၂၀၁၈ ခုနှစ် ဇန်နဝါရီ ၂၉ ရက်

 လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာန မန္တလေး၊ နားမကြားသောကလေးများ ကျောင်းသို့ အလှူရှင် ဂျပန်နိုင်ငံ Kyoshin ကုမ္ပဏီဥက္ကဋ္ဌ Mr.Sadaaki Tachiki က လှူဒါန်းသည့် အလှူငွေပေးအပ်လှူဒါန်းပွဲကို ဇန်နဝါရီ ၂၈ ရက် နံနက် ၁၀ နာရီက အဆိုပါ ရုံးအစည်းအဝေးခန်းမ၌ ကျင်းပသည်။

 ရှေးဦးစွာ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ ဝင်းမြတ်အေးက အမှာစကားပြောကြားသည်။

 ထို့နောက် ဂျပန်နိုင်ငံ Kyoshin ကုမ္ပဏီဥက္ကဋ္ဌ Mr.Sadaaki Tachiki က လှူဒါန်းရခြင်းအကြောင်းကို ရှင်းလင်းပြောကြားပြီး အမေရိကန်ဒေါ်လာ တစ်သောင်းကို ပေးအပ်လှူဒါန်းရာ ပြည်ထောင်စုဝန်ကြီးက လက်ခံရယူပြီး ဂုဏ်ပြုမှတ်တမ်းလွှာ ပြန်လည်ပေးအပ်သည်။

 ထို့နောက် နားမကြားသောကလေးများ ကျောင်းမှ ကလေးငယ်များက မြန်မာအကများဖြင့် ဖျော်ဖြေခဲ့ရာ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး၊ မန္တလေးတိုင်းဒေသကြီး အမျိုးသမီးရေးရာကော်မတီ နာယက ဒေါက်တာ ယုယုမေ၊ မန္တလေးတိုင်းဒေသကြီးအစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီး အမျိုးသမီးရေးရာကော်မတီဥက္ကဋ္ဌ ဦးမျိုးသစ်တို့က အကအဖွဲ့အား ဂုဏ်ပြုဆုငွေများ ပေးအပ်ချီးမြှင့်သည်။

 ဆက်လက်၍ ပြည်ထောင်စုဝန်ကြီး ဒေါက်တာ ဝင်းမြတ်အေး၊ အမျိုးသမီးရေးရာကော်မတီ နာယက ဒေါက်တာ ယုယုမေနှင့် တာဝန်ရှိသူများက နားမကြားသော ကလေးငယ်များ ကျောင်းအတွင်းရှိ လက်သင်္ကေတပြ ဘာသာစကား စာအုပ်ထုတ်လုပ်ရ်န စီစဉ်နေမှုနှင့် ကွန်ပျူတာသင်တန်း လေ့ကျင့်သင်ကြားနေမှုများ၊ စကားပြောလေ့ကျင့်အခန်း၊ အကြားအာရုံ စမ်းသပ်အခန်းနှင့် စာကြည့်တိုက်တို့ကို လှည့်လည်ကြည့်ရှုအားပေးကာ သက်ဆိုင်ရာ သင်တန်းနည်းပြများအား သိရှိလိုသမျှကို မေးမြန်းဆွေးနွေးခဲ့သည်။

 မွန်းလွဲပိုင်းတွင် ပြည်ထောင်စုဝန်ကြီးနှင့်အဖွဲ့သည် မန္တလေးတိုင်းဒေသကြီး လူမှုဝန်ထမ်းဦးစီးဌာနရုံး၌ မြင်းခြံမြို့နယ်အတွင်းရှိ ကျေးရွာ ၅ ရွာတွင် မိခင်ဝိုင်းများ ဖွင့်ှလှစ်ဆောင်ရွက်နိုင်ရေးအတွက် တာဝန်ရှိသူများနှင့် တွေ့ဆုံညှိနှိုင်းကာ ထောက်ပံ့ငွေများကို ပေးအပ်လှူဒါန်းခဲ့သည်။