၂၀၁၈ ခုနှစ်၊ ဇွန်လ ၂၈ ရက်

 BOT စနစ်သည် အောင်မြင်သည့်အတွက် မန္တလေးတိုင်းဒေသကြီးအတွင်းရှိ လမ်းများကို ယင်းစနစ်ဖြင့် ဆောင်ရွက်သွားမည်ဖြစ်ကြောင်း တိုင်းဒေသကြီး လျှပ်စစ်၊ စွမ်းအင်နှင့် ဆောက်လုပ်ရေးဝန်ကြီး ဦးဇာနည်အောင်က ဇွန်လ ၂၈ ရက်တွင်ပြုလုပ်သည့် တိုင်းဒေသကြီးအစိုးရအဖွဲ့၏ ဒုတိယတစ်နှစ်တာ သက်တမ်းကာလအတွင်း ပြုပြင်ပြောင်းလဲရေး ဆောင်ရွက်ချက်များနှင့် စပ်လျဉ်းသည့် သတင်းစာရှင်းလင်းပွဲတွင် ပြောကြားသည်။

 နိုင်ငံတော်၏ ဘတ်ဂျက်မပါရှိဘဲ လမ်းများပေါ်ပေါက်လာရေးနှင့် နိုင်ငံတော်၏ ဘတ်ဂျက်အကန့်အသတ်ရှိနေချိန်တွင် လမ်းများအတွက် ပြုပြင်ထိန်းသိမ်း ရေးစရိတ်သည် မန္တလေးတိုင်းဒေသကြီးအတွင်း ဘီလီယံ ကျပ်လေးဆယ့်ငါးမှ ငါးဆယ်အကြား သုံးနေရသည့်အတွက်ကြောင့် BOT စနစ် လွှဲပြောင်းနိုင် လျှင် ယင်းငွေများကို အခြားသော ဖွံ့ဖြိုးရေးလုပ်ငန်းများတွင် ဆောင်ရွက်နိုင်မည်ဖြစ်သည့်အတွက် ယင်းစနစ်ကို ဆောင်ရွက်ရန် ကြိုးပမ်းဆောင်ရွက် နေခြင်းဖြစ်သည်။

 “BOT စနစ် ပေးတယ်ဆိုတာ အစိုးရကနေ လမ်းဖောက်လုပ်ပေးတယ်။ ပြီးတော့မှ ပုဂ္ဂလိကကို လွှဲအပ်ပေးပြီးတော့ ဆောင်ရွက်တာဖြစ်ပါတယ်။ BOT စနစ်က အောင်မြင်တဲ့ စနစ်တစ်ခုဖြစ်တယ်။ တိုင်းအတွင်းမှာရှိတဲ့ လမ်းတွေကို BOT စနစ်နဲ့ ဆောင်ရွက်နိုင်ဖို့ တိုးချဲ့သွားပါ့မယ်။ အခု မန္တလေး  တိုင်းဒေသကြီး ကနေစပြီးတော့ ဆောင်ရွက်မယ့် လမ်းဟာလည်း PPP အဆင့်နဲ့ ကျင့်သုံးနိုင်အောင် ဆောင်ရွက်ဖို့ ကြိုးစားနေပါတယ်။ တိုင်းဒေသကြီး လမ်းဦးစီးဌာနအနေဖြင့် မန္တလေးတိုင်းဒေသကြီးအတွင်း ၁၅၂၈ မိုင်ရှိပါတယ်။ ပြည်ထောင်စုကနေ စီမံခန့်ခွဲတဲ့ လမ်းက မိုင်နှစ်ရာကျော်၊ တိုင်းဒေသကြီး အစိုးရအဖွဲ့က စီမံခန့်ခွဲတဲ့ လမ်းက မိုင်ရှစ်ရာကျော်ဆိုပြီး နှစ်ပိုင်းရှိပါတယ်။ အဲ့ဒီလမ်းတွေပေါ်မှာ BOT စနစ်နဲ့ ပြည်ထောင်စုက စီမံခန့်ခွဲတဲ့လမ်းက အကုန်လုံးဆောင်ရွက်နေပြီးဖြစ်ပါတယ်”ဟု ၎င်းက ဆက်လက်ပြောသည်။

 နှစ်နှစ်အတွင်း လမ်းအဆင့်မြှင့်တင်ခြင်းလုပ်ငန်းများကို ဆောင်ရွက်နိုင်ခဲ့ကြောင်း၊ မန္တလေး-လားရှိုး-ဗန်းမော်-မြစ်ကြီးနားလမ်း၊ မြစ်ငယ်-ထုံးဘို-ပြင်ဦးလွင်လမ်း၊ လမ်းအမျိုးအစား နိုင်လွန်ကတ္တရာလမ်းကို ၂၄ ပေမှ ၄၈ ပေအထိ တိုးချဲ့ပြီးဖြစ်ကာ လမ်းအရှည် ၅၅ မိုင်နှင့် ၆ ဖာလုံဖြစ်ကြောင်း၊ ရန်ကုန်-တောင်ငူ-မန္တလေးလမ်းကို ကွန်ကရစ်လမ်းအဖြစ် ၃၄ မိုင်နှင့် ၂ ဖာလုံ အဆင့်မြှင့်တင်နိုင်ခဲ့ကြောင်း၊ ဟံမြင့်မိုရ်-မြို့ကြီး-ရွာငံ-အောင်ပန်းလမ်းကို ကတ္တရာလမ်းအဖြစ် ၄ မိုင်နှင့် ၇ ဖာလုံကို ဆောင်ရွက်နိုင်ခဲ့ကြောင်း၊ ကျန်ရှိသည့်လမ်းများကို ခရိုင်အသီးသီးတို့တွင်ရှိသည့် လမ်းဦးစီးဌာနမှ တာဝန်ယူထားသည့်လမ်းများ၊ တစ်နည်းအားဖြင့် တိုင်းဒေသကြီးအစိုးရအဖွဲ့မှ စီမံခန့်ခွဲနိုင်ခွင့်ရှိသည့်လမ်းများ လမ်းအရှည် ၂၅၈ မိုင်ကို ကတ္တရာလမ်းအဖြစ် ဆောင်ရွက်နိုင်ခဲ့ကြောင်း၊ ပေ ၆၆၀ အရှည်ရှိသည့် ဒုဋ္ဌဝတီ-ရွှေစာရံ၊ RC တံတား (၁)စင်းနှင့် ပေ (၁၈၀)အောက် သံကူကွန်ကရစ်တံတား  (၉၁)စင်းကိုလည်း တည်ဆောက်ပေးနိုင်ခဲ့ကြောင်း၊ ယင်းတို့အတွက် နှစ်နှစ်အတွင်း ရန်ပုံငွေ (၆၅)ဘီလီယံကို သုံးစွဲခဲ့ကြောင်း ပြောကြားခဲ့သည်။