၂၀၁၈ခုနှစ်၊ စက်တင်ဘာလ ၁၇ ရက်နေ့

 မန္တလေးတိုင်းဒေသကြီး ကလေးသူငယ်အခွင့်အရေးဆိုင်ရာ ကော်မတီ၏ ဦးဆောင်လမ်းညွှန်မှုဖြင့် World Vision International Myanmar အဖွဲ့က ကလေးသူငယ်များအပေါ် ရုပ်ပိုင်းဆိုင်ရာအကြမ်းဖက်မှုပပျောက်ရေး လူထုအသိပညာပေးအခမ်းအနားကို စက်တင်ဘာလ ၁၇ ရက်နေ့၊ ညနေ ၄ နာရီက ၆၂ လမ်း၊ မနော်ရမ္မံကစားကွင်း၌ ကျင်းပသည်။

 အခမ်းအနားသို့ မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်၊ လွှတ်တော်ကိုယ်စားလှယ်များ၊ ဌာနဆိုင်ရာတာဝန်ရှိသူများ၊ အစိုးရမဟုတ်သောအဖွဲ့အစည်းများမှ တာဝန်ရှိသူများ၊ ကျောင်းသား၊ ကျောင်းသူများ တက်ရောက်ကြသည်။

 “ကမ္ဘာတစ်ဝန်းမှာ ကလေးသူငယ်တွေဟာ နည်းမျိုးစုံနဲ့ လွဲမှားစွာပြုကျင့်ခံနေရတာနဲ့ အခွင့်အရေးများပြည့်မီစွာ မရရှိနိုင်မှုဟာ အဓိကအရေးကြီးတဲ့ ပြဿနာတစ်ရပ်ဖြစ်နေတယ်။ ကလေးသူငယ်တစ်ဦးချင်းနဲ့ သူတို့ရဲ့မိသားစုဝင်တွေ၊ ရပ်ရွာလူ့အဖွဲ့အစည်းတစ်ရပ်လုံးကို ထိခိုက်စေပြီး နိုင်ငံတော်ဖွံ့ဖြိုး တိုးတက်မှု လုပ်ဆောင်ချက်တွေမှာ သက်ရောက်နေတာဖြစ်ပါတယ်။

 ကလေးသူငယ်အခွင့်အရေးများဆိုင်ရာ အမျိုးသားကော်မတီနဲ့ တိုင်းဒေသကြီး၊ ပြည်နယ်၊ ခရိုင်၊ မြို့နယ် အဆင့်ကော်မတီတွေကိုပါဖွဲ့စည်းခဲ့ပါတယ်။ UNCRC ရဲ့ အဓိက အခွင့်အရေးလေးရပ်ဖြစ်တဲ့ အသက်ရှင်သန်ခွင့်၊ ဖွံ့ဖြိုးတိုးတက်ခွင့်၊ ကာကွယ်စောင့်ရှောက်ခွင့်နဲ့ ပါဝင်ဆောင်ရွက်ခွင့်စတဲ့ ကလေး သူငယ် အခွင့်အရေးတွေကို ပြည့်မီစွာရရှိနိုင်ရေးအတွက် နိုင်ငံတော်က သက်ဆိုင်ရာအစိုးရဌာနအသီးသီးနဲ့ INGOs၊ NGOs အဖွဲ့အစည်းတွေနဲ့ ပူးပေါင်းဆောင်ရွက်ကြရမှာဖြစ်ပါတယ်’’ ဟု သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အဖွင့်အမှာစကားတွင် ပြောကြား သည်။

 ဆက်လက်၍ World Vision International Myanmar အထက်မြန်မာပြည် ဇုန်နယ်မန်နေ၈ျာ ဦးစရီးလုက ကြိုဆိုနှုတ်ဆက်စကားပြောကြားပြီး ဂုဏ်ပြုမှတ်တမ်းလွှာများပေးအပ်သည်။

 ထို့နောက် ကလေးငယ်များအဖွဲ့က တေးသရုပ်ဖော်များဖြင့်တင်ဆက်ကြသည်။

 ကမ္ဘာ့နိုင်ငံအသီးသီးတွင် နှစ်စဉ် ကလေးသူငယ်ပေါင်းများစွာသည် အကြမ်းဖက်ခြင်းပုံစံမျိုးမျိုးအကြမ်းဖက်ခံနေရပြီး ၄င်းတို့၏ အခြေအနေများကို ကုစား နိုင်ရန်အတွက် နှစ်စဉ် ဒေါ်လာသန်းပေါင်းများစွာ အသုံးပြုဆောင်ရွက်နေကြပြီး ကလေးငယ်များအပေါ် အကြမ်းဖက်သည့် အခြေအနေများ ဆက်လက် မဖြစ်စေရန် ခိုင်မာသည့်နည်းလမ်းများဖြင့် အဖြေရှာလုပ်ဆောင်သွားရန် လိုအပ်လျက်ရှိသည်။

 မြန်မာနိုင်ငံအနေဖြင့် ၁၉၉၁ ခုနှစ်တွင် ကလေးသူငယ်အခွင့်အရေးများဆုင်ရာ ကုလသမဂ္ဂသဘောတူစာချုပ်အဖွဲ့ဝင်နိုင်ငံဖြစ်လာပြီး လက်ရှိတွင် ၁၉၉၃ ခုနှစ် ကလေးသူငယ်ဥပဒေကို ကွန်ဗင်းရှင်းပါအချက်များနှင့် ပိုမိုညီညွတ်စေရန်၊ လူ့အခွင့်အရေးနှင့်ကိုက်ညီစေရန်၊ ခေတ်နှင့်လျော်ညီစေရန် အသစ် ပြန်လည်ရေးဆွဲလျက်ရှိသည်။

 ဥပဒေသစ်တွင် ကလေးသူငယ်များကို မွေးစားခြင်း၊ အခြားသူငယ်များကို မွေးစားခြင်း၊ အခြားနည်းလမ်းဖြင့်ပြုစုဆောင့်ရှောက်ခြင်း၊ အုပ်ထိန်းခြင်းနှင့် ထိန်းသိမ်းစောင့်ရှောက်ခြင်း၊ ပညာရေး၊ ကျန်းမာရေးဆိုင်ရာအခွင့်အရေးများ၊ ကလးသူငယ်များအလုပ်လုပ်ကိုင်ခြင်းနှင့် အဆိုးဝါးဆုံးပုံစံဖြင့် အလုပ်ခိုင်း စေခြင်း၊ ကလေးငယ်များကိုရောင်းချခြင်း၊ ပြည့်တန်ဆာပြုလုပ်စေခြင်း၊ ခေါင်းပုံဖြတ်ခြင်း၊ အကြမ်းဖက်ခြင်း၊ ပြစ်မှုကျူးလွန်သောကလေးငယ်နှင့် သက်သေ များအား အကူအညီနှင့် အကာအကွယ်ပေးခြင်း စသည့်အချက်များကို ပြည့်စုံစွာထည့်သွင်းရေးဆွဲထားသည်။

 အစီအစဉ်အရ နိုင်ငံကျော်တေးသံရှင် စောဖိုးခွားနှင့်အဖွဲ့က တေးသီချင်းများဖြင့် ဖျော်ဖြေတင်ဆက်ပြီး ဥာဏ်စမ်းပဟေဠိအဖြေညှိခြင်းအစီအစဉ်များ၊ အသိပညာပေးပြခန်းများ ပြသဆောင်ရွက်သည်။

 ဆောင်ပုဒ်မှာ “တို့တစ်တွေအားလုံးပါဝင်လို့၊ ကလေးများအပေါ်ရုပ်ပိုင်းဆိုင်ရာအကြမ်းဖက်မှုရပ်တန့်စို့’’ ဖြစ်သည်။