၂၀၁၉ ခုနှစ်၊ ဇူလိုင်လ ၁၀ ရက်

 မိုဘိုင်းလ်ဟန်းဆက်နှင့် ဆက်စပ်ပစ္စည်း ရောင်းချခြင်း၊ ဝန်ဆောင်မှုဆောင်ရွက်ပေးခြင်းတို့အတွက် ဟန်းဆက်နှင့် ငွေရပြေစာများအပေါ်တွင် အခွန်အမှတ် တံဆိပ်ကပ်နှိပ်ရောင်းချစေခြင်းနှင့် စပ်လျဉ်း၍ လုပ်ငန်းရှင်များသို့ ရှင်းလင်းတင်ပြခြင်းအခမ်းအနားကို ဇူလိုင် ၁၀ ရက် မွန်းလွဲ ၁ နာရီက မန္တလေး တိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း MRCCI ၌ ကျင်းပသည်။

 အခမ်းအနားတွင် မန္တလေးတိုင်းဒေသကြီးအစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီးဌာန ဝန်ကြီး ဦးမြတ်သူက ဟန်းဆက်နှင့် ငွေရပြေစာများပေါ်တွင် အခွန်အမှတ်တံဆိပ်ကပ်နှိပ်ရောင်းချစေခြင်းနှင့်စပ်လျဉ်း၍ လုပ်ငန်းရှင်များအား ပြောကြားသည်။

 ထို့နောက် လက်ထောက်ညွှန်ကြားရေးမှူး ဦးတင်ထွန်းက ကျသင့်သည့် ကုန်သွယ်လုပ်ငန်းခွန် ပေးဆောင်ရမည့်အကြောင်း၊ ကုန်သွယ်လုပ်ငန်းခွန် စည်းမျဉ်းများအကြောင်း၊ ငွေရပြေစာပေါ်တွင် အခွန်အမှတ်တံဆိပ် ကပ်နှိပ်ရောင်းချရမည့်အကြောင်း၊ အခွန်အမှတ်တံဆိပ် အမျိုးအစားများအကြောင်းနှင့် ထုတ်ယူရန် နည်းလမ်းများအကြောင်း၊ အခွန်အမှတ်တံဆိပ် ကပ်နှိပ်၍ ကုန်သွယ်လုပ်ငန်းခွန်ကောက်ခံရမည့် ဆောင်ရွက်ချက်များနှင့် ကပ်နှိပ်ရာတွင် လိုက်နာဆောင်ရွက်ရမည့်အကြောင်း၊ အခွန်ပေးသွင်းခြင်းနှင့် အခွန်ခုနှိမ်ပေးသွင်းခြင်းအကြောင်း၊ လိုက်နာဆောင်ရွက်ရန် ပျက်ကွက်ခြင်းအတွက် ပြစ်မှုနှင့် ပြစ်ဒဏ်များအကြောင်းကို အသေးစိတ်ရှင်းလင်းပြောကြားသည်။

 ဆက်လက်၍ MRCCI ၏ ဒုတိယဥက္ကဋ္ဌ ဦးအောင်ဆန်းဝင်း၊ မြန်မာနိုင်ငံ မိုဘိုင်းလ်ဟန်းဆက်လုပ်ငန်းရှင်များအသင်း(မန္တလေးတိုင်းဒေသကြီး)ဥက္ကဋ္ဌ ဦးကျော်မျိုးခိုင်တို့က အခွန်တံဆိပ်ရိုက်နှိပ်ရောင်းချစေခြင်းနှင့်ပတ်သက်၍ ဆွေးနွေးတင်ပြကြရာ တက်ရောက်လာကြသူများ၏ သိလိုသည်များကို သက်ဆိုင်ရာ တာဝန်ရှိသူများက ပြန်လည်ဖြေကြားခဲ့ကြသည်။