၂၀၁၈ ခုနှစ်၊ စက်တင်ဘာလ ၁၀ ရက်


မန္တလေးတိုင်းဒေသကြီး၊ ပြင်ဦးလွင်ခရိုင်၊ မိုးကုတ်ဒေသသို့ နိုင်ငံခြားသားခရီးသွားဧည့်သည်များ သွားလာလည်ပတ်ရာတွင် မန္တလေးတိုင်းဒေသကြီး အစိုးရအဖွဲ့၏ ကြီးကြပ်မှုဖြင့် ခရီးစဉ်တစ်ခုချင်းအလိုက် မန္တလေး-မတ္တရာ-သပိတ်ကျင်း-မိုးကုတ် ကားလမ်းတစ်ခုတည်းကိုသာ အသုံးပြု၍ မိုးကုတ်မြို့ပေါ် တွင်သာ သွားလာလည်ပတ်ခွင့်ပြုကြောင်း မန္တလေးတိုင်းဒေသကြီး အစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဝန်ကြီးက ပြောကြားသည်။
“ပြည်ထောင်စုအစိုးရအဖွဲ့ရဲ့ အစည်းအဝေး(၁၃/၂၀၁၈)မှာ မန္တလေးတိုင်းဒေသကြီး အစိုးရအဖွဲ့၏ ကြီးကြပ်မှုဖြင့် ခရီးစဉ်တစ်ခုချင်းအလိုက် မိုးကုတ်မြို့သို့ နိုင်ငံခြားသားခရီးသွားဧည့်သည်များ သွားလာမယ်ဆိုရင် မန္တလေး-မတ္တရာ-သပိတ်ကျင်း-မိုးကုတ် ကားလမ်းတစ်ခုတည်းကိုသာ အသုံးပြု၍ သွားလာ လည်ပတ်ခွင့်ပြုကြောင်း ဆုံးဖြတ်လိုက်တာပါ”ဟု သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က ပြောသည်။ “အရင်က နိုင်ငံခြားသား ခရီးသွားတွေဟာ မိုးကုတ်မြို့သို့သွားမယ်ဆိုရင် ပြည်ထဲရေးကိုလျှောက်ထားရတယ်၊ ခွင့်ပြုမိန့်ရပါမှ တိုင်းဒေသကြီးအစိုးရက ပြန်လည် ခွင့်ပြုရတာ၊ ကြန့်ကြာမှုတွေရှိခဲ့တယ်၊ အခုတော့ ဟိုတယ်ခရီးကို လျှောက်မယ်၊ သတ်မှတ်ပုံစံမှာ ပြည့်ပြည့်စုံစုံတင်ပြလာတာနဲ့ အမြန်ဆုံးဆောင်ရွက်ပေး မှာပါ၊ အရင်ထက်စာရင်အဆင့်တွေ နည်းသွားပါပြီ၊ ပိုမိုလွယ်ကူအဆင်ပြေစွာသွားလာနိုင်တော့မှာပါ”ဟု ဆက်လက်ပြောသည်။
မိုးကုတ်မြို့သို့သွားရောက်ရန် ကုမ္ပဏီပိုင်ယာဉ်၊ အငှားယာဉ်ဖြင့် ခရီးသွားလာရမည်ဖြစ်ပြီး ဧည့်လမ်းညွှန်လည်း တစ်ပါတည်းအတူလိုက်ပါရမည် ဖြစ်ကြောင်း၊ ဆိုင်ကယ်၊ သုံးဘီးယာဉ်၊ စက်ဘီး၊ ခြေလျင်တို့ဖြင့် ခရီးသွားလာခြင်းကို ခွင့်မပြုကြောင်း၊ မိုးကုတ်မြို့ပေါ်နှင့် မြို့တွင်းခရီးစဉ်များကိုပါ ခွင့်ပြုထားကြောင်းသိရသည်။
“မိုးကုတ်မြို့က ကန့်သတ်နယ်မြေပါ၊ တိုင်းဒေသကြီးအစိုးရရဲ့ ထောက်ခံချက်နဲ့ခွင့်ပြုတာပါ၊ လည်ပတ်မှုအနေနဲ့ မိုးကုတ်မြို့ပေါ်ကိုသာလည်ပတ်ခွင့် ပြုမှာပါ၊ ခရီးလမ်းကြောင်းအနေနဲ့ သွားခဲ့တဲ့လမ်းကြောင်းအတွင်းသာ ပြန်လာရမှာပါ၊ ဗီဇာသက်တမ်းခွင့်ပြုထားတဲ့ကာလအတွင်း ရက်အကန့်အသတ်မရှိ သွားလာလည်ပတ်နိုင်ပါတယ်”ဟု ပြောကြားခဲ့သည်။