၂၀၁၈ ခုနှစ်၊ ဒီဇင်ဘာလ ၃ ရက်

 မန္တလေးမြို့တော်စည်ပင်သာယာရေးကော်မတီပိုင် မဟာအောင်မြေမြို့နယ်၊ ၆၂ လမ်း၊ ၃၆ လမ်းနှင့် ၃၇ လမ်းကြားရှိ ယခင် နဒီမြန်မာဟိုတယ်နှင့် ပြည်ကြီးမျက်ရှင်ကားကြီးဝင်းအနီး အကျယ်အဝန်းစုစုပေါင်း ၃ ဒသမ ၁၅၆ ဧကတွင် မြို့ပြဖွံ့ဖြိုးတိုးတက်ရေးအတွက် နိုင်ငံတကာအဆင့်မီ တည်ဆောက်ရေး စီမံကိန်း အကောင်အထည်ဖော်ဆောင်ရွက်ရန် အခြေအနေများကို မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေး ဝန်ကြီး ဦးမျိုးသစ်၊ တိုင်းဒေသကြီးလွှတ်တော်ကိုယ်စားလှယ်များဖြစ်ကြသည့် ဦးမြင့်အောင်မိုးနှင့် ဦးဇော်ဇော်အောင်၊ မန္တလေးမြို့တော်စည်ပင်သာယာရေး ကော်မတီ ဒုတိယဥက္ကဋ္ဌ ဒုတိယမြို့တော်ဝန် ဦးရဲမွန်၊ ကော်မတီဝင်ဒေါက်တာ သစ်ဆင်းနှင့် ဦးကျော်ဇောအောင်၊ တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးမင်းအောင်မြင့်စိုး၊ မန္တလေးမြို့တော်စည်ပင်သာယာရေးကော်မတီ သန့်ရှင်းရေးဌာန၊ အဆောက်အအုံနှင့် ကုန်ရုံဌာန၊ အခွန်ဌာနတို့မှ ဌာနမှူး၊ ဒုတိယဌာနမှူးများအဖွဲ့သည် ဒီဇင်ဘာ ၃ ရက် ညနေ ၃ နာရီက ကွင်းဆင်းစစ်ဆေးကြသည်။

 တိုင်းဒေသကြီးဝန်ကြီးနှင့် လွှတ်တော်ကိုယ်စားလှယ်များအား တာဝန်ရှိသူများက နဒီမြန်မာဟိုတယ် ဧရိယာအတွင်းရှိ အဆောက်အအုံများ၏ လက်ရှိ အခြေအနေကို ရှင်းလင်းတင်ပြရာ တိုင်းဒေသကြီးဝန်ကြီးက စီမံကိန်းအကောင် အထည်ဖော်မည့် မြေနေရာဖြစ်၍ ဆောင်ရွက်ရမည့် လုပ်ငန်းကဏ္ဍအလိုက် စီမံဆောင်ရွက်သွားရန် ဖြည့်စွက်မှာကြားသည်။

 ဆက်လက်၍ စီမံကိန်းဧရိယာတွင်ပါဝင်သည့် အဆိုပါဟိုတယ်အရှေ့ဘက် ပြည်ကြီးမျက်ရှင် ကားကြီးဝင်း ဆက်စပ်မြေနေရာကို လှည့်လည်ကြည့်ရှု စစ်ဆေးကြသည်။

 ထို့နောက် မန္တလေးမြို့တော်စည်ပင်သာယာရေးကော်မတီ ခြောက်ထပ်ရုံးအစည်းအဝေးခန်းမ၌ အဆိုပါတည်ဆောက်ရေးစီမံကိန်း အကောင်အထည်ဖော် ဆောင်ရွက်ရန် တင်ဒါခေါ်ယူနိုင်ရေးအတွက် တင်ဒါကော်မတီ၏ ညှိနှိုင်းအစည်းအဝေးကို ဆက်လက်ကျင်းပရာ တင်ဒါကော်မတီ ဥက္ကဋ္ဌ တိုင်းဒေသကြီး ဝန်ကြီးဦးမျိုးသစ်၊ အတွင်းရေးမှူး ဒုတိယမြို့တော်ဝန်ဦးရဲမွန်၊ တင်ဒါကော်မတီဝင်များဖြစ်ကြသည့် တိုင်းဒေသကြီးလွှတ်တော်ကိုယ်စားလှယ်များ၊ တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး၊ မန္တလေးမြို့တော်စည်ပင်သာယာရေးကော်မတီ ဝင်များ၊ သက်ဆိုင်ရာဌာနအလိုက် ဌာနမှူးများ၊ ဒုတိယဌာနမှူးများနှင့် တာဝန်ရှိသူများက တင်ဒါခေါ်ယူရေးအတွက် တင်ဒါ စည်းမျဉ်းစည်းကမ်းဆိုင်ရာများ၊ တည်ဆောက်ရေးကာလ၊ ပြည်တွင်းနှင့် နိုင်ငံခြားသား ရင်းနှီး မြှုပ်နှံမှုလုပ်ငန်းရှင် ဖိတ်ခေါ်ရေးနှင့် စီမံကိန်းဆိုင်ရာ ထည့်သွင်းရမည့် အချက်အလက်များ စသည်တို့ကို အသေးစိတ် ဆွေးနွေးညှိနှိုင်းကြသည်။