၂၀၁၈ ခုနှစ် ဩဂုတ် ၂၂ ရက်

 ပညာရေးဝန်ကြီးဌာန၊ မန္တလေးနည်းပညာတက္ကသိုလ်က အကောင်အထည်ဖော်ဆောင်ရွက်လျက်ရှိသော တက္ကသိုလ်၊ သုတေသနဌာနများက လိုက်နာ ကျင့်သုံးမည့် “သုတေသနမူဝါဒ၊ နည်းလမ်း၊ လမ်းညွှန်၊ ဖွဲ့စည်းပုံများ”ထွက်ရှိလာစေရန်နှင့် အကောင်အထည်ဖော်ဆောင်ရွက်သွားရန် “Develop of Policies, Guidelines, Mechanisms and Frameworks on R&D” ဆိုင်ရာ အလုပ်ရုံဆွေးနွေးပွဲကို မန္တလေး၊ အောင်မြေသာစံမြို့နယ်ရှိ Mecure Mandalay Hill Resort Hotel ၌ သြဂုတ်လ ၂၂ ရက် နံနက် ၉ နာရီက ကျင်းပသည်။

 ရှေးဦးစွာ မန္တလေးတိုင်းဒေသကြီးအစိုးရအဖွဲ့ လျှပ်စစ်၊ စွမ်းအင်နှင့်ဆောက်လုပ်ရေးဝန်ကြီးဌာန ဝန်ကြီး ဦးဇာနည်အောင်နှင့် စက်မှုနှင့်သက်မွေးပညာ ဦးစီးဌာနမှ ညွှန်ကြားရေးမှူးချုပ်၊ အာဆီယံသိပ္ပံနည်းပညာတီထွင်ဆန်းသစ်မှုကော်မတီဥက္ကဋ္ဌ ဒေါက်တာအေးမြင့်တို့က အမှာစကားပြောကြားကြသည်။

 ထို့နောက် အမျိုးသားပညာရေးမူဝါဒကော်မရှင်အဖွဲ့ဝင် ပါမောက္ခ ဦးမောင်မောင်အေးက သုတေသနဖွံ့ဖြိုးရေးနှင့်ပတ်သက်သည့် နည်းလမ်းများအကြောင်း ကို ရှင်းလင်းပြောကြားသည်။

 ဆက်လက်၍ မန္တလေးနည်းပညာတက္ကသိုလ်ပါမောက္ခချုပ် ဒေါက်တာဆင့်စိုးက “Develop of Policies, Guidelines, Mechanisms and Frameworks on R&D” ဆိုင်ရာ အလုပ်ရုံဆွေးနွေးပွဲ၏ ရည်ရွယ်ချက်များရှင်းလင်းပြောကြားပြီး အမှတ်တရစုပေါင်းမှတ်တမ်းတင်ဓာတ်ပုံရိုက်ကူးပြီး အလုပ်ရုံဆွေးနွေးပွဲ ကို ဆက်လက်ကျင်းပရာ အင်ဒိုနီးရှားနိုင်ငံနှင့် ဗီယက်နမ်နိုင်ငံတို့မှ သုတေသနပညာရှင်များ၊ တိုင်းဒေသကြီးအတွင်းရှိ စီးပွားရေးလုပ်ငန်းရှင်ကြီးများ၊ စက်မှုလုပ်ငန်းများမှ လုပ်ငန်းရှင်များ၊ ဌာနဆိုင်ရာတာဝန်ရှိသူများ၊ တက္ကသိုလ်နှင့်သုတေသနဌာနအသီးသီးမှ ပညာရှင်များနှင့် သုတေသီများက အပြန်အလှန်ဆွေးနွေးကြသည်။

 အဆိုပါ အလုပ်ရုံဆွေးနွေးပွဲကို တက္ကသိုလ်များ၊ သုတေသနဌာနများတွင် သုတေသနလုပ်ငန်းများဖွံ့ဖြိုးတိုးတက်လာစေရန်နှင့် စက်မှုလုပ်ငန်းများအတွက် လိုအပ်နေသည့် နည်းပညာအကူအညီများ ပေးနိုင်စေရန် ရည်ရွယ်ဆောင်ရွက်ခြင်းဖြစ်သည်။

 R&D Policy ကို ASEAN နိုင်ငံများနှင့်ကိုက်ညီမှုရှိစေရန် အင်ဒိုနီးရှား၊ ဗီယက်နမ်နိုင်ငံတို့မှ သုတေသနစစ်တမ်း ကောက်ယူချက်များကိုအခြေပြု၍ ရေးဆွဲ သွားမည်ဖြစ်ပြီး နည်းပညာများနှင့် အသိပညာများကို အပြန်အလှန် ဖလှယ်ရယူ၍ မိမိနိုင်ငံများ၏ လယ်ယာထွက်ကုန်များ၊ သယံဇာတထွက်ကုန်များ၊ သဘာဝအရင်းအမြစ်များကို သုတေသနအခြေပြုစီးပွားရေးရရှိစေရန် ဆောင်ရွက်မည်ဖြစ်သည်။

 သုတေသနပရောဂျက်ကို ASEAN PLAN OF ACTION ON SCIENCE TECHNOLOGY AND INNOVATION(APA-STI)FUNDING SCHEME မှ ငွေကြေးအထောက်အပံ့ဖြင့် ၂၀၁၇-၂၀၁၈ ဘဏ္ဍာနှစ် တစ်နှစ်အတွင်း ဆောင်ရွက်သွားမည်ဖြစ်သည်။