၂၀၁၇ ခုနှစ်၊ ဧပြီလ ၄ ရက်

 လျှပ်စစ်နှင့် စွမ်းအင်ဝန်ကြီးဌာန မန္တလေးလျှပ်စစ်ဓာတ်အားပေးရေးကော်ပိုရေးရှင်းနှင့် မန္တလေးမြို့တော်စည်ပင်သာယာရေးကော်မတီတို့ ပူးပေါင်း၍ ကျုံးပတ်လည် သာယာလှပစေရေးနှင့် လုံခြုံရေး၊ ယာဉ်အန္တရာယ်ကင်းရှင်းစေရေး အတွက် မန္တလေးမြို့ပြယုဂ် ကျုံးပတ်လည် လမ်းလယ်ကျွန်းများတွင် နိုင်ငံတကာအဆင့်မီ လမ်းမီးတိုင်များကို ဧပြီလဆန်းပိုင်းစတင်၍ တပ်ဆင်လျက်ရှိသည်။

 ပထမအဆင့်အနေဖြင့် အောင်မြေသာစံမြို့နယ်၊ ၆၆လမ်း၊ ၁၂လမ်းနှင့် ၂၆လမ်းကြားတွင် ပေ ၁၀၀ အကွာ တစ်တိုင်နှုန်းဖြင့် ကွန်ကရစ်ခုံပေါ်တွင် ၉ မီတာအမြင့်ရှိ လမ်းမီးတိုင်များကို မန္တလေးလျှပ်စစ်ဓာတ်အားပေးရေးကော်ပိုရေးရှင်းမှ လျှပ်စစ်အင်ဂျင်နီယာများက အနီးကပ် ကြီးကြပ်ပြီး စင်ကာပူနိုင်ငံအခြေစိုက် Krislite လျှပ်စစ်ပစ္စည်းကုမ္ပဏီမှ ဝန်ထမ်းများ၊ လုပ်သားများဖြင့် သင်္ကြန်ပွဲတော်အမီ မီးလင်းရေး ကြိုးပမ်းဆောင်ရွက် လျက်ရှိသည်။

 လမ်းမီးတိုင်တစ်တိုင်တွင် ၁၁၅ ဝပ်ရှိ LED မီးလုံး နှစ်လုံးပါရှိ၍ ၆၆လမ်း၊ ၁၂လမ်းနှင့် ၂၆လမ်း ကျူံးအရှေ့ဖက်ခြမ်းတွင် အလူမီနီယံသတ္တုစပ် အမျိုးအစား မီးတိုင် ၇၅ တိုင်ရှိပြီး LED ၁၁၅ ဝပ် မီးလုံး ၁၅၀ လုံး တပ်ဆင်သွားမည်ဖြစ်သည်။ တပ်ဆင်နေသော LED မီးလုံးများသည် လျှပ်စစ် ဓာတ်အားယူနစ် ချွေတာစွာဖြင့် အသုံးပြုနိုင်ပြီး လင်းအားကောင်းကြောင်း သိရသည်။

မန္တလေးလျှပ်စစ်ဓာတ်အားပေးရေးကော်ပိုရေးရှင်းမှ လျှပ်စစ်အန္တရာယ်ကင်းရှင်းရေး၊ ဆားဗစ်ကြိုးများ ရှုပ်ထွေးမှုမရှိစေရေးအတွက် ကျုံးပတ်လည်တွင် လျှပ်စစ်ဓာတ်အားလိုင်းများအား နိုင်ငံတကာအဆင့်မီ ကာဗာဖုံးအုပ်ထားသော ဗို့ အားမြင့် ကြေးကြိုးများဖြင့် ပြောင်းလဲတပ်ဆင်ပြီး ဒဏ်ခံဖိုက်ဘာအိမ်များဖြင့် ထိန်းချုပ်ကာ သွယ်တန်းပေးခဲ့သည်။

 နိုင်ငံတကာအဆင့်မီ လမ်းမီးတိုင်များကို နေပြည်တော်တွင် တပ်ဆင်ခဲ့ပြီး မန္တလေးမြို့သာယာလှပရေးအတွက် ယခုလို တပ်ဆင်ခြင်းဖြစ်သည်။