၂၀၁၉ ခုနှစ်၊ ဇန်န၀ါရီလ ၁၇ ရက်

 လူမှုရေးရာအသိပညာပေးဆွေးနွေးပွဲကို ဇန်နဝါရီလ ၁၆ ရက် နံနက် ၉ နာရီက မန္တလေးမြို့ လမ်း ၃၀ ရှိ မန္တလေးတိုင်းဒေသကြီး လူမှုဝန်ထမ်း၊ ကယ်ဆယ်ရေးနှင့်ပြန်လည် နေရာချထားရေးဝန်ကြီးဌာန၊ လူမှုဝန်ထမ်းရုံးသင်တန်းခန်းမ၌ ကျင်းပသည်။

 ဆွေးနွေးပွဲသို့ မန္တလေးတိုင်းဒေသကြီးအစိုးရအဖွဲ့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်၊ မန္တလေးတိုင်းဒေသကြီး လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာန ညွှန်ကြားရေးမှူး ဒေါ်ခင်စန်းရီ၊ လွှတ်တော်ကိုယ်စားလှယ်များ၊ မြို့နယ်အမျိုးသမီးကော်မတီဝင်များ သက်ဆိုင်ရာ ဌာနများမှ တာဝန်ရှိသူများ၊ ခရိုင်ကလေးသူငယ်အခွင့်အရေးများဆိုင်ရာ ကော်မတီဝင်များနှင့်ဖိတ်ကြားထားသူများ တက်ရောက်ကြသည်။

 “မြန်မာနိုင်ငံသည် အသွင်ကူးပြောင်းနေသည့် နိုင်ငံတစ်နိုင်ငံဖြစ်သည်နှင့်အညီ နိုင်ငံရေး၊ စီးပွားရေး၊ လူမှုရေးမှအစ ပြန်လည်ပြုပြင်ပြောင်းလဲမှုများနှင့် ကောင်းမွန်သည့် မူဝါဒများ၊ စနစ်များနှင့် အလေ့အကျင့်များကို ဖော်ဆောင်နေကြောင်း၊ နိုင်ငံတော်ကို ဖွံ့ဖြိုးမှုအနည်းဆုံးနိုင်ငံအဖြစ်မှ လွတ်မြောက်ရန် ကြိုးစားဆောင်ရွက်လျက်ရှိရာ လူသားအားလုံး အကျုံးဝင်သော သာတူညီမျှမှုရှိပြီး ရေရှည်တည်တံမှုရှိသည့် လူမှုကာကွယ်စောင့်ရှောက်ရေးစနစ်ဖြင့် ပြည်သူများ လူမှုစီးပွားဘဝမြှင့်တင်ရေး ဆောင်ရွက်ရန်နှင့် ပိုမိုဘေးကင်းလုံခြုံ၍ သဘာဝဘေးအန္တရာယ်များကို ခံနိုင်ရည်ရှိသည့် မြန်မာနိုင်ငံဖြစ်လာစေရန် ရည်ရွယ်ပြီး လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ IGO,INGO အဖွဲ့အစည်းများနှင့် ပူးပေါင်းဆောင်ရွက်လျက်ရှိကြောင်း၊ ဒီမိုကရေစီထွန်းကားသော နိုင်ငံတစ်နိုင်ငံအဖြစ် မျှော်မှန်းထားသည့်အတိုင်းဖြစ်လာစေရန် အမျိုးသမီးနှင့် အမျိုးသမီးငယ်များအနေဖြင့် နယ်ပယ်အသီးသီး တွင် အခွင့်အလမ်းများရရှိမှုသေချာစေရန် လိုအပ်သလို နိုင်ငံရေးနယ်ပယ်နှင့် ဆုံးဖြတ်ချက်ချမှတ်နိုင်သည့် ကဏ္ဍများတွင်လည်း ပါဝင်လာစေရန် စွမ်းဆောင်ရည်မြှင့်တင်ခြင်းများကို အရှိန်အဟုန်မြှင့်ဆောင်ရွက်ကြရမှာဖြစ်ကြောင်း၊ လူတစ်ဦးချင်းစီနှင့် အိမ်ထောင်စုများအား စီးပွားရေးနှင့်လူမှုရေး အန္တရာယ် ကျရောက်နိုင်မှုများကို ကြိုတင်ကာကွယ်ပေးရေး၊ အခြေခံဝန်ဆောင်မှုများနှင့် အခြေခံအဆောက်အအုံများ၊ စီးပွားရေးအခွင့်အလမ်းများကို မြှင့်တင်ပေးရေး၊ ရုတ်တရက်ဝင်ငွေဆုံးရှုံးမှုများနှင့် အရေးပေါ်အခြေအနေများကြောင့်ဖြစ်ပေါ်လာသော လူသားချင်းစာနာထောက်ထားမှုဆိုင်ရာ အခက်အခဲ အကျပ်အတည်းများကို စီမံဖြေရှင်းနိုင်ရေး စသည်တို့ကို အစိုးရက မူဝါဒ၊ လုပ်ထုံးလုပ်နည်း၊ အစီအမံများဖြင့် လူမှုကာကွယ်စောင့်ရှောက်ရေး လုပ်ငန်းစဉ် တစ်ရပ်ကို စနစ်တကျ ချမှတ်အကောင်အထည်ဖော်ဆောင်ရွက်ပေးလျက်ရှိရာ အားလုံးပူးပေါင်း ဆောင်ရွက်သွားကြရန်လိုပါကြောင်း” သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အဖွင့်အမှာစကားတွင် ပြောကြားသည်။

 ဆက်လက်၍ လူမှုဝန်ထမ်းဦးစီးဌာန၊ ညွှန်ကြားရေးမှူး ဒေါ်ခင်စန်းရီက ဆွေးနွေးပွဲနှင့်ပတ်သက်၍ အသေးစိတ်ရှင်းလင်းပြောကြားသည်။

 လူမှုရေးရာအသိပညာပေးဆွေးနွေးပွဲသို့ တက်ရောက်လာသူများအား လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၏ လုပ်ငန်း တာဝန်နှင့် အကောင်အထည်ဖော်ဆောင်ရွက်နေမှုများ၊ ရှေးဦးအရွယ် ကလေးသူငယ်ပြုစုပျိုးထောင်ရေး၊ ဖွံ့ဖြိုးရေးနှင့် ကလေးသူငယ်ကာကွယ် စောင့်ရှောက်ရေးလုပ်ငန်း၊ လူငယ်ဖွံ့ဖြိုးရေးလုပ်ငန်း၊ အမျိုးသမီး ဖွံ့ဖြိုးတိုးတက်ရေးလုပ်ငန်း၊ သက်ကြီးရွယ်အိုများဘဝ မြှင့်တင်ရေးနှင့် စောင့်ရှောက်ရေး လုပ်ငန်း၊ မသန်စွမ်းသူများ ပြုစုစောင့်ရှောက်ရေးလုပ်ငန်း၊ စေတနာ့ဝန်ထမ်းအဖွဲ့အစည်းများအား ထောက်ပံ့ရေးနှင့် ပူးပေါင်းဆောင်ရွက်ရေးလုပ်ငန်း၊ လူမှုကာကွယ်စောင့်ရှောက်ရေးလုပ်ငန်းများကို ကဏ္ဍအလိုက် တာဝန်ရှိသူများက ဆွေးနွေးကြသည်။