၂၀၁၇ ခုနှစ်၊ စက်တင်ဘာ ၂၃ ရက်

 ၂၀၁၇-၂၀၁၈ ဘဏ္ဍာရေးနှစ် မန္တလေးမြို့တော်စည်ပင်သာယာရေးကော်မတီ ရေနှင့်သန်ရှင်းမှုဌာန၊ ကမ်းနားလမ်း၊ နှင်းဆီဆောင်၊ အငှားအိမ်ရာ စွန့်ပစ်ရေသန့်စင်မှုလုပ်ငန်းအတွက် အိတ်ဖွင့်တင်ဒါခေါ်ယူခြင်းအခမ်းအနားကို စက်တင်ဘာ ၂၃ ရက် နံနက် ၉ နာရီက မန္တလေးမြို့တော်စည်ပင် သာယာရေးကော်မတီ အစည်းအဝေးခန်းမ၌ ကျင်းပရာ တင်ဒါကော်မတီဥက္ကဋ္ဌ၊ မန္တလေးတိုင်းဒေသကြီး သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန ဝန်ကြီး ဦးမျိုးသစ် တက်ရောက်အမှာစကားပြောကြားသည်။

 အခမ်းအနားသို့ မန္တလေးမြို့တော်စည်ပင်သာယာရေးကော်မတီဝင် ဒေါ်မြင့်မြင်သန်း၊ ဦးခိုင်မြင့်၊ လမ်းတံတားဌာနမှူး ဦးမျိုးအောင်၊ ရေနှင့်သန့်ရှင်းမှု ဌာန ဌာနမှူး ဦးမျိုးသန့်၊ အဆောက်အအုံနှင့်ကုန်ရုံဌာန ဌာနမှူး ဦးဇော်ဝင်းနှင့် စစ်ဆေးရေးဌာန၊ ရေနှင့်သန့်ရှင်းမှုဌာနတို့မှ အရာထမ်း၊ အမှုထမ်း၊ ဝန်ထမ်းများ၊ တင်ဒါဝင်ရောက်ယှဉ်ပြိုင်ကြမည့် ကုမ္ပဏီခုနစ်ခုတို့မှ လုပ်ငန်းရှင်များနှင့်တာဝန်ရှိသူများ တက်ရောက်ကြသည်။

 ရှေးဦးစွာ တင်ဒါကော်မတီဥက္ကဋ္ဌ တိုင်းဒေသကြီးဝန်ကြီး ဦးမျိုးသစ်က အဖွင့်အမှာစကားပြောကြားရာ၌ “စည်ပင်သာယာရေးဆိုင်ရာ တင်ဒါလုပ်ငန်း များကို တိုင်းဒေသကြီးအစိုးရအဖွဲ့၏ တာဝန်ပေးချက်အရ ဆောင်ရွက်လျက်ရှိပါကြောင်း၊ ယခုအိတ်ဖွင့်တင်ဒါခေါ်ယူသည့် ကမ်းနားလမ်း နှင်းဆီဆောင် အငှားအိမ်ရာ စွန့်ပစ်ရေ သန့်စင်မှုလုပ်ငန်းသည် မိမိ၏လက်ရှိဌာန သယံဇာတနှင့်သဘာဝပတ်ဝန်းကျင်ထိန်းသိမ်းရေးလည်း ဖြစ်သည့် အတွက် ယခုတင်ဒါကို စိတ်ပါဝင်စားပါကြောင်း၊ မန္တလေးမြို့တော်ကြီးကို SMART CITY ဖြစ်အောင် ဆောင်ရွက်နေတဲ့အခါမှာ Waste တွေကို ဘယ်လိုရှင်းမလဲဆိုတာကို မိမိတို့အနေဖြင့် တတ်နိုင်သမျှ အကောင်းဆုံးဖြစ်အောင် လုပ်ဆောင်သွားကြမှာဖြစ်ကြောင်း၊ တင်ဒါခေါ်ယူရာတွင် ဝင်ရောက်ယှဉ်ပြိုင်ကြမည့်လုပ်ငန်းရှင်၏ တင်ပြပုံ၊ တင်ပြချက်များအပေါ် ပြန်လည်သုံးသပ်ပြီး ကိုယ့်မြို့အတွက် ပြည်သူရဲ့ငွေတွေကို အတတ်နိုင်ဆုံး၊ တန်ဖိုးအရှိဆုံးဖြစ်အောင် သုံးစွဲသွားမည်ဖြစ်ကြောင်း”စသည်ဖြင့် ပြောကြားသည်။

 ဆက်လက်၍ မန္တလေးမြို့တော်စည်ပင်သာယာရေးကော်မတီဝင် ဒေါ်မြင့်မြင့်သန်းက တင်ဒါခေါ်ယူမှုနှင့်ပတ်သက်၍ ဆွေးနွေးပြောကြားရာတွင် “နှင်းဆီအိမ်ရာ၏ ရေဆိုးသန့်စင်ထုတ်လုပ်မှုလုပ်ငန်းကို အကျိုးအမြတ် အဓိကမထားဘဲ လုပ်ငန်းပြီးစီးသည့်အခါ မြစ်ရေသန့်စင်မှုကို မည်မျှအတိုင်း အတာအထိ အထောက်အပံ့ပေးနိုင်မည်ဆိုသည့် အနေအထားကို ဦးစားပေးဆောင်ရွက်ကြစေလိုကြောင်း”ဖြည့်စွက်ဆွေးနွေးသည်။

 ထို့နောက် ရေနှင့်သန့်ရှင်းမှုဌာန ဌာနမှူး ဦးမျိုးသန့်က တင်ဒါစည်းမျဉ်း၊ စည်းကမ်းများကို ဖတ်ကြားတင်ပြသည်။ ယင်းနောက် တင်ဒါဝင်ရောက် ယှဉ်ပြိုင်ကြသည့် ကုမ္ပဏီခုနစ်ခုက မိမိတို့ဆောင်ရွက်မည့် လုပ်ငန်းအစီအစဉ်များကို အဖွဲ့လိုက် ရှင်းလင်းတင်ပြကြပြီး တင်ဒါရွေးချယ်ခြင်း ဆောင်ရွက်ကြသည်။

 ထို့နောက် တင်ဒါကော်မတီဥက္ကဋ္ဌ တိုင်းဒေသကြီးဝန်ကြီးက ပြည်သူ့ငွေဖြင့် ဆောင်ရွက်မည့်လုပ်ငန်းတစ်ခုဖြစ်သည့်အတွက် အအောင်မြင်ဆုံးနှင့် အကောင်းဆုံးအဖြေထွက်လာစေရန် မျှော်လင့်ပါကြောင်းဖြင့် နိဂုံးချုပ်အမှာစကားပြောကြား၍ အခမ်းအနားကိုရုပ်သိမ်းလိုက်သည်။