ဆက်လက်ပြောသည်။

 ကျောက်ထုတ်လုပ်ခြင်းနှင့်ပတ်သက်ပြီး သဘာဝပတ်ဝန်းကျင်ထိခိုက်မှုများနှင့် ကြုံတွေ့နေရပြီး စမ်းချောင်းများပိတ်ဆို့နေ၍ ကျောက်ထုတ်လုပ်သည့် အခါ ဆူညံသံများ၊ ကျောက်မိုင်းခွဲသံများကြောင့် ဒေသခံများစိုးရိမ်လျက်ရှိကြသည့်အပြင် ဖက်ဖုံးတောင်တွင် သာသနိက အဆောက်အအုံများရှိပြီး ရှေးဟောင်းသမိုင်းဝင်နေမြေတစ်ခုဖြစ်ခြင်းကြောင့် လုံးဝပိတ်သိမ်းပေးရန် ဒေသခံများက တောင်းဆိုထားသည်။

 “ကျွန်တော်တို့ အစိုးရတက်လာပြီးနောက်ပိုင်းမှာ သဘာဝပတ်ဝန်းကျင်ထိန်းသိမ်းရေးကို အဓိကထားပြီးဆောင်ရွက်နေပါတယ်။ ပတ်ဝန်းကျင်နှင့် ဒေသခံပြည်သူတွေ ဘယ်လောက်အထိဆုံးရှုံးနစ်နာသွားကြမလဲ။ ကျွန်တော်တို့အကျိုးအမြတ်ဘယ်လောက်ရမလဲ။ လုပ်ငန်းရှင်တွေကရော စာချုပ်ပါ စည်းကမ်းချက်အတိုင်း လိုက်နာကြရဲ့လား။ ပြုထားတဲ့ဥပဒေအကုန်လုံးဟာ ကျွန်တော်တို့အစိုးရ မားမားမတ်မတ်ရပ်တည်ရမှာဖြစ်ပါတယ်။ အရေးယူမှုအပိုင်းကလဲ ကျွန်တော်တို့အစိုးရ တိတိကျကျဆောင်ရွက်ဖို့လိုပါတယ်။ လုပ်ငန်းရှင်ဆိုလည်း သူတို့ရဲ့ ကတိတွေ၊ စာချုပ်ပါ အချက်အလက်တွေ ဆောင်ရွက်ခြင်းရှိ၊ မရှိ ဒေသခံတွေကလည်း လုံခြုံမှု၊ အေးချမ်းမှု ဒါတွေထိခိုက်လာရင် ကျွန်တော်တို့အစိုးရမှာလည်း တာဝန်ရှိပါ တယ်။ တစ်ဖက်တည်း လုပ်လို့မရပါဘူး။ ဘက်ပေါင်းစုံကြည့်ပြီး ဆောင်ရွက်ရပါမယ်” ဟု ဆက်လက်ပြောပြသည်။

 အဆိုပါ ဖက်ဖုံးတောင် ကျောက်ထုတ်လုပ်ရေးအနေဖြင့် ဇွန်လကုန်မှ စတင်ကာ လိုင်စင်သက်တမ်းပြည့်ခဲ့သော်လည်း ကျောက်ထုတ်လုပ်နေမှုကို ရပ်နားထားခြင်းမရှိဘဲ နေ့စဉ် ကား၊ ထော်လာဂျီအစီး ၂၀၀ ခန့်ဖြင့် ဆက်လက်လုပ်ကိုင်လျက်ရှိသည်။