၂၀၁၇ခုနှစ်၊ ဇူလိုင်လ ၂၁ ရက်

 မန္တလေးတိုင်းဒေသကြီး မြို့ပြအိမ်ရာဖွံ့ဖြိုးရေးဦးစီးဌာနနှင့် ဆောက်လုပ်ရေးလုပ်ငန်းရှင်များအသင်းတို့ပူးပေါင်း၍ ပုသိမ်ကြီးမြို့နယ်၊ မဲကင်းကုန်းကျေးရွာနှင့် ရှင်တော်ကုန်းကျေးရွာဝန်းကျင်ရှိ မြေလွတ်နေရာများတွင် နိုင်ငံ့ဝန်ထမ်းများအတွက် အငှားအိမ်ရာနှင့် ဝင်ငွေနည်း ပြည်သူများအတွက် တန်ဖိုးမျှတအိမ်ရာများဆောက်လုပ်ရန် မြေတိုင်းတာမှုများဆောင်ရွက်လျက်ရှိသည်။ မဲကင်းကုန်းကျေးရွာအနီး စစ်မှု ထမ်းဟောင်း အိမ်ရာများလည်း ဆောက်လုပ်ပြီးစီးလျက်ရှိရာ မဲကင်းကုန်းကျေးရွာမြေကွက်များ တန်ဖိုးများမြင့်တက်လျက်ရှိသည်။ ပုသိမ်ကြီးမြို့နယ်၊ ကြာနီကန်ကျေးရွာအုပ်စုတွင်လည်း လယ်မြေများအကွက်ရိုက်၍ ကုမ္ပဏီမှ ရောင်းချပေးလျက်ရှိသော်လည်း ၀ယ်ယူသူ နည်းပါလျက်ရှိသည်။

 ပြည်ကြီးတံခွန်မြို့နယ်၊ ငွေတော်ကျီကုန်းရပ်ကွက်၊ ၇၄လမ်းဝန်းကျင်တွင်လည်း တန်ဖိုးသင့်အိမ်ရာများ ဆောက်လုပ်ရန် ဇူလိုင်လ ဒုတိယပတ်က ပန္နက်တင်အခမ်းအနားကျင်းပခဲ့ပြီး  Garden City Apartment Complex  ၁၅လုံးကို စတင်တည်ဆောက်လျက်ရှိသည်။ ဆောက်လုပ်လျက်ရှိသော တိုက်ခန်းများတွင် အိပ်ခန်း ၂ ခန်းပါ စတုရန်းပေ ၆၀၅ပေရှိ အခန်းပေါင်း ၄၂၀၊ အိပ်ခန်း၃ခန်းပါ စတုရန်းပေ ၉၂၅ပေရှိ အခန်းပေါင်း ၂၄၀၊ အိပ်ခန်းသုံးခန်းပါ စတုရန်းပေ ၁၂၁၀ပေရှိ အခန်းပေါင်း ၃၀၊ စုစုပေါင်း အခန်း ၆၉၀တည်ဆောက်သွားမည် ဖြစ်သည်။ ပထမထပ်မှ အဌမထပ်ထိ လူနေတိုက်ခန်းများဖြစ်ရာ အေးချမ်းစွာနေထိုင်လိုသူများအတွက် သင့်လျော်ပြီး ၀န်ထမ်းများနှင့် ပြည်သူများ ဘဏ်နှင့်ချိတ်ဆက်၍ ရောင်းချပေးသွားမည်ဖြစ်ကြောင်း ဆောက်လုပ်ရေးကုမ္ပဏီထံမှ သိရသည်။ တန်ဖိုးသင့်အိမ်ရာများနှင့် အငှားအိမ်ရာများ ဆောက်လုပ်ရန် ပြင်ဆင်နေမှုကြောင့် ပြည်ကြီးတံခွန်မြို့နယ်နှင့် ချမ်းမြသာစည်မြို့နယ်ရှိ ကျပ်သိန်း ၂၀၀ဝန်းကျင် (ပေ ၃၀ × ပေ ၄၀) ဂရန်မြေကွက်များရောင်းချမှုနှေးကွေးသွားသည်။ နယ်မှ မန္တလေးမြို့သို့ အခြေချနေထိုင်သူများနှင့် မန္တလေးမြို့တွင်း မြေကွက်ရောင်းချ၍ မြို့သစ်သို့ ပြောင်းရွှေ့နေထိုင်သူများသာ ၀ယ်ယူမှုရှိကြောင်းသိရသည်။