၂၀၁၆ ခုနှစ်၊ ဒီဇင်ဘာလ ၂၀ ရက်

 စားသုံးသူအငြင်းပွားမှုဖြေရှင်းရေး လုပ်ငန်းကော်မတီနှစ်ရပ်တို့၏ လုပ်ငန်းညှိနှိုင်းအစည်းအဝေးကို ဒီဇင်ဘာ ၂၀ ရက် မွန်းလွဲ ၁ နာရီက မန္တလေး၊ ချမ်းအေးသာစံမြို့နယ်၊ စားသုံးသူရေးရာဦးစီးဌာန အစည်းအဝေးခန်းမတွင် ကျင်းပသည်။

 အဆိုပါ အခမ်းအနားတွင် 'တိုင်းဒေသကြီးအတွင်း စားသုံးသူ၊ ထုတ်လုပ်သူ၊ ဖြန့်ဖြူးရောင်းချသူ စတာတွေက ထိတွေ့ဆက်ဆံနေကြသူတွေပါ၊ နိုင်ငံကို လေ့လာကြည့်မယ်ဆိုရင် စားသုံးသူတွေဘက်က ရရှိမယ့်အခွင့်အရေး နစ်နာတဲ့ နစ်နာချက်တွေကို စားသုံးသူတွေကိုယ်တိုင် ကာကွယ်ရမှန်း တောင်းဆိုရမှန်းမသိတဲ့ အားနည်းချက်တွေ တွေ့ရပါတယ်။ အဲဒီအားနည်းချက်တွေကို ဖြည့်ဆည်းဆောင်ရွက်နိုင်ဖို့ လုပ်ရပါမယ်'ဟု မန္တလေး တိုင်းဒေသကြီး စားသုံးသူအငြင်းပွားမှုဖြေရှင်းရေးအဖွဲ့ ဥက္ကဋ္ဌ စီမံကိန်းနှင့် ဘဏ္ဍာရေးဝန်ကြီးဌာန ဝန်ကြီး ဦးမြတ်သူက ပြောသည်။

 စားသုံးသူတွေအနေဖြင့် အခွင့်အရေး ချိုးဖောက်ခံရလျှင် စားသုံးသူအငြင်းပွားမှု ဖြေရှင်းရေးအဖွဲ့ FDA ရုံးများတွင် တိုင်ကြားနိုင်သလို online မှ တိုင်ကြားနိုင်ရန် လုပ်ဆောင်ထားပြီး အခွင့်အရေးချိုးဖောက်ခံရခြင်းမှာ အရည်အသွေးမပြည့်မီသော ကုန်ပစ္စည်းများကြောင့်ဖြစ်ကြောင်း စားသုံးသူ အငြင်းပွားမှုဖြေရှင်းရေးအဖွဲ့ ဒုတိယဥက္ကဋ္ဌ ဒေါက်တာအောင်မြင့်က ပြောသည်။

 အဆိုပါ အစည်းအဝေးသို့  မန္တလေးတိုင်းဒေသကြီး စားသုံးသူအငြင်းပွားမှုဖြေရှင်းရေးအဖွဲ့ ဥက္ကဋ္ဌ စီမံကိန်းနှင့် ဘဏ္ဍာရေးဝန်ကြီးဌာန ဝန်ကြီး ဦးမြတ်သူ တက်ရောက်ပြီး စားသုံးသူ၊ ထုတ်လုပ်ရောင်းချသူများအား အသိပညာပေးဆောင်ရွက်ခြင်းများ၊ စားသုံးသူဥပဒေများ ပြည်သူများသို့ အသိပညာပေးခြင်း ဆိုင်ရာကိစ္စရပ်များကို ဆွေးနွေးကြသည်။