၂၀၁၇ ခုနှစ် ဒီဇင်ဘာလ ၂ ရက်

  အပြည်ပြည်ဆိုင်ရာ အမျိုးသမီးများအပေါ် အကြမ်းဖက်မှု ပပျောက်ရေး (၁၆)ရက်တာ လှုပ်ရှားမှုအထိမ်းအမှတ်အဖြစ် ထာဝရဖဲကြိုးဖြူ သံချပ်ပြိုင်ပွဲကို ဒီဇင်ဘာ ၂ ရက် ညနေ ၅ နာရီက မန္တလေး၊ မဟာအောင်မြေမြို့နယ် မနော်ရမ္မံကွင်းတွင် ကျင်းပသည်။

 အဆိုပါ သံချပ်ပြိုင်ပွဲသို့ မန္တလေးတိုင်းဒေသကြီးအစိုးရဖွဲ့ဝင် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး တိုင်းဒေသကြီး အမျိုးသမီးရေးရာကော်မတီဥက္ကဋ္ဌ ဦးမျိုးသစ်၊ အကဲဖြတ်ဒိုင်လူကြီးများ၊ သံချပ်ဝါသနာရှင်များ၊ သံချပ်အသင်းများ၊ ဖိတ်ကြားထားသူများနှင့် တာဝန်ရှိသူများ တက်ရောက်ကြသည်။

 ရှေးဦးစွာ မေတ္တာနှင့် အရိုင်းတို့က ပြိုင်ပွဲကျင်းပရခြင်း ရည်ရွယ်ချက်နှင့် စည်းမျဉ်းစည်းကမ်းများကို ရှင်းလင်းပြောကြားသည်။ ထို့နောက် အောင်စံမောင်သံချပ်အဖွဲ့၊ တမာရိပ်သံချပ်အဖွဲ့၊ စေတနာမွန်သံချပ်အဖွဲ့တို့က ၄၅ မိနစ်စီ ပါဝင်ယှဉ်ပြိုင်ခဲ့ရာ အကဲဖြတ်ဒိုင်လူကြီးများက အမှတ်ပေးကြသည်။ သံချပ်အဖွဲ့များ ယှဉ်ပြိုင်မှုအပြီးတွင် တေးသီချင်းများဖြင့် ဧည့်ခံဖျော်ဖြေခဲ့သည်။ ဒီဇင်ဘာ ၃ ရက် ညနေ ၅ နာရီတွင် ခင်မဒီအဖွဲ့၊ ဥပဒေချစ်သူအဖွဲ့၊ မန်းရွှေပြည်မှ သက်တံ့များ၊ ကာဒိုင်းနှင့် United Women အဖွဲ့တို့က ပါဝင်ယှဉ်ပြိုင်မည်ဖြစ်သည်။