၂၀၁၇ ခုနှစ်၊ မတ်လ ၁၇ ရက်

 အသေးစားငွေရေးကြေးရေးအဖွဲ့အစည်းများမှ SME များသို့ MSME ချေးငွေ တိုးမြှင့်ထုတ်ချေးရေး ညှိနှိုင်းအစည်းအဝေးကို မန္တလေးမြို့၊ အောင်မြေသာစံ မြို့နယ်ရှိ မန္တလေးတိုင်းဒေသကြီး အစိုးရအဖွဲ့ရုံး အစည်းအဝေးခန်းမ၌ မတ် ၁၇ ရက် နံနက် ၁၀ နာရီက ကျင်းပပြုလုပ်သည်။

 ရှေးဦးစွာ မန္တလေးတိုင်းဒေသကြီးအစိုးရအဖွဲ့ စီမံကိန်းနှင့်ဘဏ္ဍာရေးဝန်ကြီးဌာန ဝန်ကြီး ဦးမြတ်သူက အဖွင့်အမှာစကားပြောကြားသည်။ ထို့နောက် မန္တလေးတိုင်းဒေသကြီး ငွေရေးကြေးရေးကြီးကြပ်စစ်ဆေးရေးဦးစီးဌာနမှ တိုင်းဒေသကြီးဦးစီးမှူး ဦးပိုဌေးနှင့် မန္တလေးတိုင်းဒေသကြီး စက်မှုကြီးကြပ် စစ်ဆေးရေးဦးစီးဌာနမှ တိုင်းဒေသကြီးဦးစီးမှူး ဦးမျိုးထွဋ်ဆွေတို့က SME လုပ်ငန်း၏ လုပ်ငန်းလိုအပ်ချက် အခြေအနေများကို ရှင်းလင်းတင်ပြသည်။ ၎င်းနောက် SME လုပ်ငန်းရှင်များ၊ SME လုပ်ငန်းဆောင်ရွက်နေသော ဘဏ်များမှ တာဝန်ရှိသူများနှင့် အသေးစားငွေရေးကြေးရေးအဖွဲ့အစည်းများမှ တာဝန်ရှိသူများက အသီသီးဆွေးနွေးခဲ့ကြပြီး ဆွေးနွေးမှုအပေါ် မန္တလေးတိုင်းဒေသကြီးအစိုးရအဖွဲ့၊ စီမံကိန်းနှင့်ဘဏ္ဍာရေးဝန်ကြီးဌာန ဝန်ကြီးက နိဂုံးချုပ် အမှာစကားပြောကြားသည်။

 မန္တလေးတိုင်းဒေသကြီးအတွင်းတွင် ၂၀၁၆-၂၀၁၇ ဘဏ္ဍာနှစ်အတွင်း သေးစားငွေရေးကြေးရေး လုပ်ငန်းလုပ်ကိုင်နေသော အဖွဲ့အစည်းပေါင်း (၄၇)ဖွဲ့ရှိပြီး မန္တလေးအခြေစိုက် (၃၀)ဖွဲ့နှင့် တိုးချဲ့အဖွဲ့(၁၇) ရှိကြောင်းသိရသည်။ အဆိုပါ ညှိနှိုင်းအစည်းအဝေးသို့ မန္တလေးတိုင်းဒေသကြီးအစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး၊ တိုင်းဒေသကြီးအဆင့် ဌာနဆိုင်ရာတာဝန်ရှိသူများ၊ SME လုပ်ငန်းရှင်များ၊ SME လုပ်ငန်းဆောင်ရွက်နေသော ဘဏ်များမှ တာဝန်ရှိသူ များနှင့် အသေးစားငွေရေးကြေးရေးအဖွဲ့အစည်းများမှ တာဝန်ရှိသူများ၊ အသေးစားစီးပွားရေးလုပ်ငန်းရှင်များနှင့် အိမ်တွင်းစီးပွားရေးလုပ်ငန်းရှင်များ တက်ရောက်ကြသည်။